JOSHUA 3 - Edisana ñwed Abasi Ibom

Nditɔ Israel Ebe Akpa Jordan

¹ EKEM Joshua abak edemere ke usenubɔk; ndien mmɔ edaŋa ke Shittim edi ke Jordan, enye ye kpukpru nditɔ Israel, ndien mmɔ edaŋ do ke mikaibehe kaŋa.

² Edikem ke utit usen ita, ndien mme andidaha esaŋa ke ufɔt nna ebe:

³ ndien mmɔ ewuk kpukpru owo, ete, Ke adaŋemi mbufo ekutde ekebe ediomi Jehovah Abasi mbufo, ye nte mme oku, mme Levite, ebiomde enye, ndien mbufo edaŋa ke ebiet mbufo, enyuŋ esaŋa enye ke edem:

⁴ edi eyak ufaŋ ana mbufo ke ufɔt ye enye, tɔsin ibio idomo-okuk iba, mbufo ekukpere enye: man efiɔk usuŋ eke edisaŋade ke esit: koro akanam mbufo misaŋake kaŋa ke usuŋ oro ibe.

⁵ Ndien Joshua ɔdɔhɔ kpukpru owo, ete, Mbufo enam esit mbufo esana: koro mkpɔŋ Jehovah eyenam mme utibe ŋkpɔ ke otu mbufo.

⁶ Ndien Joshua ɔdɔhɔ mme oku, ete, Mbufo emen ekebe ediomi, enyuŋ ebem kpukpru owo iso ebe. Ndien mmɔ emen ekebe ediomi, enyuŋ esaŋa kpukpru owo ke iso.

⁷ Ekem Jehovah ɔdɔhɔ Joshua, ete, Mfin emi ami nyetɔŋɔ ndikpono fi ke iso ofuri Israel, man mmɔ efiɔk ete ke ndidu ye afo,

⁸ Kpa nte ŋkodude ye Moses. Afo eyewuk ndien mme oku emi ebiomde ekebe ediomi, ete, Ke ini mbufo esimde mben mmɔŋ Jordan, etuak eda ke Jordan.

⁹ Ndien Joshua ɔdɔhɔ nditɔ Israel, ete, Mbufo esaŋa ekpere ken enyuŋ ekop uyo Jehovah Abasi mbufo.

¹⁰ Ndien Joshua ɔdɔhɔ ete, Ntem ke mbufo edifiɔk ete ke Abasi uwem odudu ke ufɔt mbufo, idinyuŋ itreke ndibin mme Canaanite, ye mme Hittite, ye mme Hivite, ye mme Perizzite, ye mme Girgashite, ye mme Amorite, ye mme Jebusite, ke iso mbufo mfep.

¹¹ Sese, ekebe ediomi Ɔbɔŋ ofuri ererimbot ɔmɔŋ asaŋa mbufo ke iso ebe okoduk ke Jordan.

¹² Mbufo esio ndien owo duopeba ke mme esien Israel ke idem mbufo, owo kiet ke esien kiet, owo kiet ke esien kiet.

¹³ Ndien ama ekem, ke ini ikpat ukot mme oku emi ebiomde ekebe Jehovah ɔbɔŋ ofuri ererimbot, edituakde ada ke mmɔŋ Jordan, mmɔŋ Jordan eyesibe, kpa mmɔŋ emi otode ke edere osuk, eyekpehe ada nte obot kiet.

¹⁴ Ndien edikem adaŋemi kpukpru owo ewuhɔrede mme tent mmɔ, man ebe Jordan, mme oku enyuŋ ebiom ekebe ediomi ebem mmɔ iso,

¹⁵ ndien adaŋemi mme andibiom ekebe esimde Jordan, ukot mme oku emi ebiomde ekebe, enyuŋ edebede ke mben mmɔŋ, (koro Jordan ɔyɔhɔde ada ofuri mben ikɔt esie ofuri ini ukpeŋe),

¹⁶ ndien mmɔŋ emi otode ke edere atuak ada, onyuŋ adaha ada nte ebok kiet ata anyan ebiet, tutu osim ke obio Adam, emi ekperede Zaretan; ndien mmɔŋ emi ɔsuhɔre aka Inyaŋ Una-isɔŋ, kpa Inyaŋ Inuŋ, ekpehe, onyuŋ asat: ndien mmɔ esaŋa ebe ekem ye Jericho.

¹⁷ Ndien mme oku emi ebiomde ekebe ediomi Jehovah, esɔŋɔ eda ke edisat isɔŋ ke ufɔt Jordan; ndien ofuri Israel esaŋa ke edisat isɔŋ ebe, tutu kpukpru owo ebe Jordan ema.