JUDGES 5 - Edisana ñwed Abasi Ibom

Ikwɔ Emi Deborah ye Barak Ekekwɔde Etoro Abasi

¹ NDIEN Deborah ye Barak eyen Abinoam ekwɔ ke usen oro, ete,

² Mbufo etoro Jehovah: koro mme etubom ke Israel ekebemde iso; koro mbio-obio ekenyimede.

³ Ndidem mbufo ekop! Mbɔŋ, mbufo ekpaŋ utɔŋ! Ami, kpa ami, nyekwɔ nnɔ Jehovah; nyekwɔ ikwɔ nnɔ Jehovah Abasi Israel.

⁴ O Jehovah; ke ini afo otode ke Seir, ke ini afo otode ke isɔŋ Edom asaŋa; isɔŋ enyek, enyɔŋ onyuŋ ɔtɔi, mbubit enyɔŋ enyuŋ etɔi mmɔŋ.

⁵ Ikpɔ obot enyek ke iso Jehovah, kpa Sinai oro ke iso Jehovah Abasi Israel.

⁶ Ke eyo Shamgar eyen Anath, ke eyo Jael, mme ɔkpɔ-usuŋ ena ikpikpu: ndien mbon-isaŋ esaŋa ke ŋkwaŋa-ŋkwaŋa usuŋ.

⁷ Mme obio iŋwaŋ etre, ke Israel ke mmɔ etre, tutu ami Deborah ndaha nda, tutu ndaha nda nte eka ke Israel.

⁸ Mmɔ ekemek mbufa abasi: ndo-ndo oro ekɔŋ osim mme inua otop: nte ema ekut otu-ekɔŋ mme eduat ke otu mme tɔsin Israel aba?

⁹ Esit mi ada ye mbɔŋ Israel, emi ekenyimede ke otu mbio-obio. Mbufo etoro Jehovah.

¹⁰ Mbufo emi edorode ke mfia ass, emi etiede ke edesa, emi esaŋade ke usuŋ, ekwɔ, ekan mkpo mbon-utiga ke ebiet ukoi-mmɔŋ.

¹¹ Do ke editoro edinen ido Jehovah, edinen ido ikpɔ owo esie ke Israel. Ndien ikɔt Jehovah esuhɔre eka ke mme inua-otop.

¹² O Deborah, demere, demere! Demere, demere, tiŋ ikwɔ! O Barak, daha ke enyɔŋ, eyen Abinoam, taŋ mbuot-ekɔŋ fo.

¹³ Ndien nsuhɔ mbɔŋ obio esuhɔre; Jehovah ɔsuhɔre etiene mi ke otu mbon uko.

¹⁴ Mme mmɔ emi iduŋ mmɔ odude ke Amalek eto ke Ephraim edi. Benjamin etiene fi ke edem ke otu ikɔt fo. Mbɔŋ eto ke Machir esuhɔre edi. Mme andikama esaŋ ubɔŋ eto ke Zebulun edi.

¹⁵ Ndien mbɔŋ mi ke Issachar edu ye Deborah; ye Issachar, ye Barak ŋko: edɔŋ mmɔ esaŋa ke itihere ke ikpat.

¹⁶ Mmɔ ekeduak ikpɔ ŋkpɔ ke mben mme idim Reuben. Afo akanam didie etie ke otu mme nna-ufene, man okop ifiom ufene? Mmɔ ekekere ikpɔ ŋkpɔ ke mben mme idim Reuben.

¹⁷ Gilead akana suŋ ke edem Jordan oko: Dan ŋko, nsinam enye etiede ke ubom? Asher etie suŋ ke mben inyaŋ, onyuŋ ana ke mme esuk esie.

¹⁸ Zebulun edi mme mmɔ emi ekesinde uwem mmɔ ke mbio ete ikpaŋa, ye Naphtali, ke edikoŋ ebiet isɔŋ.

¹⁹ Ndidem ekedi ekeŋwana ekɔŋ; ndien ndidem Canaan ekeŋwana ke Taanach ke mben mmɔŋ Megiddo; mmɔ ikwe mbume silver.

²⁰ Mmɔ etie ke enyɔŋ eŋwana ekɔŋ; mme ntantafiɔŋ ke ɔkpɔ-usuŋ mmɔ eŋwana ye Sisera.

²¹ Akpa mmɔŋ Kishon emen mmɔ efep, akani akpa edi akpa Kishon. Ukpɔŋ mi, dɔdiɔŋ, sɔŋɔ, ka iso.

²² Ndien mme horse emia ikpat ke itɔk, ke itɔk mbon-uko esie.

²³ Angel Jehovah ɔdɔhɔ, ete, Mbufo esuŋi Meroz; esuŋi mme andiduŋ enye ata isuŋi: koro mmɔ midige ndiŋwam Jehovah, ndiŋwam Jehovah ke otu mbon-uko.

²⁴ Yak ekɔm Jael ŋwan Heber Kenite ekan iban, edediɔŋ ekɔm enye ekan iban ke tent.

²⁵ Enye (Sisera) ekebeŋe mmɔŋ, enye (Jael) ɔnɔ mmɔŋ-eba; esin edibari mmɔŋ-eba ke bowl ɔbɔŋ, ada ɔsɔk enye.

²⁶ Anyan ubɔk emen ɔkpɔhɔ, ubɔk nnasia esie ada hammer usɔ, ndien ɔkɔŋ Sisera, anuak enye ibuot, obom, onyuŋ okim enye ɔkpɔ-iso.

²⁷ Enye (Sisera) ɔnuhɔ ke ukot esie, ɔduɔ, ana, ke ukot esie ke enye ɔnuhɔ, ɔduɔ, ke ɔtɔ oro enye ɔnuhɔde do ke enye ɔduɔ ana akpa.

²⁸ Eka Sisera etie ke window ese, etie ke edem lattice ofiori; ete, Nsinam chariot esie ebigide ndidi? Nsinam ukot (mme horse) chariot esie ebigide ntre?

²⁹ Mme enyene-ibuot mbɔŋ-iban esie ebɔrɔ; enye ŋko; obɔ uyo esiemɔ ɔbɔrɔ, ete,

³⁰ Nte mmɔ ikwe, inyuŋ ideme mbume? eyen-aŋwan kiet, nditɔ-iban iba inɔ owo kiet kiet; ediye ɔfɔŋ-idem ke mbume Sisera, ediye ɔfɔŋ-idem usɔ abiabon ke mbume, ediye ɔfɔŋ-idem usɔ abiabon edem mbiba, ke mbume itɔŋ.

³¹ O Jehovah, nam kpukpru mme asua fo etak ntem! Edi mmɔ eke emade enye ebiet nte utin asiahade ke odudu esie. Ndien isɔŋ ana suŋ ke ofuri isua aba.