JOHN 8 - Edisana ñwed Abasi Ibom

Ŋwan Emi Ekemumde Ke Efibe

¹ Edi Jesus aka ke Obot Olive.

² Edi ke ŋkim-ŋwaŋa usenubɔk Enye afiak edi ke temple, kpukpru mbio-obio enyuŋ etiene Enye; ndien Enye ɔsuhɔre etetie ekpep mmɔ ŋkpɔ.

³ Pharisee eda ŋwan emi ekemumde enye ke efibe edi; ndien ke ini ema ekewuk ŋwan oro ke ufɔt, mmɔ edɔhɔ Jesus ete,

⁴ Andikpep, ekemum ŋwan emi ke efibe, kpa ke idem itie.

⁵ Edi Moses eteme nnyin ke ibet, ete, itɔŋɔ oruk owo emi ke itiat: Afo ɔdɔhɔ didie abaŋa enye ndien?

⁶ Mmɔ edɔhɔ ntem ndidomo Enye, man mmɔ enyene se ekpedade edori Enye. Edi Jesus ɔnuhɔ, ada nnuenubɔk ewet ŋkpɔ ke isɔŋ.

⁷ Edi ke ini mmɔ eyirede ebup Enye, Enye eneŋere etie, onyuŋ ɔdɔhɔ mmɔ ete, Yak owo ke otu mbufo emi ananade idiɔk-ŋkpɔ ebem iso emen itiat ɔtɔ enye.

⁸ Ndien Enye ɔtɔŋɔ ntak ɔnuhɔ ada nnuenubɔk ewet ŋkpɔ ke isɔŋ.

⁹ Edi ke ini mmɔ ekopde ibɔrɔ emi, mmɔ ewɔŋɔ kiet kiet, ɔtɔŋɔde ke ebiowo tutu osim ukperedem; ndien eyesuk Jesus ikpɔŋ, ye ŋwan oro ke ɔtɔ nte enye adade ke ufɔt.

¹⁰ Edi Jesus eneŋere etie, onyuŋ ɔdɔhɔ enye ete, Ŋwan owo, mmɔ emi edoride fi ikɔ edu mmɔŋ? Nte baba owo kiet itipke fi ikpe?

¹¹ Enye ete, baba owo kiet, Ɔbɔŋ. Jesus ɔdɔhɔ enye ndien ete, Ami nnyuŋ ntipke fi ikpe; nyɔŋ okuo; kunam aba idiɔk-ŋkpɔ.

¹² Ntre ke Jesus ɔtɔŋɔ ntak etiŋ ɔnɔ mmɔ, ete, Ami ndi uŋwana ererimbot; owo eke etienede Mi idisaŋake ke ekim, edi eyenyene uŋwana uwem.

¹³ Ntem ke mme Pharisee ete, Enye, Afo edi ntiense ɔnɔ Idem Fo; ikɔ-ntiense Fo idige akpanikɔ.

¹⁴ Jesus ɔbɔrɔ mmɔ ete, Ami ŋkpededi ntiense nnɔ Idem Mi, ikɔ-ntiense Mi edi akpanikɔ; koro mmɔfiɔk ebiet emi ntode, ye ebiet emi ŋkade: edi mbufo ifiɔkke ebiet emi ntode, ye ebiet emi ŋkade.

¹⁵ Mbufo ebiere ŋkpɔ ke ido obukidem; Ami mbiereke ikpe baba owo kiet.

¹⁶ Onyuŋ edieke Ami mbierede-biere, ubiere-ikpe Mi edi ata ikpe; koro mmenduhe ikpɔŋ, edi Ami ye Enye emi ɔkɔdɔŋde Mi.

¹⁷ Ŋko ewet ke ibet mbufo ete, ikɔ-ntiense ke inua owo iba edi akpanikɔ.

¹⁸ Ami ndi ntiense nnɔ Idem Mi, Ete emi ɔkɔdɔŋde Mi onyuŋ edi ntiense ɔnɔ Mi.

¹⁹ Ntem ke mmɔ edɔhɔ Enye ete, Ete Fo odu mmɔŋ? Jesus ɔbɔrɔ ete, Mbufo ifiɔkke Mi, inyuŋ ifiɔkke Ete Mi. Edieke mbufo ekpefiɔkde Mi, mbufo ekpenyuŋ efiɔk Ete Mi.

²⁰ Enye eketiŋ ikɔ ke ubet unim-ŋkpɔ, nte Enye ekpepde owo ŋkpɔ ke temple: edi baba owo kiet imumke Enye, koro ini mikemke Enye kaŋa.

²¹ Ntre ke Jesus ɔtɔŋɔ ntak ɔdɔhɔ mmɔ ete, Ami mmɔŋ ndinyɔŋ, ndien mbufo eyeyom Mi, edi eyekpaŋa ke mme idiɔk-ŋkpɔ mbufo; ɔtɔ nte Ami ŋkade, mbufo ikemeke ndika do.

²² Ntem ke mme Jew edɔhɔ ete, Nte Enye ediwot idem, esin Enye ɔdɔhɔ ete, Ɔtɔ nte Ami ŋkade, mbufo ikemeke ndika do?

²³ Enye ɔdɔhɔ mmɔ ete, Mbufo eto ke isɔŋ, Ami nto ke enyɔŋ: mbufo edi mbon ererimbot emi, Ami ndige owo ererimbot emi.

²⁴ Mmɔdo ndɔhɔ mbufo nte, Mbufo eyekpaŋa ke mme idiɔk-ŋkpɔ mbufo. Koro ke mbufo minimke ke akpanikɔ ite Ami ndi Enye, mbufo eyekpaŋa ke mme idiɔk-ŋkpɔ mbufo.

²⁵ Ntem ke mmɔ ete Enye, Afo edi anie? Jesus ete mmɔ, Nsinam ŋkpetetiŋ ikɔ ekededi ye mbufo?

²⁶ Mmenyene ediwak ŋkpɔ nditiŋ nnyuŋ mbiere mbaŋa mbufo: edi Andidɔŋ Mi edi akpanikɔ; ndien se Ami ŋkokopde Enye ke inua, ŋkpɔ oro ke ntetiŋ nnɔ ererimbot.

²⁷ Mmɔ ifiɔkke ite Enye ɔdɔhɔ ye mmimɔ abaŋa Ete.

²⁸ Ntre ke Jesus ɔdɔhɔ mmɔ ete, Ke ini mbufo edimenerede Eyen Owo ke enyɔŋ, adaŋoro ke mbufo edifiɔk ete Ami ndi Enye nnyuŋ nnamke ŋkpɔ oto Idem Mi, edi kpa nte Ete ekekpepde Mi, kpa ntre ke ntetiŋ.

²⁹ Andidɔŋ Mi onyuŋ odu ye Ami: Enye ikɔkpɔŋke Mi ikpɔŋ; koro Ami nnamde se inemde Enye esit kpukpru ini.

³⁰ Ke adaŋemi Enye etiŋde ntem, ediwak owo ebuɔt idem ye Enye.

³¹ Ntre ke Jesus ɔdɔhɔ mme Jew oro enimde Enye ke akpanikɔ ete, Edieke mbufo esɔŋɔde eda ke ikɔ Mi, mbufo edi mbet Mi ke akpanikɔ:

³² ndien mbufo eyefiɔk akpanikɔ, akpanikɔ eyenyuŋ anam mbufo ewɔrɔ ufin.

³³ Mmɔ ebɔrɔ Enye ete, Nnyin idi nditɔ Abraham; akanam nnyin idukke ufin inɔ baba owo kiet. Nsinam ɔdɔhɔde ndien ete, Mbufo eyewɔrɔ ufin?

³⁴ Jesus ɔbɔrɔ mmɔ ete, Ke akpanikɔ ke ndɔhɔ mbufo, kpukpru owo eke anamde idiɔk-ŋkpɔ edi ofin idiɔk-ŋkpɔ.

³⁵ Edi ofin iduŋke ke ufɔk ke nsinsi: eyen ke oduŋ ke nsinsi.

³⁶ Edieke Eyen edinamde mbufo ndien ewɔrɔ ufin, mbufo eyewɔrɔ ufin ke akpanikɔ.

³⁷ Mmɔfiɔk nte mbufo edi nditɔ Abraham: edi mbufo eyom Mi ndiwot, sia ikɔ Mi minyeneke itie ke esit mbufo.

³⁸ Ami mmen se ŋketiede ye Ete Mi ŋkut ntiŋ; mbufo ŋko enam se ekekopde ke inua ete mbufo.

³⁹ Mmɔ ebɔrɔ Enye ete, Ete nnyin edi Abraham. Jesus ɔdɔhɔ mmɔ ete, Edieke mbufo ekpedide nditɔ Abraham, mbufo ekpanam ubɔk-utom Abraham.

⁴⁰ Edi ke emi mbufo eyom Mi ndiwot, kpa owo emi ŋkasiande mbufo akpanikɔ eke ŋkokopde ke inua Abasi: Abraham ikanamke ntem.

⁴¹ Mbufo enanam ubɔk-utom ete mbufo. Mmɔ ete Enye, Nnyin idige nditɔ akpara: nnyin inyene ete kiet kpɔt kpa Abasi.

⁴² Jesus ete mmɔ, Edieke Abasi ekpedide Ete mbufo, mbufo ekpema Mi: koro Ami ŋkoto ke Abasi ŋwɔrɔ ndi; ŋkonyuŋ ndige ke odudu Idem Mi, edi Enye ɔkɔdɔŋ Mi.

⁴³ Nsinam mbufo mifiɔkke se ikɔ Mi ɔwɔrɔde? Oto koro mbufo mikemeke ndikop uyo Mi.

⁴⁴ Mbufo edi nditɔ ete mbufo, kpa Satan, enyuŋ eyom ndinam obukpo udɔŋ ete mbufo. Enye edi owot-owo toto ke eritɔŋɔ, ikonyuŋ isɔŋɔke ida ke akpanikɔ, koro enye minyeneke akpanikɔ ke esit esie. Ke ini enye osude nsu, enye osio se idude ke esit etiŋ: koro enye edi osunsu, ye ete nsu.

⁴⁵ Edi sia ntiŋde akpanikɔ nnɔ mbufo, mbufo inimke ikɔ Mi ke akpanikɔ.

⁴⁶ Ewe owo ke otu mbufo ekeme ndiwut idiɔk-ŋkpɔ eke nnamde? Edieke ntiŋde akpanikɔ, nsinam mbufo minimke ikɔ Mi?

⁴⁷ Enye eke edide owo Abasi okop ikɔ Abasi; sia mbufo midige ikɔt Abasi, emi esin mbufo ekukop.

⁴⁸ Mme Jew ebɔrɔ Enye ete, Nte nnyin ineŋekere idɔhɔ ite Afo edi owo Samaria, idat onyuŋ anam Fi?

⁴⁹ Jesus ɔbɔrɔ mmɔ ete, Idat inamke Mi; edi ŋkpono Ete Mi, mbufo enyuŋ esuene Mi.

⁵⁰ Edi Ami nyomke ubɔŋ Idem Mi. Kiet odu emi oyomde ubɔŋ ɔnɔ Mi, edinyuŋ ebierede ikɔ ɔnɔ mbufo.

⁵¹ Ke akpanikɔ ke ndɔhɔ mbufo, Edieke owo onimde ikɔ Mi, enye idikpaha mkpa ke nsinsi.

⁵² Mme Jew ete Enye, Ke emi nnyin imɔfiɔk ite idat ke anam Fi. Abraham ama akpa ye mme prophet; edi Afo ete, Edieke owo onimde ikɔ Mi, enye iditabike mkpa ke nsinsi.

⁵³ Nte Afo omokpon akan ete nnyin Abraham, emi ama akpa? mme prophet ema enyuŋ ekpaŋa: Afo ononim idem ete idi anie?

⁵⁴ Jesus ɔbɔrɔ ete, Edieke Ami ŋkpadade ubɔŋ nnɔ Idem Mi, ubɔŋ Mi idige baba ŋkpɔ kiet. Edi Enye emi mbufo edɔhɔde ete, Enye edi Abasi mme imɔ;

⁵⁵ ndien mbufo ikɔfiɔkke Enye; edi Ami mmɔfiɔk Enye. Edieke ŋkpɔdɔhɔde nte, Mfiɔkke Enye, nyedi osu-osu nte mbufo: edi Ami mmɔfiɔk Enye, nnyuŋ nnim ikɔ Esie.

⁵⁶ Ete mbufo Abraham akadat esit ndikut eyo Mi; enye okokut onyuŋ adat esit.

⁵⁷ Mme Jew ete Enye, Udaŋke kaŋa isua aba ye duop; nte Afo okokut Abraham ndien?

⁵⁸ Jesus ɔbɔrɔ mmɔ ete, Ke akpanikɔ ke ndɔhɔ mbufo nte, Ami ndudu ndien Abraham edimana.

⁵⁹ Do mmɔ etaŋ itiat ete itɔ Enye: edi Jesus odibe ɔwɔrɔ ke temple.