JOHN 1 - Edisana ñwed Abasi Ibom

IKƆ Edi Uwem Nsinsi; Ukwɔrɔ Ikɔ John

¹ IKƆ okodu ke eritɔŋɔ, IKƆ okonyuŋ odu ye Abasi, IKƆ onyuŋ edi Abasi.

² Kpa Enye okodu ye Abasi ke eritɔŋɔ.

³ Oto ke Enye ekenam kpukpru ŋkpɔ; ndien mitoho ke Enye, inamke ŋkpɔ baba kiet eke ekenamde.

⁴ Uwem odu Enye ke idem; uwem oro onyuŋ edi uŋwana owo.

⁵ Ndien uŋwana oro ayama ke ekim; ekim inyuŋ ikanke enye.

⁶ Owo kiet okoto edi; Abasi osio enye ɔdɔŋ; enyiŋ esie ekere John.

⁷ Enye ekedi nte ntiense, ete idi ntiense inɔ uŋwana oro, kpaŋ kpukpru owo enim ke akpanikɔ oto ke enye.

⁸ Enye ikedige uŋwana oro, edi ekedi man edi ntiense ɔnɔ uŋwana oro.

⁹ Ata uŋwana emi anamde enyin aŋwaŋa kpukpru owo okododuk ke ererimbot.

¹⁰ Enye okodu ke ererimbot, enyuŋ enam ererimbot oto ke Enye, ndien ererimbot idiɔŋɔke Enye.

¹¹ Enye ekedi ke ebiet Esiemɔ, edi mmɔ emi edide iman Esiemɔ idarake Enye.

¹² Edi kpukpru owo eke edarade Enye, Enye ɔnɔ mmɔ unen ndikabare ndi nditɔ Abasi, kpa mmɔ emi ebuɔtde idem ke enyiŋ Esie;

¹³ emi mimanake oto ke iyip, mme ke erinyime obukidem, mme ke erinyime owo, edi emana oto Abasi.

¹⁴ Ndien IKƆ akabare edi obukidem onyuŋ oduŋ ye nnyin (nnyin inyuŋ ikut ubɔŋ Esie, utɔ ubɔŋ emi ikpɔŋ eyen ɔbɔde ke ubɔk ete) ɔyɔhɔ ye mfɔn ye akpanikɔ.

¹⁵ John etie ntiense abaŋa. Enye, onyuŋ ofiori ete, Enye edi owo oro ŋketiŋde mbaŋa, nte Enye emi etienede mi ke edem akabare ebem mi iso, koro Enye ekebemde mi iso odu.

¹⁶ Koro nnyin kpukpru ikɔbɔ mfɔn ikɔrɔ ke mfɔn oto ke uyɔhɔ Esie.

¹⁷ Koro ekɔnɔ ibet ke ubɔk Moses; edi Jesus Christ akada mfɔn ye akpanikɔ edi.

¹⁸ Akanam baba owo kiet ikwe Abasi; ikpoŋ-ikpɔŋ Eyen emi Abasi obonde, emi odude ke ikpanesit Ete, kpa Enye amayarare Abasi.

¹⁹ Ndien emi edi ikɔ ntiense John, ke adaŋemi mme Jew emi etode ke Jerusalem esiode mme oku ye mme Levite edɔŋ ke ɔtɔ esie, ete ebup enye ete, Afo edi anie?

²⁰ Ndien enye etiŋ aŋwa-aŋwa, ikaŋke: enye etiŋ aŋwa-aŋwa, ete, Ndige Christ.

²¹ Ekem mmɔ ebup enye ete, Edi anie ndien? Edi Elijah? Enye ete, Ndige. Nte edi prophet oro? Enye ɔbɔrɔ ete, Baba.

²² Ntem ke mmɔ ete enye, Edidi anie naŋa? Sian nnyin, man nnyin imen ibɔrɔ isɔk mmɔ emi ekɔdɔŋde nnyin; onyime nso ndien abaŋa idemfo?

²³ Enye ete, Ami ndi uyo andifiori ke desert, ete, Eneŋere usuŋ Jehovah, kpa nte Isaiah prophet eketiŋde.

²⁴ Mme isuŋ oro eto ke otu mme Pharisee.

²⁵ Mmɔ edibup enye ndien ete, Nsinam afo onimde owo baptism naŋa, edieke afo mudige Christ, munyuŋ udige Elijah, munyuŋ udige prophet oro?

²⁶ John ɔbɔrɔ mmɔ ete, Ami nda mmɔŋ nnim owo baptism; edi owo emi mbufo midiɔŋɔke mmɔ ke ufɔt mbufo ada;

²⁷ edi Enye etiene mi ke edem, emi ami mmendotke nditat uruk ikpa-ukot Esie.

²⁸ Mme ŋkpɔ emi ewɔrɔ ke ŋkaŋ Jordan oko, emi John onimde baptism do.

²⁹ Ke ndaŋ-nsiere John okut nte Jesus asaŋade ekpere enye, onyuŋ ɔdɔhɔ ete, Sese, Eyen-erɔŋ Abasi emi emende mme idiɔk-ŋkpɔ ererimbot efep.

³⁰ Emi edi Owo eke ndɔhɔde mbaŋa Enye nte, Owo etiene mi ke edem emi ɔwɔrɔde ebem mi iso; koro Enye ekebemde mi iso odu.

³¹ Ami ŋkonyuŋ ndiɔŋɔke Enye; edi ŋkedi ndida mmɔŋ nnim baptism, man eyarare Enye enɔ Israel.

³² John onyuŋ etie ntiense ete, Mma ŋkut Spirit nte otode ke enyɔŋ ɔsuhɔre nte ibiom odoro Enye ke idem.

³³ Ndien ŋkɔdiɔŋɔke Enye; edi Enye emi ɔkɔdɔŋde mi ete nda mmɔŋ nnim baptism ɔdɔhɔ mi ete, Owo eke edikutde nte Spirit ɔsuhɔrede odoro Enye ke idem edi Enye emi onimde owo baptism ke Edisana Spirit.

³⁴ Ami mma nnyuŋ ŋkut, nnyuŋ ntie ntiense nte, Emi edi Eyen Abasi.

³⁵ Ke edem usen ŋko John ada ye mbet esie iba, onyuŋ owuk enyin ese Jesus nte Enye asaŋade,

³⁶ onyuŋ ɔdɔhɔ ete, Sese, Eyen-erɔŋ Abasi!

³⁷ Ndien mbet mbiba oro ekop nte enye etiŋde ntem, enyuŋ edaha etiene Jesus.

³⁸ Ekem Jesus ɔwɔŋɔre okut nte mmɔ etienede onyuŋ obup mmɔ ete, Mbufo eyom nso? Mmɔ ete Enye, Rabbi, (oro ɔwɔrɔ ete, Andikpep) oduŋ ke mmɔŋ? Enye ete mmɔ, Edi edise.

³⁹ Ntem ke mmɔ eka ekekut ebiet eke Enye oduŋde, enyuŋ edu ye Enye usen oro; ekpere hour inaŋ ke uwem-eyo.

⁴⁰ Kiet ke otu owo mbiba oro ekopde nte John etiŋde enyuŋ etienede Jesus edi Andrew eyen-eka Simon Peter.

⁴¹ Enye ebem iso okut eyen-eka esiemɔ Simon, onyuŋ ɔdɔhɔ enye ete, Nnyin imokut Messiah (oro ɔwɔrɔ ete, Christ).

⁴² Ada enye edi ke ɔtɔ Jesus. Jesus owuk enyin ese enye, ete enye, Afo edi Simon, eyen John; edikot fi Cephas (oro ɔwɔrɔ ete, Peter).

⁴³ Ke ndaŋ-nsiere Jesus aduak ndidaha ŋka Galilee; ndien Enye okut Philip, onyuŋ ɔdɔhɔ enye ete, Tiene Mi.

⁴⁴ Philip oto ke Bethsaida, obio Andrew ye Peter.

⁴⁵ Philip okut Nathanael, onyuŋ ɔdɔhɔ enye ete, Nnyin imokut Enye, emi Moses ekewetde abaŋa Enye ke ibet, mme prophet ekonyuŋ ewetde ebaŋa, kpa Jesus eyen Joseph, emi otode ke Nazareth.

⁴⁶ Nathanael ete enye, Nte baba eti ŋkpɔ ekeme ndito ke Nazareth? Philip ete enye, Di dise.

⁴⁷ Jesus okut Nathanael nte asaŋade edi, onyuŋ abaŋa enye ete, Sese, ata eyen Israel, emi ŋkari miduhe enye ke esit.

⁴⁸ Nathanael ete Enye, Asaŋa didie ɔdiɔŋɔ mi? Jesus ɔbɔrɔ enye ete, Ke ini Philip mikokotke fi kaŋa, ke adaŋemi afo etiede ke idak eto fig, ŋkokut fi.

⁴⁹ Nathanael ɔbɔrɔ Enye ete, Rabbi, Afo edi Eyen Abasi; Afo edi Edidem Israel.

⁵⁰ Jesus ɔbɔrɔ enye ete, Ke emi ndɔhɔde fi nte, Ŋkokut fi ke idak eto fig, nte omonim ke akpanikɔ? Eyekut se ikponde ikan emi.

⁵¹ Jesus onyuŋ ɔdɔhɔ enye ete, Ke akpanikɔ ke ndɔhɔ mbufo nte, Mbufo eyekut nte enyɔŋ ɔkibɔrede, ye nte mme angel Abasi edɔdɔk esɔsuhɔre edore Eyen Owo ke idem.