JOSHUA 20 - Edisana ñwed Abasi Ibom

Nditɔ Israel Esio Mme Obio Ubɔhɔ Enim

¹ NDIEN Jehovah ɔdɔhɔ Joshua, ete, Dɔhɔ nditɔ Israel, ete,

² Mbufo esio ndien mme obio-ubɔhɔ emi ŋkɔdɔhɔde mbufo ke inua Moses, enim enɔ idem-mbufo:

³ man owot-owo eke owotde owo ke mikoho koi, minyuŋ ifiɔkke, ekpefehe aka do: ndien mbufo eyenyene mmɔ ke ebiet eke ekade ebɔhɔ osio-usiene iyip.

⁴ Ndien yak owo eke efehede aka obio emi kiet, ada ke inua-otop obio oro, onyuŋ etiŋ ikɔ esie esin ke utɔŋ mbiowo obio oro, ndien yak mmɔ eda enye ke idem mmɔ esin ke obio, enyuŋ enɔ enye ebiet, man enye oduŋ ye mmɔ.

⁵ Ndien adaŋemi osio-usiene iyip edibinede enye, yak mmɔ ekumen owot-owo oro esin enye ke ubɔk: koro enye mikɔfiɔkke fiɔk iwot mbɔhiduŋ esie, mikonyuŋ isuaha enye ke mbem-iso.

⁶ Ndien yak enye oduŋ ke obio oro, tutu enye edi ikpe ke iso esop, tutu ɔbɔŋ oku eke edidude ke usen oro akpa ŋko; ndien owot-owo oro edinyɔŋ edi ke obio mmɔ, ye ke ufɔk esiemɔ, ye ke obio oro enye okotode do efehe.

⁷ Ndien enim Kedesh ke Galilee ke obot Naphtali, ye Shechem ke obot Ephraim, ye Kiriath-arba, oro edi Hebron ke ikpɔ obot Judah.

⁸ Ndien ke edem Jordan Jericho oko, ke edem usiaha-utin, mmɔ enim Bezer ke wilderness ke una-isɔŋ, ke esien Reuben, ye Ramoth ke Gilead, ke esien Gad, ye Golan ke Bashan, ke esien Manasseh.

⁹ Mme obio emi ke mmɔ ekenim enɔ kpukpru nditɔ Israel, ye esen owo eke eduŋde ke otu mmɔ, kpaŋ kpukpru owot-owo, eke mikoho koi inam, ekpefehe eka do, ekunyuŋ ekpa ke ubɔk osio-usiene iyip, tutu mmɔ edi ikpe ke iso mbon-esop.