JONAH 1 - Edisana ñwed Abasi Ibom

Jonah Eneni Uyo Abasi Onyuŋ Efeghe Ɔkpɔŋ Iso Esie

¹ EDIKEM uyo Jehovah osim Jonah eyen Amittai, ete,

² Daha ke enyɔŋ ka ke Nineveh akwa obio oro, nyuŋ kwɔrɔ baŋa enye, koro idiɔk ido mmɔ ɔmɔdɔk edi ke iso mi.

³ Ndien Jonah adaha ke enyɔŋ, ete ifehe ika Tarshish, ikpɔŋ iso Jehovah, ndien enye ɔsuhɔre aka Joppa, okokut ubom mbakara kiet emi oyomde ndika Tarshish; ndien enye ɔnɔ utip ubom, onyuŋ ediere ke esit, ete itiene mmɔ ika Tarshish, ikpɔŋ iso Jehovah.

⁴ Ndien Jehovah ɔdɔŋ akwa ofum utom ke inyaŋ, akamba oyobio onyuŋ odu ke inyaŋ, ndien etie nte ubom ɔmɔŋ ediwure.

⁵ Ndien mbon ubom efehe ndik, kpukpru mmɔ enyuŋ efiori ekot abasi mmɔ, enyuŋ esioŋo ŋkpɔ eke edude ke ubom eduɔŋɔ ke inyaŋ, man ebiomore mmɔ enam ubom efere. Ndien Jonah ama ɔsuhɔre ke esit ubom, onyuŋ ana ede ɔkpɔsɔŋ idap.

⁶ Ndien etubom asaŋa ekpere enye, onyuŋ ɔdɔhɔ enye, ete, Nsinam afo edede ɔkpɔsɔŋ idap ntem? daha ke enyɔŋ, fiori kot Abasi fo, mme Abasi eyekere nnyin, man ikutak.

⁷ Ndien mmɔ edɔhɔ kiet ye kiet, ete, Ekam eyeak nnyin isin afia ifiɔk owo eke idiɔk ŋkpɔ emi otibede ɔnɔ nnyin abaŋa enye. Ndien adaŋemi mmɔ esinde afia, afia otip Jonah.

⁸ Ndien mmɔ edɔhɔ enye, ete, Mbɔk, wut nnyin se inamde idiɔk ŋkpɔ emi otibe ɔnɔ nnyin. Nsidi ubɔk utom fo? Afo onyuŋ oto mmɔŋ? Idut mbufo edi ewe? Afo onyuŋ oto ke obio ewe?

⁹ Ndien enye ɔbɔrɔ mmɔ, ete, Ami ndi eyen Hebrew; ami nnyuŋ mbak Jehovah Abasi enyɔŋ, emi akanamde inyaŋ ye obot.

¹⁰ Ndien mbon oro efehe akwa ndik eti-eti, enyuŋ ebup enye, ete, Nso ke afo anam emi? Koro mmɔ ekefiɔkde ete ke enye eke-fehe ɔkpɔŋ iso Jehovah, koro enye akasiande mmɔ.

¹¹ Ndien mmɔ ebup enye, ete, Nnyin idinam fi didie, man inyaŋ ɔsuhɔ ɔnɔ nnyin? Koro inyaŋ ɔdiɔŋde diɔŋ adama aka iso.

¹² Ndien enye ɔbɔrɔ mmɔ, ete, Mbufo emen mi etop ke inyaŋ, ndien inyaŋ eye-suhɔ ɔnɔ mbufo: koro ami mmɔfiɔk nte ke akamba oyobio emi anam mbufo abaŋa mi.

¹³ Ndien mbon oro ewat, ete ifiak edem isim obot; edi akak mmɔ: koro inyaŋ ɔdiɔŋde diɔŋ adama anam mmɔ aka iso.

¹⁴ Ndien mmɔ efiori ekot Jehovah, enyuŋ edɔhɔ enye, ete, Mbɔk, O Jehovah, kuyak nnyin itak ibaŋa uwem owo emi, kunyuŋ udori nnyin iyip owo eke miduehe isop: koro afo, O Jehovah, amanam kpa nte afo amade.

¹⁵ Ndien mmɔ emen Jonah, enyuŋ etop enye esin ke inyaŋ; ndien inyaŋ odop, idamake aba.

¹⁶ Ndien mbon oro efehe Jehovah akwa ndik eti-eti, enyuŋ ewa uwa enɔ Jehovah, enyuŋ ekaŋa ekaŋa.

¹⁷ Ndien Jehovah ama okonim akamba iyak kiet, ete, emen Jonah esin ke idibi. Ndien Jonah odu iyak oro ke idibi ke uwemeyo ita ye okoneyo ita.