JOSHUA 11 - Edisana ñwed Abasi Ibom

Nditɔ Israel Ekan Jabin ye Kpukpru Mmɔ Emi Esaŋade ye Enye

¹ EDIKEM adaŋemi Jabin ɔbɔŋ Hazor okopde, enye ɔdɔŋ utom ke ɔtɔ Jobab, ɔbɔŋ Madon, ye ke ɔtɔ ɔbɔŋ Shimron, ye ke ɔtɔ ɔbɔŋ Hehshaph,

² ye ke ɔtɔ mbɔŋ emi edude ke edem obot edere-edere, ye ke una-isɔŋ ke edem usuk Chinneroth, ye ke unaisɔŋ edem inyaŋ, ye ke obot Dor ke edem usop-utin,

³ ye ke ɔtɔ mme Canaanite ke edem usiaha-utin, ye ke edem usop-utin, ye ke ɔtɔ mme Amorite, ye eke mme Hittite, ye eke mme Perizzite, ye eke mme Jebusite, ke ikpɔ obot, ye ke ɔtɔ mme Hivite ke ukot Hermon ke isɔŋ Mizpah.

⁴ Ndien mmɔ ewɔŋɔ ye kpukpru mbon ekɔŋ mmɔ ŋko, ata ediwak owo, ebiet ntan emi odude ke mben inyaŋ ke uwak, ye ata ediwak horse ye chariot.

⁵ Ndien kpukpru mbɔŋ emi esop idem eka ekenam nna ekɔŋ ke ɔtɔ kiet ke mben mmɔŋ Merom, ete iŋwana ekɔŋ ye Israel.

⁶ Ndien Jehovah ɔdɔhɔ Joshua ete, Kufehe ndik ubaŋa mmɔ: koro ke adaŋemi ini ntem mkpɔŋ ke ami ndida mmɔ kpukpru ŋwot nnim ke iso Israel; afo eyekpok mme horse mmɔ akpan osip, onyuŋ ɔfɔp mme chariot mmɔ ke ikaŋ.

⁷ Ekem Joshua edi ye kpukpru mbon-ekɔŋ ŋko, edibuat mmɔ ke mben mmɔŋ Merom; ndien mmɔ ebumere eyi ye mmɔ.

⁸ Ndien Jehovah emen mmɔ esin Israel ke ubɔk, ndien mmɔ ewot mmɔ, enyuŋ ebine mmɔ tutu esim ke akwa Zidon, ye ke Misrephoth-maim, ye ke itihere Mizpeh ke edem usiaha-utin; enyuŋ ewot mmɔ, tutu isuhɔke baba nsuhɔ kiet inɔ mmɔ.

⁹ Ndien Joshua anam mmɔ kpa nte Jehovah ɔkɔdɔhɔde enye: okpok mme horse mmɔ akpan osip, onyuŋ ɔfɔp mme chariot mmɔ ke ikaŋ.

¹⁰ Ndien ke ini oro Joshua afiak akada Hazor, onyuŋ owot ɔbɔŋ mmɔ ke ofut: koro Hazor ekebemde iso edi etubom kpukpru mme idut oro.

¹¹ Enye onyuŋ ada iso ofut owot kpukpru owo emi edude ke esit, osobo mmɔ fap: baba kiet eke eduɔkde ibifik isuhɔke: enye onyuŋ ɔfɔp Hazor ke ikaŋ.

¹² Ndien Joshua ada kpukpru obio mbɔŋ oro, ye kpukpru mbɔŋ mmɔ, onyuŋ owot mmɔ ke iso ofut, osobo mmɔ fap, kpa nte Moses owo Jehovah okowukde.

¹³ Edi ama edi kpukpru obio emi edade ke ŋkokoŋo obot mmɔ, Israel ifɔpke mmɔ, ibɔhɔke Hazor ikpɔŋ-ikpɔŋ ke Joshua ɔkɔfɔp.

¹⁴ Ndien nditɔ Israel ebume kpukpru mbume obio oro ye ufene, eda ke idem mmɔ; edi mmɔ ewot kpukpru owo ke iso ofut, tutu esobo mmɔ, isuhɔke baba ŋkpɔ kiet eke ɔduɔkde ibifik.

¹⁵ Kpa nte Jehovah eketemede Moses owo esie, ntre ke Moses onyuŋ eteme Joshua, kpa ntre ŋko ke Joshua onyuŋ anam; enye ikpɔŋke baba ŋkpɔ kiet ke kpukpru se Jehovah eketemede Moses.

¹⁶ Ntem ke Joshua ada ofuri edem oro, ye ikpɔ obot, ye ofuri edem usuk, ye ofuri isɔŋ Goshen, ye una-isɔŋ edem inyaŋ, ye itihere Jordan, ye ikpɔ obot Israel, ye isɔŋ edem inyaŋ esie;

¹⁷ ɔtɔŋɔde ke obot Halak (Ibɔ) emi ɔdɔkde aka Seir, tutu osim Baal-gad ke itihere Lebanon ke ukot obot Hermon: enye onyuŋ omum kpukpru mbɔŋ mmɔ, onyuŋ ɔtɔ mmɔ owot.

¹⁸ Joshua aŋwana ekɔŋ ye kpukpru mbɔŋ oro ediwak usen.

¹⁹ Baba owo kiet eke ɔkɔŋɔde mfaŋ ɔnɔ Israel ikoduhe, ibɔhɔke mme Hivite emi eduŋde ke Gibeon: mmɔ eda kpukpru ke ekɔŋ.

²⁰ Koro okotode Jehovah, maan enye ɔsɔŋ mmɔ esit ndiŋwana ekɔŋ ye Israel, man enye osobo mmɔ, kpa nte Jehovah eketemede Moses.

²¹ Ke ini oro Joshua onyuŋ edi edikpok nditɔ Anak ke ikpɔ obot, ke Hebron, ye ke Debir, ye ke Anab, ye ke kpukpru obot Judah, ye ke kpukpru obot Israel, efep: Joshua osobo mmɔ ye obio mmɔ.

²² Isuhɔke baba eyen Anak kiet ke isɔŋ nditɔ Israel: edi esuhɔ ke Gaza, ye ke Gath, ye ke Ashdod:

²³ Ntem ke Joshua ada ofuri edem oro, ekem ke kpukpru se Jehovah ɔkɔdɔhɔde Moses; ndien Joshua ada enye ɔnɔ Israel ke udeme, nte mbak mmɔ ye esien mmɔ edide: ndien isɔŋ ɔduɔk odudu ekɔŋ.