JOSHUA 4 - Edisana ñwed Abasi Ibom

Nditɔ Israel Ewuk Itiat Editi Duobeba ke Mben Akpa Jordan

¹ EDIKEM adaŋemi kpukpru owo ema ekebe Jordan ema,

² ndien Jehovah ɔdɔhɔ Joshua, ete, Mbufo esio owo duopeba, ke otu kpukpru owo eda, owo kiet ke esien kiet, owo kiet ke esien kiet,

³ enyuŋ eteme mmɔ, ete, Mbufo emen itiat duopeba eke ediwukde eda ke ebiet emi ke ufɔt Jordan, ke ɔtɔ emi ukot mme oku etuakde eda, enyuŋ ebiom mmɔ ebe ŋko, ekenim ke ebiet nna eke mbufo edinade do ke okoneyo emi.

⁴ Ndien Joshua okot owo duopeba oro enye okosiode ke otu nditɔ Israel onim, owo kiet ke esien kiet, owo kiet ke esien kiet:

⁵ Joshua onyuŋ ɔdɔhɔ mmɔ, ete, Mbufo esaŋa ebe ke iso ekebe Jehovah Abasi mbufo eduk ke ufɔt Jordan, ndien mbufo owo kiet kiet emen itiat kiet edori ke afara mbufo, nte ibat esien nditɔ Israel asaŋade:

⁶ man emi edi idiɔŋɔ ke ufɔt mbufo, adaŋemi nditɔ mbufo edibupde ke ini iso, ete, Mbufo enim mme itiat emi ke nso?

⁷ Ndien mbufo edibɔrɔ mmɔ ete, Mmɔŋ Jordan ama ekekpehe ke iso ekebe ediomi Jehovah; adaŋaemi enye ebede Jordan, mmɔŋ Jordan ekpehe: ndien mme itiat emi eyena ke editi ŋkpɔ nditɔ Israel ke nsinsi.

⁸ Ndien nditɔ Israel enam ntre kpa nte Jehovah eketemede, ndien mmɔ emen itiat duopeba ke ufɔt Jordan, kpa nte Jehovah ɔkɔdɔhɔde Joshua, asaŋa ke ibat mme esien nditɔ Israel, enyuŋ ebiom mmɔ ŋko ebe eka ebiet emi mmɔ enade,

⁹ ekenim mmɔ do. Joshua onyuŋ okubi itiat duopeba ke ufɔt Jordan, ke ɔtɔ oro ukot mme oku emi ebiomde ekebe ediomi ekedade: ndien mmɔ edu do tutu osim mfin emi.

¹⁰ Ndien mme oku emi ebiomde ekebe eda ke ufɔt Jordan, tutu mmɔ ema kpukpru ŋkpɔ emi Jehovah eketemede Joshua, ete etiŋ ɔnɔ mbon oro, ekem ye kpukpru se Moses eketemede Joshua: ndien mmɔ esɔp ukot ebe.

¹¹ Ekem adaŋemi kpukpru owo ema ekebe ema, ekebe Jehovah, ye mme oku, ebe ke enyin kpukpru owo.

¹² Ndien Reuben, ye nditɔ Gad, ye ibio esien Manasseh, ebɔbɔ mbɔbɔ ekɔŋ ebe nditɔ Israel iso, nte emi Moses ɔkɔdɔhɔde mmɔ:

¹³ osim tɔsin mbon ekɔŋ aba esaŋa ke iso Jehovah ebe eka ekɔŋ, ke una-isɔŋ Jericho.

¹⁴ Ke usen oro Jehovah okpono Joshua ke iso ofuri Israel; ndien mmɔ eteŋe enye, nte eketeŋede Moses, ofuri ini uwem esie.

¹⁵ Ekem Jehovah ɔdɔhɔ Joshua,

¹⁶ ete, Dɔhɔ mme oku emi ebiomde ekebe ntiense, ete eto ke Jordan edɔk.

¹⁷ Ndien Joshua ɔdɔhɔ mme oku, ete, Mbufo eto ke Jordan edɔk.

¹⁸ Ekem, ke ini mme oku emi ebiomde ekebe ediomi Jehovah, ema eketo ke ufɔt Jordan edɔk, ke ini ikpat-ukot mme oku ema ekeyuŋ ewɔrɔ edigi ke edisat isɔŋ, ndien mmɔŋ Jordan afiak ke itie esie, onyuŋ ɔyɔhɔ ada ofuri mben ikɔt esie nte anamde akpa.

¹⁹ Ndien mbio oro eto ke Jordan edɔk ke ɔyɔhɔ usen akpa ɔfiɔŋ duop, ndien mmɔ eka ekena ke Gilgal, ke edem usiaha-utin Jericho.

²⁰ Ndien Joshua emen itiat duopeba oro mmɔ ekedade ke Jordan,

²¹ okubi ke Gilgal. Enye onyuŋ ɔdɔhɔ nditɔ Israel, ete, adaŋemi nditɔ mbufo edibupde mme ete mmɔ ke ini iso, ete,

²² Nsidi mme itiat emi? Ndien mbufo edisian nditɔ mbufo, ete, Israel akasaŋa ke edisat isɔŋ ebe Jordan emi.

²³ Koro Jehovah Abasi mbufo akanamde mmɔŋ Jordan asat ke iso mbufo, tutu mbufo ekebe, kpa nte Jehovah Abasi mbufo akanamde Ididuot Inyaŋ, emi enye akanamde asat ke iso nnyin tutu nnyin ibe:

²⁴ Kpaŋ kpukpru mme idut ke ererimbot ekpefiɔk ubɔk Jehovah, nte enye ɔsɔŋɔde: kpaŋ mbufo ekpeteŋe Jehovah Abasi mbufo kpukpru ini.