JUDGES 12 - Edisana ñwed Abasi Ibom

Eŋwan Emi Okodude ke Ufɔt Jephthah ye Nditɔ Ephraim

¹ NDIEN ewuk kpukpru nditɔ Ephraim, ete esop idem, ndien mmɔ eka edem edere-edere, ekedɔhɔ Jephthah, ete, Afo akanam didie ebe aka akaŋwana ekɔŋ ye nditɔ Ammon, ndien mukotde nnyin isaŋa ye afo? nnyin iyefɔp fi ye ufɔk fo ke ikaŋ.

² Ndien Jephthah ɔdɔhɔ mmɔ, ete, Ami ye oruk mi itɔhɔ utɔk eti-eti ye nditɔ Ammon; ndien ŋkeseme nnɔ mbufo, edi mbufo inyaŋake mi isio ke ubɔk mmɔ.

³ Ndien ke ini ŋkutde nte mbufo midige idinyaŋa, nda uwem mi nsin ke ubɔk, ndien nsaŋa mbe ŋka ekɔŋ ye nditɔ Ammon, ndien Jehovah ada mmɔ esin mi ke ubɔk: mbufo enam didie ndien edɔk etiene mi mfin emi ndiŋwana ekɔŋ ye ami.

⁴ Ndien Jephthah obon kpukpru owo Gilead, aka akaŋwana ekɔŋ ye Ephraim: ndien nditɔ Gilead esuan Ephraim: koro mmɔ ekedɔhɔde ete, Mbufo Gilead edi mmɔ eke ebɔhɔde Ephraim, eda ke ufɔt Ephraim ye Manasseh.

⁵ Ndien Gilead eka ekeda ebiet-ube Jordan ekpehe Ephraim; ndien edikem adaŋemi nditɔ Ephraim eke ebɔhɔde, edɔhɔde ete, Yak mbe: mbio Gilead ebup enye, ete, Nte afo edi eyen Ephraim? ndien edieke enye ɔbɔrɔde, ete, Ndige:

⁶ Mmɔ edɔhɔ enye, ete, Dɔhɔ naŋa, ete, Shibboleth, ndien enye ɔdɔhɔ ete, Sibboleth: koro mikemeke nditim ntiŋ ntre. Ndien mmɔ emum enye ewot ke ebiet-ube Jordan. Ntre ke tɔsin nditɔ Ephraim aba ye iba eduɔŋɔ ke ini oro.

⁷ Ndien Jephthah ekpe ikpe Israel ke isua itiokiet. Ekem Jephthah eyen Gilead akpa, onyuŋ ɔbuhɔ ke obio Gilead kiet.

⁸ Ndien Ibzan a Bethlehem ada itie esie ekpe ikpe Israel.

⁹ Enye onyuŋ enyene nditɔ-iren edip ye duop, ye nditɔ-iban edip ye duop emi enye ɔdɔŋde eka ebiet efen, onyuŋ ada nditɔ-iban edip ye duop ke ebiet efen, oduk ɔnɔ nditɔ-iren esie.

¹⁰ Enye onyuŋ ekpe ikpe Israel ke isua itiaba. Ekem Ibzan akpa, onyuŋ ɔbuhɔ ke Bethlehem.

¹¹ Ndien Elon, eyen Zebulun kiet, ada itie esie ekpe ikpe Israel: enye onyuŋ ekpe ikpe Israel ke isua duop

¹² Ekem Elon eyen Zebulun akpa, onyuŋ ɔbuhɔ ke Aijalon ke isɔŋ Zebulun.

¹³ Ndien Abdon eyen Hillel, Pirathonite kiet, ada itie esie ekpe ikpe Israel:

¹⁴ enye onyuŋ enyene nditɔ iren aba, ye nyeyen edip ye duop, emi edorode ke ass ata ye duop: enye onyuŋ ekpe ikpe Israel ke isua itiaita.

¹⁵ Ekem Abdon eyen Hillel, Pirathonite, akpa, onyuŋ ɔbuhɔ ke Pirathon ke isɔŋ Ephraim, ke obot mme Amalekite.