JOHN 2 - Edisana ñwed Abasi Ibom

Usɔrɔ Ndɔ ke Obio Cana

¹ EKEM ke ɔyɔhɔ usen ita edɔ ndɔ ke Cana ke Galilee;

² ndien eka Jesus odu do; enyuŋ ekot Jesus ŋko ye mbet Esie, ete edi ndɔ.

³ Ndien ke ini wine ananade, eka Jesus ete Enye, Mmɔ inyeneke wine.

⁴ Jesus ete enye, Ŋwan owo, Ami nsaŋa didie ye afo? Ini Mi ikemke kaŋa.

⁵ Eka Esie ɔdɔhɔ mme asaŋutom ete, Enam se Enye edidɔdɔhɔ mbufo.

⁶ Abaŋ mmɔŋ itiokiet, eke ebotde ke itiat, ediɔhɔ do, nte asaŋade ekem ye ido ŋkeŋ-idem mme Jew; ŋkpɔ nte gallon mmɔŋ edip esine ke abaŋ kiet.

⁷ Jesus ɔdɔhɔ mmɔ ete, Esin mmɔŋ ke mme abaŋ emi ɔyɔhɔ. Mmɔ esin mmɔŋ ɔyɔhɔ osim inua.

⁸ Ekem Enye ɔdɔhɔ mmɔ ete, Ekoi naŋa, eda esɔk etubom udia. Mmɔ eda esɔk enye.

⁹ Edi ke ini etubom udia atabide mmɔŋ oro akabarede edi wine, minyuŋ ifiɔkke ebiet eke wine oro otode (edi mme asaŋutom emi ekokoide mmɔŋ efiɔk), etubom udia okot ebe-ndɔ, onyuŋ ɔdɔhɔ enye ete,

¹⁰ Kpukpru owo ebem iso ɔnɔ owo eti wine; ndien ke ini mme owo ema ekeŋwɔŋ ediwak, ɔnɔ mmɔ se mifɔnke ikan; afo omomum eti wine onim tutu osim emi.

¹¹ Jesus akanam akpa idiɔŋɔ emi ke Cana ke Galilee, ayarare ubɔŋ Esie; mbet Esie enyuŋ ebuɔt idem ye Enye.

¹² Ke ŋkpɔ emi ama ekebe, Jesus ye eka Esie, ye nditɔ-eka Esie, ye mbet Esie, esuhɔre eka ke Capernaum ekedu do ndusuk usen.

Jesus Aka Ebiet Ntuahibuot

¹³ Passover mme Jew ekpere, ndien Jesus ɔdɔk aka Jerusalem.

¹⁴ Enye onyuŋ okut mme anyam enaŋ ye erɔŋ ye ibiom nte ebonode do ke temple, ye mme ɔkpuhɔ-okuk nte etiede do.

¹⁵ Ndien Enye ada uruk anam ikpa, ebin mmɔ kpukpru, ye erɔŋ ye enaŋ, ewɔŋɔ ke temple; onyuŋ aŋwaŋa okuk mme ɔkphɔ-okuk ɔduɔk, onyuŋ onuk mme okpo-koro mmɔ ɔduɔk;

¹⁶ onyuŋ ɔdɔhɔ mme anyam-ibiom ete, Etaŋ ŋkpɔ emi enyɔŋɔ; ekunim ufɔk Ete Mi ke ufɔk mbubine.

¹⁷ Mbet Esie eti ete ema ewet ete, Ufup ufɔk Fo eyedia mi.

¹⁸ Ntre ke mme Jew ebɔrɔ Enye ete, Owut nnyin nso idiɔŋɔ emi Afo anamde ŋkpɔ emi?

¹⁹ Jesus ɔbɔrɔ mmɔ ete, Ewuri temple emi, ndien nyediɔŋ enye ke usen ita.

²⁰ Ntre ke mme Jew ete Enye, Ekada isua aba ye itiokiet ebɔp temple emi; nte Afo eyediɔŋ enye ke usen ita?

²¹ Edi Enye etiŋ abaŋa temple ikpɔhidem Esie.

²² Mmɔdo ke ini Enye esetde ke mkpa, mbet Esie eti ete Enye ama eketiŋ ntre; mmɔ enyuŋ enim ŋwed Abasi ye ikɔ emi Jesus etiŋde ke akpanikɔ.

²³ Edi ke ini Enye odude ke Jerusalem ke usɔrɔ passover, ediwak owo ebuɔt idem ke enyiŋ Esie, ke emi mmɔ ekutde mme idiɔŋɔ eke Enye anamde.

²⁴ Edi Jesus iduɔkke idem inɔ mmɔ;

²⁵ koro Enye ɔfiɔkde kpukpru owo, minyuŋ iyomke baba owo kiet etiŋ ɔnɔ Enye abaŋa owo; koro Enye ke Idem Esie ɔfiɔkde se idude owo ke esit.