JOHN 13 - Edisana ñwed Abasi Ibom

Jesus Eyet Mbet Esie Ukot

¹ KE ini usɔrɔ Passover mitɔŋɔke kaŋa, Jesus ɔfiɔk ete ekem ini nte Imɔ idikpɔŋde ererimbot emi inyɔŋ itiene Ete; ndien ke erima emi Enye amade ikɔt Esiemɔ emi edude ke ererimbot, Enye ama mmɔ tutu akpatre.

² Ndien ke ini udia mbubreyo, ke Satan ama okotop ekikere esin ke esit Judas Iscariot eyen Simon ete, ada Enye ɔnɔ;

³ sia Jesus ɔfiɔkde ete Ete amayak kpukpru ŋkpɔ esin Imɔ ke ubɔk, Imɔ ikonyuŋ ito Abasi, inyuŋ inyɔŋ itiene Abasi,

⁴ Enye adaha ke itie-udia, osio ɔfɔŋ-idem Esie onim ŋkaŋ kiet, onyuŋ ada ukwɔhɔre-idem awaŋ ke ŋkuk.

⁵ Ndien Enye ɔtɔhɔ mmɔŋ esin ke akpaŋkpaŋ, onyuŋ ɔtɔŋɔ ndiyet mbet Esie ukot nnyuŋ nda ukwɔhɔre-idem emi Enye awaŋde ke ŋkuk ŋkwɔhɔre mmɔ ukot.

⁶ Ntre ke Enye edisim Simon Peter. Enye oro obup Jesus ete, Ɔbɔŋ, nte ɔmɔŋ eyet mi ukot?

⁷ Jesus ɔbɔrɔ enye ete, afo ufiɔkke se erinam Mi ɔwɔrɔde ke emi; edi eyefiɔk usuk-usuk.

⁸ Peter ete Enye, Uduyetke mi ukot. Jesus ɔbɔrɔ enye ete, Edieke mmenyetke fi, afo usuaŋake ŋkpɔ ye Ami.

⁹ Simon Peter ete, Enye, Ɔbɔŋ, kuyet mi ukot ikpɔŋ edi, yet mi ubɔk ye ibuot kɔrɔ do.

¹⁰ Jesus ete enye, Owo ama ekeyere mmɔŋ, enye inyeneke nditɔŋɔ ntak nyere, ibɔhɔke ndiyet ukot esie, edi asana ofuri-ofuri: ndien mbufo emesana, edi idige kpukpru mbufo.

¹¹ Koro Enye ɔdiɔŋɔ owo eke edidade Enye ɔnɔ; oro esin Enye ɔdɔhɔ ete, idige kpukpru mbufo esana.

¹² Ntre ke Enye ama ekeyet mmɔ ukot, onyuŋ esine ɔfɔŋidem Esie, ɔsuhɔre etetie, Enye ete mmɔ, Nte mbufo emefiɔk se ŋkanamde mbufo?

¹³ Mbufo ekot Mi Andikpep ye Ɔbɔŋ, ndien emetim ekot, koro ndide se edɔhɔde.

¹⁴ Edieke ami ndien, emi ndide Ɔbɔŋ ye Andikpep, ŋkeyetde mbufo ukot, mbufo nde ekpeyet kiet eken ukot.

¹⁵ Koro mmɔnɔ mbufo uwut-ŋkpɔ nte, mbufo nde enam kpa nte Ami ŋkanamde mbufo.

¹⁶ Ke akpanikɔ ke ndɔhɔ mbufo, asaŋutom ikponke ikan ete-ufɔk, isuŋutom inyuŋ ikponke ikan andidɔŋ enye utom.

¹⁷ Edieke mbufo efiɔkde mme ŋkpɔ emi, ɔfɔfɔn ɔnɔ mbufo ke mbufo enamde mmɔ.

¹⁸ Ntiŋke mbaŋa mbufo kpukpru; mmɔfiɔk mmɔ emi ŋkemekde: edi ŋkpɔ etie ntem man osu nte ewetde ete, Adia-udia Mi osio ukot atiga Mi.

¹⁹ Ntɔŋɔ adaŋemi nditiŋ nnɔ mbufo, ke ini ŋkpɔ emi miwɔrɔke isu kaŋa, man ke ini ediwɔrɔde osu, mbufo ekponim ke akpanikɔ ete Ami ndi Enye.

²⁰ Ke akpanikɔ ke ndɔhɔ mbufo, Owo eke adarade isuŋ ekededi eke ndidɔŋde adara Mi; ndien owo eke adadare Mi adara Enye emi ɔkɔdɔŋde Mi.

²¹ KE Jesus ama eketiŋ ntem; spirit otimere Enye, Enye onyuŋ ɔsɔŋ uyo ɔdɔhɔ ete, Ke akpanikɔ ke ndɔhɔ mbufo nte, Owo kiet ke otu mbufo eyeda Mi ɔnɔ.

²² Mbet ese kiet eken, eyik mme Enye etiŋ abaŋa anie.

²³ Mbet kiet emi Jesus amade odu ke okpokoro, etie ebere Jesus ke ikpanesit.

²⁴ Simon Peter anam idiɔŋɔ ke ibuot, ete enye, Sian nnyin mme anie ke Enye etiŋ abaŋa.

²⁵ Ntre ke enye oro afiak ebere Jesus ke ikpanesit ntem, onyuŋ obup Enye ete, Ɔbɔŋ anie edi oro?

²⁶ Jesus ɔbɔrɔ ete, Edi enye emi ndidebide uyo nyak nnɔ enye. Ntre ke Enye ama ekedebi uyo, emen ayak ɔnɔ Judas, eyen Simon Iscariot.

²⁷ Ndien ke Judas ama ɔkɔbɔ uyo oro, ekem Satan oduk enye esit. Ntem ke Jesus ɔdɔhɔ enye ete, Wara nam se aduakde ndinam.

²⁸ Edi baba owo kiet ke okpokoro ifiɔkke ntak eke Jesus ɔdɔhɔde enye ntem.

²⁹ Koro ndusuk mmɔ ese ete, sia Judas akamade ekpat okuk, Jesus ɔnɔ enye uyo ete, Dep se iyomde inɔ usɔrɔ; midige, nɔ nditɔ-ubuene ŋkpɔ.

³⁰ Ndien ke enye ama ɔkɔbɔ uyo oro, enye ɔwɔrɔ idaha oro. Ndien edi okoneyo.

³¹ Ke enye ama ɔkɔwɔrɔ, Jesus ɔdɔhɔ ete, Eyen Owo ɔkɔbɔ ubɔŋ ke emi, Abasi okonyuŋ ɔbɔ ubɔŋ ke idem Eyen.

³² Abasi eyenyuŋ ɔnɔ Enye ubɔŋ ke Idem Esie, onyuŋ ɔnɔ Enye ubɔŋ ke idem idahemi.

³³ Ŋkpri nditɔ, nnyene ndidu ye mbufo kaŋa ke ekpri ini. Mbufo eyeyom Mi: ndien, kpa nte ŋkɔhɔde mme Jew nte, Mbufo ikemeke ndisim ɔtɔ nte ŋkade, ndɔhɔ mbufo suk ntre ke emi.

³⁴ Mmɔnɔ mbufo obufa ibet nte, Mbufo ema kiet eken; nte, mbufo nde ema kiet eken kpa nte ŋkamade mbufo.

³⁵ Mbufo ema ema kiet eken, kpukpru owo eyeda oro efiɔk ete mbufo edi mbet Mi.

³⁶ Simon Peter obup Enye ete, Ɔbɔŋ, Afo akaka mmɔŋ? Jesus ɔbɔrɔ ete, Ukemeke nditiene Mi ŋka ɔtɔ nte ŋkade ke emi; edi eyetiene Mi usuk-usuk.

³⁷ Peter ete Enye, Ɔbɔŋ, nsidi ntak eke mme-ndikemeke nditiene Fi ke idem idahemi?

³⁸ Nyeyak uwem mi nduɔk kabaŋa Fi. Jesus ɔbɔrɔ enye ete, Nte eyeyak uwem fo ɔduɔk kabaŋa Mi? Ke akpanikɔ ke ndɔhɔ fi, Ekikɔ idikpɔkke tutu afo akaŋ Mi utim ikata.