JOSHUA 14 - Edisana ñwed Abasi Ibom

Nditɔ Israel esin Afia Ebahade Isɔŋ Canaan

¹ NDIEN mme mmɔ emi ke nditɔ Israel ekeda ke udeme ki isɔŋ Canaan, emi Eleazar oku, ye Joshua eyen Nun, ye mme etubom mme ete mme esien nditɔ Israel edemede enɔ mmɔ.

² Udeme mmɔ asaŋa ke afia, kpa nte Jehovah okowukde ke ubɔk Moses, abaŋa mme esien usukkiet, ye ubak esien kiet:

³ Koro Moses ama akada udeme ɔnɔ esien iba ye ubak esien kiet ke edem Jordan oko; edi ikɔnɔŋɔ mme Levite udeme ke otu mmɔ.

⁴ (Koro nditɔ Joseph edide esien iba, Manasseh ye Ephraim.) Ndien inɔŋɔ mme Levite udeme ke isɔŋ, ibɔhɔke obio iduŋ, ye mben isɔŋ mmɔ, ke eke ufene mmɔ ye inyene mmɔ,

⁵ Kpa nte Jehovah eketemede Moses, ntre ke nditɔ Israel enam, enyuŋ edeme isɔŋ.

⁶ Ekem nditɔ Judah edi ke ɔtɔ Joshua ke Gilgal: ndien Caleb eyen Jephunneh, eyen Kenaz, ɔdɔhɔ enye, ete, Afo ɔmɔfiɔk ikɔ oro Jehovah eketiŋde ɔnɔ Moses, owo Abasi, abaŋa mi ye afo ke Kadesh-barnea.

⁷ Ami ŋkosim isua aba ke ini Moses owo Jehovah etiede ke Kadesh-barnea ɔdɔŋ mi ete ŋka ŋkeyep isɔŋ emi; ndien nda ikɔ nte odude mi ke esit mfiak ŋketiŋ nnɔ enye.

⁸ Edi nditɔ-ete mi oro ekesaŋa ye ami edɔk, enam nsia oyomo mbio emi: edi ami ntim ntiene Jehovah Abasi mi.

⁹ Ndien Moses ɔŋwɔŋɔ ke usen oro, ete, Isɔŋ oro ikpat fo akasaŋade do eyenyene fi ye nditɔ fo ke nsinsi udeme: koro afo otimde etiene Jehovah Abasi mi.

¹⁰ Ndien, sese, Jehovah omonim mi uwem, kpa nte enye ɔkɔdɔhɔde, ke ofuri isua aba ye ition emi, ɔtɔŋɔde ke ini oro Jehovah eketiŋde ikɔ emi ɔnɔ Moses, emi nditɔ Israel esaŋade ke wilderness: ndien, sese, ami nsim isua anaŋ ye ition mfin emi.

¹¹ Idem ke osuk ɔsɔsɔŋ mi mfin emi kpa nte usen oro Moses ɔkɔdɔŋde mi utom: kpa nte odudu mi ekedide ke ini oro, ntre ke onyuŋ edi ke emi, ndiŋwana ekɔŋ, nnyuŋ ŋwɔrɔ, nnyuŋ nduk.

¹² Kam nɔ mi, ndien, obot emi, nte Jehovah ɔkɔdɔhɔde ke usen oro: koro afo ama okop ke usen oro: koro mme Anakim edudu do, mme obio enyuŋ ekponi, enyuŋ enyene ibibene; Jehovah ama odu ye ami, ndien nyekeme ndibɔ mmɔ itie, kpa nte Jehovah ɔkɔdɔhɔde.

¹³ Ndien Joshua ɔdiɔŋ enye, onyuŋ ada Hebron ɔnɔ Caleb eyen Jephunneh ke udeme.

¹⁴ Mmɔdo Hebron akabarede edi udeme Caleb eyen Jephenneh eyen Kenaz, tutu osim mfin emi: koro enye okotimde nditiene Jehovah Abasi Israel.

¹⁵ Ndien enyiŋ Hebron ke akpa ini ekekere Kiriath-arba; Arba emi ekedi ata akamba owo ke otu mme Anakim. Ndien isɔŋ ɔduɔk odudu ekɔŋ.