JOHN 11 - Edisana ñwed Abasi Ibom

Lazarus Akpa

¹ EDI owo kiet ɔdɔŋɔ, kpa Lazarus owo Bethany, obio-iŋwaŋ emi Mary ye Martha eyen-eka esie edude do.

² Edi Mary oro ediyet Ɔbɔŋ edifuɔŋ aran, onyuŋ ada idet ibuot esie ɔkwɔhɔre Enye ukot, emi Lazarus eyen-eka esie ɔdɔŋɔde.

³ Ntem ke nditɔ-eka esie iban edɔŋ ekɔdɔhɔ Jesus ete, Ɔbɔŋ, owo emi Afo amade ke ɔdɔŋɔ.

⁴ Edi ke ini Jesus okopde, Enye ete, Udɔŋɔ emi idige udɔŋɔ mkpa, edi odu kabaŋa ubɔŋ Abasi, man oto do enɔ Eyen Abasi ubɔŋ.

⁵ Jesus amama Martha ye eyen-eka esie aŋwan ye Lazarus.

⁶ Mmɔdo ke ini Enye okopde ete enye oro ke ɔdɔŋɔ, ekem Enye adaŋ usen iba ke ebiet oro Enye odude.

⁷ Ekem ke adaŋemi ini oro ebede, Enye ɔdɔhɔ mbet Esie ete, Eyak nnyin itɔŋɔ ntak ika ke Judaea.

⁸ Mbet Esie edɔhɔ Enye ete, Rabbi, kpa idahemi mme Jew eyom nditɔ Fi ke itiat: nte ɔmɔŋ ɔtɔŋɔ ntak aka do?

⁹ Jesus ɔbɔrɔ ete, Nte hour duopeba iduhe ke uwemeyo? Edieke owo asaŋade ke uwemeyo, enye iduɔhɔ koro enye okutde uŋwana ererimbot emi:

¹⁰ edi edieke owo asaŋade ke okoneyo, enye ɔduɔ, koro ananade uŋwana.

¹¹ Ke Enye ama ɔkɔdɔhɔ ikɔ emi, Enye ete, Lazarus, ufan nnyin, ke ede; edi mmɔŋ ŋka man ndemere enye ke idap.

¹² Mbet Esie ete Enye, Ɔbɔŋ, edieke enye edede idap, eyekut nsɔŋidem.

¹³ Edi Jesus etiŋ abaŋa mkpa Lazarus; edi mmɔ ese ete Enye ɔdɔhɔ ete, Lazarus ke ede idap ɔbɔ nduɔk-odudu.

¹⁴ Ntre ke adaŋoro Jesus eneŋere ɔdɔhɔ mmɔ ete, Lazarus ama akpa.

¹⁵ Ndien esit adat Mi koro mmeŋkoduhe do ke ntak mbufo, man mbufo enim ke akpanikɔ; edi eyak nnyin itiene enye.

¹⁶ Ntem ke Thomas, emi ekerede Didymus, ɔdɔhɔ mme mbet eken ete, Eyak nnyin itiene Enye ika ikakpa ye Enye.

¹⁷ Ntre ke ini Jesus osimde do, Enye okut ete okpo ama okodu ke udi usen inaŋ.

¹⁸ Bethany ɔkpɔŋ Jerusalem ke adaŋa nte mile iba:

¹⁹ ediwak mme Jew ema enyuŋ edi ke ɔtɔ Martha ye Mary ndidɔŋ mmɔ esit mbaŋa eyen-eka mmɔ.

²⁰ Ntem ke ini Martha okopde ete Jesus ke edi, enye aka okosobo ye Enye: edi Mary osuk etie ke ufɔk.

²¹ Ndien Martha ɔdɔhɔ Jesus ete, Ɔbɔŋ, edieke Afo okpodude mi, eyen-eka mi ikpakpaha.

²² Edi kpa ke emi mmɔfiɔk nte Abasi eyenɔ Fi ŋkpɔ ekededi eke Afo edibeŋede Enye.

²³ Jesus ete enye, Eyen-eka fo eyeset ke mkpa.

²⁴ Martha ete Enye, Mmɔfiɔk nte enye eyeset ke eriset ke mkpa ke akpatre usen.

²⁵ Jesus ɔdɔhɔ enye ete, Ami ndi eriset ye uwem: owo eke ɔbuɔtde idem ye Ami, okposuk edi nte enye ama akpa, enye eyedu uwem:

²⁶ ndien owo ekededi eke odude uwem onyuŋ ɔbuɔtde idem ye Ami idikpaha ke nsinsi. Nte omonim emi ke akpanikɔ?

²⁷ Martha ɔdɔhɔ Enye ete, Edi ntre, Ɔbɔŋ, mmonim ke akpanikɔ nte Afo edi Christ Eyen Abasi, kpa Enye emi odukde edi ke ererimbot.

²⁸ Ndien ke ama ɔkɔdɔhɔ ntem, enye adaha okokot Mary eyen-eka esie ke ndibe, ete, Andikpep mmɔmi, Enye ke onyuŋ okot fi ete edi.

²⁹ Ke ini Mary okopde, enye adaha ke enyɔŋ iwiwa editiene Jesus.

³⁰ Jesus ikodukke ke obio kaŋa, edi osuk odu ke ɔtɔ oro Martha okosobode ye Enye.

³¹ Ntem ke ini mme Jew, emi etiede ye Mary ke ufɔk edɔŋ enye esit, ekutde nte enye adahade ke enyɔŋ iwiwa ɔwɔrɔ, mmɔ etiene enye, ese ete, enye aka udi nditua eyet do.

³² Ke adaŋemi Mary osimde ebiet oro Jesus odude,onyuŋ okutde enye, ɔduɔ Enye ke ukot, ete Enye, Ɔbɔŋ, edieke Afo okpodude mi, eyen-eka mi ikpakpaha.

³³ Ntem ke ini Jesus okutde nte Mary atuade eyet, ye nte mme Jew emi esaŋade ye enye etuaŋade, Enye omum mmum ke spirit, esit onyuŋ otimere Enye:

³⁴ ndien Enye ete, Mbufo ekenim okpo ke mmɔŋ? Mmɔ ete Enye, Ɔbɔŋ, di dise.

³⁵ Jesus atua eyet.

³⁶ Ntem ke mme Jew ete, Sese, adaŋa nte Enye amade owo oro.

³⁷ Edi ndusuk mmɔ ete, Nte owo emi akatatde nnan enyin ikpekemeke ndinam owo emi okukpa?

³⁸ Jesus ɔtɔŋɔ ntak omum mmum ke esit, ndien edi ke udi. Udi edi aba itiat, itiat onyuŋ ebere ke inua esie.

³⁹ Jesus ɔnɔ uyo ete, Ekpat itiat esio. Martha, eyen-eka akpa-mkpa, ete Jesus, Ɔbɔŋ, ke emi okpo ke etebe, koro enye akakpa osim usen inaŋ.

⁴⁰ Jesus ete enye, Nte ŋkɔdɔhɔke fi nte, edieke onimde ke akpanikɔ, eyekut ubɔŋ Abasi?

⁴¹ Ntre ke mmɔ ekpat itiat esio. Edi Jesus emenere enyin Esie ke enyɔŋ, onyuŋ ɔdɔhɔ ete, Ete, mmɔkɔm Fi koro Afo okokopde uyo Mi.

⁴² Ami nnyuŋ mfiɔk nte okop uyo Mi kpukpru ini; edi kabaŋa otu owo emi edade ekan ekuk, ŋkɔdɔhɔ ntem, man mmɔ enim ke akpanikɔ ete Afo ɔkɔdɔŋ Mi.

⁴³ Ndien ke Enye ama ɔkɔdɔhɔ ntem, Enye ofiori ke ɔkpɔsɔŋ uyo, ete, Lazarus, wɔrɔ di.

⁴⁴ Akpa-mkpa ɔwɔrɔ edi, nte ekada ɔfɔŋ-udi ebɔp enye ubɔk ye ukot; enyuŋ eda ubak ɔfɔŋ ebɔp enye iso. Jesus ete mmɔ, Etat enye, eyak enye ɔnyɔŋ ufɔk.

Ndien Eduk Odu Ebaŋa Jesus

⁴⁵ Ntem ke ediwak mme Jew, emi ekedide ndise Mary, enyuŋ ekutde se Jesus anamde, ebuɔt idem ye Enye.

⁴⁶ Edi ndusuk mmɔ emen se Jesus akanamde edaha etiene mme Pharisee ebuk enɔ mmɔ.

⁴⁷ Ntre ke ikpɔ oku ye mme Pharisee ekot akwa esop ebono, enyuŋ edɔhɔ ete, Inam didie? koro owo emi ke ananam ediwak idiɔŋɔ.

⁴⁸ Edieke iyakde Enye osuk aka iso ntem, kpukpru owo eyebuɔt idem ye Enye: ndien mbon Rome eyedi edibɔ nnyin itie nnyin ye ubɔŋ nnyin.

⁴⁹ Edi owo kiet ke otu mmɔ, kpa Caiaphas, emi edide akwa oku isua oro, ɔdɔhɔ mmɔ ete, Mbufo ifiɔkke ŋkpɔ baba esisit,

⁵⁰ inyuŋ ikereke ite ɔfɔn owo kiet ndikpakpa kabaŋa ufɔn mbio-obio, akan ɔfuri obio nditak.

⁵¹ Ikɔ emi itoho idem esie: edi, sia enye edide akwa oku isua oro, enye etiŋ nte prophet, ete Jesus eyekpa kabaŋa ufɔn obio oro;

⁵² inyuŋ idige kabaŋa ufɔn obio oro ikpɔŋ, edi man Enye ataŋ kpukpru nditɔ Abasi emi esuanade obon ɔtɔ kiet.

⁵³ Ntre toto usen oro mmɔ esop ibuot, ete iwot Enye.

⁵⁴ Ntre ke Jesus isanŋake aba aŋwa-aŋwa ke otu mme Jew, edi adaha do aka ke edem eke ekperede desert, okoduk ke obio emi ekerede Ephraim, onyuŋ etie do ye mbet Esie.

⁵⁵ Edi Passover mme Jew ke ekpere; ediwak owo enyuŋ ebem Passover iso eto iŋwaŋ edɔk eka ke Jerusalem ndinam idem mmɔ esana. Ndien mmɔ eyoyom Jesus,

⁵⁶ enyuŋ eneme ye kiet eken, nte mmɔ edade ke temple, ete, Ese didie? Nte Enye ididige usɔrɔ?

⁵⁷ Ikpɔ oku ye mme Pharisee ema enɔ uyo ete, owo ekededi eke ɔfiɔkde ebiet emi Enye odude okpowut ebiet oro, man mmimɔ imum Enye.