JOHN 14 - Edisana ñwed Abasi Ibom

Jesus Edi Usuŋ

¹ EKUYAK esit otimere mbufo: ebuɔt idem ye Abasi, enyuŋ ebuɔt idem ye ami.

² Ediwak ufɔk edu ke ebiet Ete Mi; edieke mikpedige ntre, ŋkpɔdɔhɔ mbufo; koro mmɔŋ ŋka ŋkotim itie nnim nnɔ mbufo.

³ Ndien edieke ŋkade ŋkotim itie ntre nnɔ mbufo, nyefiak ndi ndida mbufo nnɔ Idem Mi; man mbufo enyuŋ edu ke ebiet eke Ami ndude.

⁴ Mbufo emenyuŋ efiɔk usuŋ ebiet eke Ami ŋkade.

⁵ Thomas ete Enye, Ɔbɔŋ, nnyin ifiɔkke ebiet eke akade; nnyin idinyuŋ didie ifiɔk usuŋ?

⁶ Jesus ɔbɔrɔ enye ete, Ami ndi usuŋ ye akpanikɔ ye uwem: owo baba kiet itieneke Ete, ibɔhɔke ebe ke ami.

⁷ Edieke mbufo ekpediɔŋɔde Mi, Mbufo ekpenyuŋ ediɔŋɔ Ete Mi ŋko; ndien tɔŋɔ mfin emi mbufo emediɔŋɔ Enye, emenyuŋ ekut Enye.

⁸ Philip ete Enye, Ɔbɔŋ, wut nnyin Ete, ndien oro eyesuk nnyin esit.

⁹ Jesus ete enye, Nte mmodu ye mbufo adaŋa anyan ini emi, ndien udiɔŋɔke Mi, Philip? Owo eke okokutde Mi okokut Ete; anam didie ndien ɔdɔhɔ ete, Wut nnyin Ete?

¹⁰ Nte unimke ke akpanikɔ ete, Ami ndu ke Ete, Ete onyuŋ odu Mi ke idem? mme ikɔ eke ntiŋde nnɔ mbufo, ntiŋke ke uyo Idem Mi: edi Ete emi odude Mi ke Idem ke anam utom Esie.

¹¹ Enim Mi ke akpanikɔ ete, Ami ndu ke Ete, Ete onyuŋ odu Mi ke idem; midige, enim se ntiŋde ke akpanikɔ ke ntak utom Mi.

¹² Ke akpanikɔ ke ndɔhɔ mbufo, Owo eke ɔbuɔtde idem ye ami eyenyuŋ anam utom eke Ami nnamde; enye eyenyuŋ anam utom eke okponde akan oro: sia Ami nnyɔŋde ntiene Ete.

¹³ Nyenyuŋ nnam ŋkpɔ ekededi eke mbufo edibeŋede ke enyiŋ Mi, man Ete enyene ubɔŋ ke Eyen.

¹⁴ Edieke mbufo ebeŋede ŋkpɔ ke enyiŋ Mi, nyenam.

¹⁵ Mbufo ema ema Mi, eyenim mbet Mi.

¹⁶ Nyenyuŋ mbeŋe Ete, ndien Enye eyenɔ mbufo Iberedem efen, man Enye edidu ye mbufo ke nsinsi;

¹⁷ kpa Spirit akpanikɔ, emi ererimbot mikemeke ndida, koro mmɔ mikwe enye minyuŋ idiɔŋɔke Enye: edi mbufo emediɔŋɔ Enye, koro Enye ododuŋ ye mbufo, eyeyuŋ odu mbufo ke esit.

¹⁸ Ndikpɔŋke mbufo nte nditɔ-akpa; mfafiak ntiene mbufo.

¹⁹ Osuk esisit, ndien ererimbot idikwe Mi aba; edi mbufo ke ekut Mi: sia Ami ndude uwem, mbufo eyedu uwem ŋko.

²⁰ Adaŋoro mbufo eyefiɔk ete Ami ndu ke Ete Mi, mbufo enyuŋ edu ke Ami, Ami nnyuŋ ndu mbufo ke idem.

²¹ Owo eke enyenede mbet Mi, onyuŋ onimde mmɔ, enye edi owo eke amade Mi: ndien owo eke amade Mi, Ete Mi eyema enye, Ami nyenyuŋ mma enye, nnyuŋ nyarare Idem Min ɔ enye.

²² Judas (idige Iscariot) obup Enye ete, Ɔbɔŋ, nsitibe Afo ediyararede Idem Fo ɔnɔ nnyin edi muduyarakere unɔ ererimbot?

²³ Jesus ɔbɔrɔ enye ete, Edieke owo amade Mi, eyenim uyo Mi: ndien Ete Mi eyema enye, nnyin iyenyuŋ idi ididuŋ ye enye.

²⁴ Owo eke mimaŋa Mi inimke se ntiŋde; ndien ikɔ eke mbufo ekopde idige okim, edi enyene Ete emi ɔkɔdɔŋde Mi.

²⁵ Ntiŋ ŋkpɔ emi nnɔ mbufo, ke adaŋemi nsuk ndude kaŋa ye mbufo.

²⁶ Edi Iberedem, kpa Edisana Spirit, emi Ete edinɔde edi ke enyiŋ Mi, Enye eyekpep mbufo kpukpru ŋkpɔ, onyuŋ anam mbufo eti kpukpru se Ami ŋketiŋde nnɔ mbufo.

²⁷ Ŋkpɔŋ emem ye mbufo; nyak emem Mi nnɔ mbufo: idige nte ererimbot ɔnɔde ke ami nnɔ mbufo. Ekuyak esit etimere mbufo, ekunyuŋ eyak esit mbufo ekop ndik.

²⁸ Mbufo ema ekop ete ŋkɔdɔhɔ mbufo, nte, Mmɔŋ ndinyɔŋ, ndien nyefiak ntiene mbufo. Edieke mbufo emade Mi, mbufo ekpadara, sia nnyɔŋde ntiene Ete: koro Ete omokpon akan Mi.

²⁹ Mma ntiŋ nnɔ mbufo, ndien ŋkpɔ emi ediwɔrɔ osu, man ke ini ediwɔrɔde osu, mbufo ekponim ke akpanikɔ.

³⁰ Nditiŋke aba ŋkpɔ ŋkaha ye mbufo, koro ɔbɔŋ ererimbot emi ke edi, enye inyuŋ inyeneke baba ŋkpɔ kiet ke esit Mi:

³¹ edi man ererimbot efiɔk ete mmama Ete, ndien nte Ete ɔkɔnɔde Mi item, kpa ntre ke nnam. Edaha ke enyɔŋ, edi iwɔŋɔ.