JOSHUA 5 - Edisana ñwed Abasi Ibom

Joshua Enim Nditɔ Israel Mbobi ke Obot Mme Edut ye Passover ke Gilgal

¹ EDIKEM, adaŋemi kpukpru mbɔŋ mme Amorite, emi edude ke edem usop-utin Jordan, ye kpukpru mbɔŋ mme Canaanite, emi edude ke mben inyaŋ, ekopde nte Jehovah akanamde mmɔŋ Jordan asat ke iso nditɔ Israel, tutu nnyin ibe, ndien nsia oyomo mmɔ, uko onyuŋ okure mmɔ ke idem, abaŋa nditɔ Israel.

² Ke ini oro Jehovah ɔdɔhɔ Joshua, ete, Da itiat nam ikwa nɔ idem fo, nyuŋ tɔŋɔ ntak nim nditɔ Israel mbobi utim ikaba.

³ Ndien Joshua ada itiat anam ikwa ɔnɔ idem esie, onyuŋ onim nditɔ Israel mbobi ke Gibeath-ha-araloth (obot mme edut).

⁴ Ndien emi edi ntak emi Joshua onimde mmɔ mbobi: kpukpru owo oro eketode ke Egypt, irenowo, kpukpru mbon-ekɔŋ ekpaŋa ke wilderness ke usuŋ, ke ini mmɔ eketode ke Egypt.

⁵ Koro kpukpru owo oro eketode ema ena mbobi: edi ama edi kpukpru mmɔ oro ekemanade ke usuŋ ke wilderness, ke ini mmɔ eketode ke Egypt, mmɔ ikenaŋa mbobi.

⁶ Koro nditɔ Israel esaŋade ke wilderness ke isua aba, tutu kpukpru owo ke otu mbon ekɔŋ oro eketode ke Egypt, ekure, koro mmɔ mikekopke uyo Jehovah: emi Jehovah ɔkɔŋwɔŋɔde abaŋa mmɔ, ete ke imɔ idiwutke mmɔ isɔŋ oro Jehovah ɔkɔŋwɔŋɔde ɔnɔ mme ete mmɔ, ete iyenɔ nnyin, isɔŋ emi ɔfiɔrɔde mmɔŋ-eba ye aran-ɔkwɔk.

⁷ Edi nditɔ mmɔ emi Enye adade onim ke itie mmɔ, mmɔ ke Joshua onim mbobi: koro mmɔ edide edut: koro mikenimke mmɔ mbobi ke usuŋ.

⁸ Ekem ke adaŋemi mmɔ ema ekenim kpukpru owo mbobi, mmɔ etie suŋ ke itie mmɔ ke nna, tutu idem ɔsɔŋ mmɔ.

⁹ Ndien Jehovah ɔdɔhɔ Joshua, ete, Mfin emi mmakpat mbufo esuene Egypt ke idem mfep. Mmɔdo enyiŋ ebiet oro ekerede Gilgal tutu osim mfin emi.

¹⁰ Ndien nditɔ Israel ena ke Gilgal, enyuŋ enam passover ke ɔyɔhɔ usen duopenaŋ ke ɔfiɔŋ ke mbubreyo, ke una-isɔŋ Jericho.

¹¹ Ndien mmɔ edia mbuŋwum isɔŋ oro ke edem usen passover, kpa uyo eke leaven miduhe, ye edifɔp ibokpot,

¹² ke idem usen oro. Ekem manna etre ke edem usen nte mmɔ ema ekedia mbuŋwum isɔŋ oro; nditɔ Israel inyuŋ ikwe aba manna; edi mmɔ edia mbuŋwum isɔŋ Canaan ke isua oro.

¹³ Edikem adaŋemi Joshua odude ke mben Jericho, enye emenere enyin esiemɔ okut, ndien, sese, owo kiet ada enye ke iso, ye ofut afai ke ubɔk: ndien Joshua etiene enye, onyuŋ ɔdɔhɔ enye, ete, Nte afo ada ye nnyin, mme ada ye mme asua nnyin?

¹⁴ Ndien enye ete, Ih ih; koro ami ndi ke emi nte etubom mbon-ekɔŋ Jehovah. Ndien Joshua ɔduɔ ke isɔŋ okubi iso esie, atuak ibuot, onyuŋ obup enye, ete, Nso ke Ɔbɔŋ mi ɔdɔhɔ owo esie?

¹⁵ Ndien etubom mbon - ekɔŋ Jehovah ɔdɔhɔ Joshua, ete, Sio ikpa-ukot fo ke ukot fo fep: koro ebiet emi afo adade ke esit edide edisana. Ndien Joshua anam ntre.