JOSHUA 13 - Edisana ñwed Abasi Ibom

Mme Isɔŋ Emi Nditɔ Israel Enyenede Ndikan Nnyuŋ Nda Nnyene

¹ EKEM Joshua akabare akani eren, osim ediwak usen; ndien Jehovah ɔdɔhɔ enye, ete, Afo eyedi akani eren, omosim ediwak usen; ndien osuk ediwak isɔŋ eti-eti eke ekpedade.

² Isɔŋ emi ɔsuhɔ kaŋa; ofuri adaŋa mme philistine,

³ ye ofuri Geshuri, ɔtɔŋɔde ke Shihor emi anade ke iso Egypt, tutu osim adaŋa Ekron ese edem edere, emi ebatde ke eke mme Canaanite: mbɔŋ mme Philistine ition; mme Gazite, ye mme Ashdodite, ye mme Ashkelonite, ye mme Gittite, ye mme Ekronite;

⁴ ye mme Avvim ŋko ke edem usuk: ofuri isɔŋ mme Canaanite, ye Mearah emi enyenede mme Zidonian, tutu osim ke Aphek, osim adaŋa mme Amorite:

⁵ ye isɔŋ mme Gebalite ŋko, ye ofuri Lebanon ke edem usiaha-utin, ɔtɔŋɔde ke Baal-gad ke ukot obot Hermon, tutu osim ke ɔtɔ emi edukde Hamath.

⁶ Kpukpru mme andiduŋ ikpɔ obot, ɔtɔŋɔde ke Lebanon tutu osim ke Misrephoth-maim, kpukpru mme Zidonian, mmɔ ke ami ndisioŋo mfep ke iso nditɔ Israel: edi sin afia, da enye nɔ Israel ke udeme, kpa nte ŋketemede fi.

⁷ Bahare ndien isɔŋ emi nɔ mme esien usukkiet, ye ibio esien Manasseh ete eda enyene,

⁸ emi mme Reubenite ye mme Gadite ema ema udeme mmɔ ye mmɔ, nte Moses ɔkɔnɔde mmɔ ke edem Jordan oko ke edem usiaha-utin, kpa nte Moses owo Jehovah ɔkɔnɔde mmɔ;

⁹ Ɔtɔŋɔde ke Aroer emi odude ke mben itihere Arnon, ye obio emi anade ke ufɔt itihere, ye ofuri una-isɔŋ Medeba, tutu osim ke Dibon;

¹⁰ ye kpukpru obio Sihon ɔbɔŋ mme Amorite, emi akadade ubɔŋ ke Heshbon, tutu osim adaŋa nditɔ Ammon,

¹¹ ye Gilead, ke adaŋa mme Geshurite, ye eke mme Maacathite, ye ofuri obot Hermon, ye ofuri Bashan tutu osim ke Salecah;

¹² ofuri isɔŋ emi Og ekedide ɔbɔŋ mmɔ ke Bashan, emi akadade ubɔŋ ke Ashtaroth ye ke Edrei (enye osuhɔ ke otu mme nsuhɔ mme Rephaim); ndien Moses akakan mmɔ, onyuŋ ɔbɔ mmɔ itie.

¹³ Edi nditɔ Israel ibɔhɔ isɔŋ mme Gehsurite, ye eke mme Maacathite: edi mme Geshurite ye mme Maacathite eduŋ ke otu Israel tutu osim mfin emi.

¹⁴ Edi enye inɔŋɔ esien Levi udeme: mme uwa ikaŋ Jehovah Abasi Israel edi udeme mmɔ; kpa nte enye ɔkɔdɔhɔde mmɔ.

¹⁵ Ndien Moses ɔnɔ esien nditɔ Reuben udeme ke ubon, ke ubon.

¹⁶ Ndien adaŋa mmɔ ɔtɔŋɔ ke Aroer, emi odude ke mben itihere Arnon, ye ke obio emi odude ke ufɔt itihere, ye ofuri una-isɔŋ emi ekperede Medeba;

¹⁷ Hehsbon, ye kpukpru obio esie emi edude ke una-isɔŋ oro; Dibon, ye Bamoth-baal, ye Beth-baal-meon,

¹⁸ ye Jahaz, ye Kedemoth, ye Mephaath,

¹⁹ ye Kiriathaim, ye Sibmah, ye Zereth-shahar, ke obot itihere,

²⁰ ye Beth-peor, ye Ashdoth-pisgah,

²¹ ye Beth-jeshimoth; ye kpukpru obio una-isɔŋ, ye ofuri isɔŋ Sihon ɔbɔŋ mme-Amorite, emi akadade ubɔŋ ke Heshbon, emi Moses akasuande ye mbɔŋ Midian, kpa Evi, ye Rekem, ye Zur, ye Hur, ye Reba, ikpɔ owo Sihon, emi ekeduŋde isɔŋ oro.

²² Nditɔ Israel enyuŋ ewot Balaam eyen Beor abia-idiɔŋ ke ofut ke otu mmɔ eke ekpaŋade afai.

²³ Ndien adaŋa nditɔ Reuben edi Jordan kpa mben esie. Emi edi udeme nditɔ Reuben, nte mme ubon mmɔ esaŋade, kpa mme obio mmɔ ye mme obio iŋwaŋ mmɔ.

²⁴ Moses onyuŋ ada udeme ɔnɔ esien Gad, kpa nditɔ Gad ŋko, ke ubon, ke ubon.

²⁵ Ndien adaŋa mmɔ edi Jazer, ye kpukpru obio Gilead, ye ubak isɔŋ nditɔ Ammon, tutu osim ke Aroer emi asakde iso ese Rabbah;

²⁶ onyuŋ ɔtɔŋɔde ke Heshbon ada osim Ramath - mizpeh, ye Betonim; onyuŋ ɔtɔŋɔde ke Mahanaim ada osim adaŋa Debir;

²⁷ ye Beth-haram, ye Beth-nimrah; ye Succoth, ye Zaphon, ke itihere ubak isɔŋ Sihon ɔbɔŋ Baashan emi ɔsuhɔde, Jordan ye mben esie, tutu osim ke utit inyaŋ Chinnereth ke edem Jordan oko ke usiaha-utin.

²⁸ Emi edi udeme nditɔ Gad, ke ubon, ke ubon, mme obio mmɔ, ye mme obio iŋwaŋ mmɔ.

²⁹ Moses onyuŋ ada udeme ɔnɔ ubak esien Manasseh ŋko: ndien ubak nditɔ Manasseh eda ntem ke ubon, ke ubon.

³⁰ Ndien adaŋa mmɔ ɔtɔŋɔ ke Mahanaim, ofuri Bashan, kpa ofuri isɔŋ Og ɔbɔŋ Bashan; ndien kpukpru ŋkpri obio Jair, emi edude ke Bashan, obio ata;

³¹ ye ubak Gilead, ye Ashtaroth, ye Edrei, obio emi Og akadade ubɔŋ mmɔ ke Bashan, enyene nditɔ Mashir eyen Manasseh, kpa ubak nditɔ Machir, ke ubon, ke ubon.

³² Mme mmɔ emi ke Moses ɔnɔ mmɔ udeme ke una-isɔŋ Moab, ke edem Jordan oko, ekpere Jericho,

³³ ke edem usiaha-utin. Edi Moses inɔŋɔ esien mme Levite baba udeme kiet; edi Jehovah Abasi Israel edi udeme mmɔ, kpa nte enye ɔkɔdɔhɔde mmɔ.