JONAH 3 - Edisana ñwed Abasi Ibom

Jonah Anam Uyo Abasi Ndien Ofuri Obio Nineveh Ewɔŋɔde Ekpɔŋ Idiɔk Ido Mmɔ

¹ EKEM uyo Jehovah ɔtɔŋɔ ntak osim Jonah, ete, Daha ke enyɔŋ,

² ka ke Nineveh akamba obio oro, nyuŋ kwɔrɔ uyo oro ami ŋkɔdɔhɔde fi baŋa enye.

³ Ndien Jonah adaha ke enyɔŋ, aka ke Nineveh ke uyo Jehovah. Ndien Nineveh edi ata akamba obio eti-eti, ekem isaŋ usen ita.

⁴ Ndien Jonah ɔtɔŋɔ ndiduk ke obio isaŋ usen kiet; ndien enye ɔkwɔrɔ onyuŋ ɔdɔhɔ, ete, Osuk kaŋa usen aba, ndien Nineveh eyebiara.

⁵ Ndien mbio-obio Nineveh enim uyo Abasi ke akpan-ikɔ; ndien mmɔ ewuk utre-udia, enyuŋ esine ɔfɔŋ-ikpo ke idem, ɔtɔŋɔde ke ikpɔ tutu osim ŋkpri.

⁶ Ndien ke adaŋemi uyo oro osimde edidem Nineveh, enye adaha ke ebekpo esie, onyuŋ osio ɔfɔŋ-idem esie ke idem efep, ndien esine ɔfɔŋ-ikpo, onyuŋ ɔsuhɔre etie ke ntɔŋ.

⁷ Ndien enye esin owo etaŋa ke Nineveh, enyuŋ edɔhɔ, ke ewuhɔ edidem ye ikpɔ owo esie, ete, Ekuyak owo ye ufene, ye enaŋ ye ŋkpri ufene etabi baba ŋkpɔ kiet, ekunyuŋ edia ŋkpɔ, ekunyuŋ eŋwɔŋ mmɔŋ:

⁸ edi yak owo ye ufene esine ɔfɔŋ-ikpo ke idem, enyuŋ eseme enɔ Abasi ɔkpɔsɔŋ; yak kpukpru owo enyuŋ ekpɔŋ idiɔk ido mmɔ, ye afai eke odude mmɔ ke ubɔk efiak edem.

⁹ Anie owo ɔfiɔk mme Abasi eyewɔŋɔre onyuŋ akabare esit, onyuŋ adahado ke ikaŋ iyaresit esie, man nnyin ikutak.

¹⁰ Ndien Abasi okut se mmɔ enamde, koro mmɔ ekpɔŋde mme idiɔk ido mmɔ efiak edem; Abasi onyuŋ akabare esit ke idiɔk-ŋkpɔ oro enye ɔkɔdɔhɔde, ete ke imɔ iyenam mmɔ; ndien etre, inamke.