JOHN 15 - Edisana ñwed Abasi Ibom

Jesus Edi Ata Vine

¹ AMI ndi ata vine, Ete Mi onyuŋ edi ɔdiɔŋ-iŋwaŋ-vine.

² Kpukpru ŋkɔk ke idem Mi eke miŋwumke mfri, Enye osibe efep; ndien kpukpru ŋkɔk eke oŋwumde mfri, Enye ɔdiɔŋ, man oŋwum mfri awak akan.

³ Mbufo emesasana oto ke ikɔ eke mma ŋketiŋ nnɔ mbufo.

⁴ Eduŋ Mi ke idem, Ami nnyuŋ nduŋ mbufo ke idem Nte ŋkɔk mikemeke ndiŋwum mfri ke idem esie, ibɔhɔke enye oduŋ ke vine, kpasuk ntre ke mbufo ikemeke ndiŋwum mfri, ibɔhɔke mbufo eduŋ Mi ke idem.

⁵ Ami ndi vine, mbufo edi mme ŋkɔk: owo eke oduŋde Mi ke idem, Ami nnyuŋ nduŋde enye ke idem, kpa enye oŋwum mfri ekese: koro esiode Mi efep, mbufo ikemeke ndinam baba ŋkpɔ kiet.

⁶ Edieke owo miduŋke Mi ke idem, esio enye efep nte ŋkɔk, enye onyuŋ akabare asat; ndien etaŋ mme ŋkɔk oro esin ke ikaŋ, enyuŋ efɔp mmɔ.

⁷ Edieke mbufo eduŋde Mi ke idem, ikɔ Mi onyuŋ oduŋde mbufo ke esit, ebeŋe se eyomde, ndien eyenam enɔ mbufo.

⁸ Ete Mi ada ubɔŋ ke eriŋwum emi mbufo eŋwumde mfri ekese: ntem ke mbufo edidi mbet Mi.

⁹ Kpa nte Ete akamade Mi, Ami ŋkonyuŋ mma mbufo: esuk eduŋ ke ima Mi.

¹⁰ Edieke mbufo enimde mbet Mi, mbufo eyeduŋ ke ima Mi; kpa nte ami ŋkonimde mbet Ete Mi, nnyuŋ nduŋde ke ima Esie.

¹¹ Mma ntiŋ mme ŋkpɔ emi nnɔ mbufo, man idaresit Mi odu ke mbufo, idaresit mbufo onyuŋ ɔyɔhɔ.

¹² Ibet Mi edi ntem, ete, mbufo ema kiet eken, kpa nte ŋkamade mbufo.

¹³ Baba owo kiet inyeneke ima eke okponde akan enye emi, owo ndikpayak uwem esie nduɔk kabaŋa mme ufan esie.

¹⁴ Mbufo edi mme ufan Mi edieke mbufo enamde ŋkpɔ eke ntemede mbufo.

¹⁵ Ŋkotke aba mbufo mme asaŋutom, koro asaŋutom mifiɔkke se ete-ufɔk esie anamde; edi ŋkot mbufo mme ufan, koro mma mmen kpukpru se ŋkokopde ke inua Ete Mi nyarare nnɔ mbufo.

¹⁶ Idige mbufo ekemek Mi, edi Ami ŋkemek mbufo nnyuŋ nnim nte mbufo eka ekeŋwum mfri, mfri mbufo okponyuŋ osuk odu: man Ete ɔkpɔnɔ mbufo ŋkpɔ ekededi eke edibeŋede Enye ke enyiŋ Mi.

¹⁷ Mmowuk mbufo ntem nte, mbufo ema kiet eken.

¹⁸ Edieke ererimbot asuade mbufo, mbufo emɔfiɔk ete, enye ama ebem iso asua Mi, ndien edisua mbufo.

¹⁹ Edieke mbufo ekpedide mbon ererimbot, ererimbot akpama ikɔt esie: edi sia mbufo midige mbon ererimbot, edi Ami ŋkemekde mbufo nsio ke ererimbot, ke ntak oro ererimbot asua mbufo.

²⁰ Eti ikɔ eke ŋketiŋde nnɔ mbufo nte, Asaŋutom ikponke ikan ete-ufɔk. Edieke mmɔ ekesinde Mi enyin, eyesin mbufo ŋko: edieke mmɔ ekenimde uyo Mi, mmɔ eyenim uyo mbufo ŋko.

²¹ Edi mmɔ eyenam mbufo kpukpru ŋkpɔ emi ke ntak Mi, koro mmɔ mifiɔkke Andidɔŋ Mi.

²² Edieke mmeŋkpedige nditiŋ ŋkpɔ nnɔ mmɔ, mmɔ ikpenyeneke idiɔk-ŋkpɔ: edi ke emi mmɔ inyeneke se etiŋde enyaŋa idem ke idiɔk-ŋkpɔ mmɔ.

²³ Owo eke asuade Mi asua Ete Mi nde.

²⁴ Edieke mmneŋkpesineke ke ufɔt mmɔ nnam mme utom eke akanam owo efen minamke, mmɔ ikpenyeneke idiɔk-ŋkpɔ: edi ke emi mmɔ ekokut enyuŋ esua Mi ye Ete Mi.

²⁵ Edi emi ɔwɔrɔ, man osu nte ewetde ke ibet mmɔ, ete, Mmɔ ekesua Mi ke unana ntak.

²⁶ Edi ke adaŋemi Iberedem, emi ndisiode ke ubɔk Ete ndɔŋ etiene mbufo, edidide, kpa Spirit akpanikɔ, emi otode ke Ete ɔwɔrɔ edi, Enye eyedi ntiense ɔnɔ Mi.

²⁷ Mbufo eyenyuŋ etiene edi ntiense enɔ Mi, koro mbufo ekodude ye Ami toto ke eritɔŋɔ.