JOSHUA 16 - Edisana ñwed Abasi Ibom

Isɔŋ Emi Enɔde Esien Ephraim ye Manasseh

¹ NDIEN afia ɔwɔrɔ ɔnɔ nditɔ Joseph ɔtɔŋɔde ke Jordan Jericho, kpa ke mmɔŋ Jericho ke edem usiaha-utin, kpa wilderness emi ɔtɔŋɔde ke Jericho ɔdɔk ke obot Beth-el,

² ndien oto ke Beth-el aka Luz, ndien ebe adaŋa mme Archite osim Ataroth,

³ ndien ɔsuhɔre ke edem usop utin asaŋa ke adaŋa mme Japhletite, tutu osim adaŋa Beth-horon ke usuhɔre, ye Gezer: ndien utit esie atuak ke inyaŋ.

⁴ Ntem ke nditɔ Joseph, kpa Manasseh ye Ephraim, ekeda udeme.

⁵ Ndien adaŋa nditɔ Ephraim ke ubon, ke ubon, etie ntem: adaŋa udeme mmɔ asaŋa ke edem usiaha-utin Ataroth-addar, tutu osim Beth-horon ke obot;

⁶ ndien adaŋa ɔwɔrɔ ke inyaŋ ke edem edere Michmethath; ndien adaŋa akanade aka ke edem usiaha-utin Taanath-shiloh, ndien ebe enye ke edem usiaha-utin aka Janoah;

⁷ ndien enye oto ke Janoah ɔsuhɔre aka Ataroth, ye Naarah, ndien edisim Jericho, ndien ɔwɔrɔ ke Jordan.

⁸ Adaŋa ɔtɔŋɔ ke Tappuah aka edem usop-utin okosim akpa Kanah; ndien utit esie atuak ke inyaŋ. Emi edi udeme nditɔ Ephraim ke ubon, ke ubon.

⁹ Ye mme obio emi edianarede enɔ nditɔ Ephraim ke otu udeme nditɔ Manasseh, kpukpru obio,

¹⁰ ye mme obio iŋwaŋ mmɔ. Edi mmɔ isioŋoke mme Canaanite emi eduŋde ke Gezer ifep: ndien mme Canaanite eduŋ ke otu nditɔ Ephraim tutu osim mfin emi, enyuŋ etomo utomo.