JOHN 17 - Edisana ñwed Abasi Ibom

Jesus Ɔbɔŋ Akam Ɔnɔ Mbet Esie

¹ JESUS etiŋ mme ikɔ emi; ndien emenere enyin ese enyɔŋ, onyuŋ ɔdɔhɔ ete, Ete, ini emedi; nɔ Eyen Fo ubɔŋ, man Eyen Fo ɔnɔ Fi ubɔŋ;

² kpa nte ama ɔkɔnɔ Enye odudu ndikara kpukpru obukidem, ete akpada nsinsi uwem ɔnɔ owo ekededi eke Afo ayakde ɔnɔ Enye.

³ Ndien nsinsi uwem oro edi ndifiɔk Fi, ata Abasi kierakiet, ye Enye emi Afo ɔkɔdɔŋde, kpa Jesus Christ.

⁴ Ami mma nnɔ Fi ubɔŋ ke isɔŋ, ke emi ŋkanamde utom eke Afo ɔkɔnɔde Mi nnam.

⁵ Ndien ke emi, Ete, da ubɔŋ, eke ŋkenyenede ye Afo ndien ererimbot edidu, nɔ Mi.

⁶ Mma nyarare enyiŋ Fo nnɔ mme owo emi okosiode ke ererimbot ɔnɔ Mi; mmɔ ekedi Okuo, Afo okonyuŋ ayak mmɔ ɔnɔ Mi,

⁷ mmɔ ema enyuŋ enim mme ikɔ Fo. Idahaemi mmɔ efiɔk ete kpukpru ŋkpɔ ekededi eke Afo ɔkɔnɔde Mi eto Fi:

⁸ koro mmayak mme ikɔ emi ɔkɔnɔde Mi nnɔ mmɔ: mmɔ ekɔbɔ mme ikɔ oro, enyuŋ eneŋere efiɔk ete ŋkoto ke ɔtɔ Fo ŋwɔrɔ, enyuŋ enim ke akpanikɔ ete edi Afo ɔkɔdɔŋ Mi.

⁹ Mmebeŋe Fi mbaŋa mmɔ, mbeŋeke mbaŋa ererimbot, edi mbeŋe mbaŋa mmɔ oro ɔkɔnɔde Mi: koro mmɔ edi Okuo:

¹⁰ ndien kpukpru se idide Okim edi Okuo, se idide Okuo onyuŋ edi Okim: mmonyuŋ nnyene ubɔŋ ke mmɔ.

¹¹ Ndiduhe aba ke ererimbot, ndien mmɔ edu ke ererimbot, ndien Ami ke nnyɔŋ ntiene Fi. Edisana Ete, da enyiŋ Fo kama mmɔ emi ɔkɔnɔde Mi, man mmɔ edi kiet, kpa nte nnyin idide kiet.

¹² Ke adaŋemi ŋkodude ye mmɔ, Ami mma nda enyiŋ Fo ŋkama mmɔ emi Afo ɔkɔnɔde Mi; mma nnyuŋ ŋkpeme mmɔ, ndien baba owo mmɔ kiet ikatakke, ke mibɔhɔke eyen nsobo; man se ewetde osu.

¹³ Edi ke emi mmɔŋ nnyɔŋ ntiene Fi; ndien ntiŋ mme ŋkpɔ emi ke ererimbot, man mmɔ enyene idaresit Mi ɔyɔhɔ-ɔyɔhɔ ke esit mmɔ.

¹⁴ Ami ŋkayak ikɔ Fo nnɔ mmɔ; ndien ererimbot asasua mmɔ, koro mmɔ midige eke ererimbot, kpa nte ami mmendige eke ererimbot.

¹⁵ Mbeŋeke nte Afo osio mmɔ ke ererimbot efep, edi mmebeŋe nte ekpeme mmɔ ke idiɔk esie.

¹⁶ Mmɔ idige eke ererimbot, kpa nte Ami mmendige eke ererimbot.

¹⁷ Da akpanikɔ Fo dianare mmɔ nim nɔ Idem Fo: ikɔ Fo edi akpanikɔ.

¹⁸ Nte Afo ɔkɔdɔŋde Mi ndi ke ererimbot, kpasuk ntre ke Ami ndɔŋ mmɔ eka ke ererimbot.

¹⁹ Ndien kabaŋa mmɔ ndianare Idem Mmi nnim nnɔ Fi, man ekpada akpanikɔ edianare mmɔ ŋko enim enɔ Fi.

²⁰ Mbeŋeke mbaŋa mmɔ emi ikpɔŋ, edi mbeŋe mbaŋa mmɔ nde eke ebuɔtde idem ye Ami oto ke ikɔ mmɔ,

²¹ man mmɔ kpukpru ekpakam edi kiet, nte Afo, Ete, odude Mi ke idem, Ami nnyuŋ ndude ke Afo; man mmɔ enyuŋ edu ke nnyin: man ererimbot enim ke akpanikɔ ete, edi afo ɔkɔdɔŋ Mi.

²² Mmonyuŋ nyak ubɔŋ emi Afo ɔkɔnɔde Mi nnɔ mɔ; man mmɔ edi kiet, kpa nte nnyin idide kiet;

²³ man Ami ndu ke esit mmɔ, Afo onyuŋ odu ke esit Mi, man mmɔ ekabare efɔn ema edi kiet edehe; man ererimbot efiɔk ete edi Afo okosio Mi ɔdɔŋ, omonyuŋ ama mmɔ, kpa nte akamade Mi.

²⁴ Ete, mmoyom nte mmɔ emi Afo ɔkɔnɔde Mi edidu ye ami ke ebiet eke ndude; man mmɔ ekut ubɔŋ Mi emi Afo ɔkɔnɔde Mi: koro Afo akamama Mi, ndien ediwuk adaha ererimbot.

²⁵ O edinen Ete, ererimbot ikɔfiɔkke Fi, edi Ami mmɔfiɔk Fi; mmɔ emi enyuŋ efiɔk ete Afo ɔkɔdɔŋ Mi.

²⁶ Ndien mmayarare enyiŋ Fo nnɔ mmɔ, nyenyuŋ nyarare: man ima emi Afo akamade Mi odu mmɔ ke esit, Ami nnyuŋ ndu mmɔ ke esit.