JONAH 2 - Edisana ñwed Abasi Ibom

Ŋkpe-Ubɔk Jonah ye Ekɔm Emi Enye Ɔkɔnɔde Abasi ke Ndinyaŋa Enye Nsio ke Idibi Iyak

¹ NDIEN Jonah odu iyak oro ke idibi ekpe Jehovah Abasi esie ubɔk, onyuŋ ɔdɔhɔ, ete,

² Ukut mi esin mi mfiori ŋkot Jehovah, ndien Enye eyere mi; ndu ke idibi udi nseme, ndien afo okop uyo mi.

³ Ndien afo ɔmɔduɔk mi ke udem, ke ufɔt inyaŋ, ndien akpa mmɔŋ akan mi okuk: kpu-kpru odut fo ye mbufut fo etɔ efuk mi.

⁴ Ndien ami ndɔhɔ, nte, Ememen mi efep ke iso fo eduɔk; edi nyesuk nse edisana temple fo.

⁵ Mmɔŋ afat mi tutu osim ukpɔŋ udem akan mi okuk, ikɔŋ esit inyaŋ ayara mi ke ibuot.

⁶ Nsuhɔre nsim oruŋ ikpɔ obot; isɔŋ ada eto usin-usuŋ esie abaha mi ke nsinsi: edi afo, O Jehovah Abasi mi eyesio uwem mi ke obube efep.

⁷ Adaŋemi ukpɔŋ akpade mi ke idem, nti Jehovah: ndien mkpeubɔk mi osim fi ke edisana temple fo.

⁸ Mmɔ eke enimde nsu-nsu ye ikpikpu ŋkpɔ eduɔk mfɔn mmɔ.

⁹ Ndien ami nyeda uyo ekɔm ŋwa uwa nnɔ fi; nyesio se ŋkakaŋade. Erinyaŋa enyene Jehova.

¹⁰ Ndien Jehovah ɔdɔhɔ iyak oro, ndien iyak ɔkpɔhi Jonah ɔduɔk ke obot.