JOEL 2 - Edisana ñwed Abasi Ibom

Nduri-Utɔŋ kabaŋa Usen Iyaresit Abasi Emi Edidide

¹ MBUFO efuri ukorowo ke Zion, enyuŋ eduat ke edisana obot mi: yak kpukpru mme andiduŋ isɔŋ enyek idem: koro usen Jehovah emedi, koro emekpere; usen ekim,

² kpa ata ɔkpɔsɔŋ ekim, usen obubit enyɔŋ, kpa ata idiɔk enyɔŋ eti-eti: ebiet usiere eke asuanade ke ikpɔ obot: idut emi awakde, onyuŋ ɔsɔŋɔde; oruk oro akananam iduhe totoko idinyuŋ itieneke enye idi, tutu osim isua ediwak emana.

³ Ikaŋ ebem mmɔ iso ata; edemikaŋ onyuŋ etiene mmɔ edem ɔfɔp: isɔŋ ebiet iŋwaŋ Eden ke iso mmɔ, ndien ikpikpu wilderness odu mmɔ ke edem;

⁴ baba ŋkpɔ kiet inyuŋ ikemeke ndibɔhɔ mmɔ. Idem mmɔ ebiet idem horse; mmɔ enyuŋ esɔp itɔk nte mbon horse.

⁵ Efefrɔ ke enyɔŋ ikpɔ obot, ebiet uyom chariot: ebiet mkprak edemikaŋ eke atade etak ibokpot, ebiet mkpɔsɔŋ mbio eke etimde udim ekɔŋ.

⁶ Iso mmɔ esin mme idut enyek idem kpukpru iso enyuŋ ekabare kpai.

⁷ Mmɔ efeŋe nte mbon uko; edɔk ibibene nte mbon-ekɔŋ; kpukpru mmɔ enyuŋ esaŋa ke usuŋ mmɔ; mmɔ inyuŋ itimekede udim isaŋ mmɔ:

⁸ ndien kiet inyuŋ inukke eken; kpukpru mmɔ kiet kiet enyuŋ esaŋa ke usuŋ mmɔ; mmɔ enyuŋ eduɔŋɔ ke otu ŋkpɔ-ekɔŋ, edi idaha unan.

⁹ Mmɔ eyɔrɔ ke obio; efeŋe ke enyɔŋ ibibene; edɔk ke ufɔk; eduk ke window nte inɔ.

¹⁰ Isɔŋ enyek ke iso mmɔ; enyɔŋ onyuŋ etimere: utin ye ɔfiɔŋ ebire, ntantafiɔŋ enyuŋ enimi uyama mmɔ.

¹¹ Ndien Jehovah ebem mbon-ekɔŋ esie iso ŋko osioro uyo: koro nna-ekɔŋ esie okponde eti-eti: koro enye edide ɔkpɔsɔŋ, anam uyo esie: koro usen Jehovah okponde onyuŋ enyenede ndik eti-eti: ndien anie ekeme ndiyɔ enye?

¹² Jehovah onyuŋ ɔdɔhɔ ke emi ŋko, ete, Mbufo efiak etiene mi ke ofuri esit mbufo, ye ke utre-udia, ye ke ntua-eyet, ye ke eseme:

¹³ ndien mbufo ewai esit mbufo, ekuwai edisine-ŋkpɔ mbufo, enyuŋ efiak edem etiene Jehovah Abasi mbufo: koro enye enyenede mfɔn ye mbɔm, isɔpke iyaresit, onyuŋ awak ima, onyuŋ atua mkpɔfiɔk ke idiɔk ŋkpɔ.

¹⁴ Anie ɔfiɔk mme enye eyekabare onyuŋ atua mkpɔfiɔk, onyuŋ ɔkpɔŋ eti ŋkpɔ ke edem esie, kpa inuak-udia ye uwa ediŋwɔŋ-ŋkpɔ, ɔnɔ Jehovah Abasi mbufo?

¹⁵ Mbufo efuri ukorowo ke Zion, enim utre-udia, ekwɔrɔ usɔrɔ.

¹⁶ Mbufo ebon mbio-obio, enim esop, ebon mme ebiowo, ebon nditɔwɔŋ ye mmɔ eke ewapde eba: yak ɔdɔ-ndɔ oto ke ubet esie ɔwɔrɔ, yak ŋwan ndɔ oto ke bed ndɔ esie.

¹⁷ Yak mme oku, mme anam-ŋkpɔ Jehovah, etua eyet ke ufɔt etehe ye itie-uwa; yak mmɔ enyuŋ edɔhɔ ŋko, ete, O Jehovah tua ikɔt fo mbɔm, kunyuŋ uda udeme fo usin ke ŋkpɔ but, man mme idut ekara mmɔ: mmɔ ekpenam didie edɔhɔ ke otu mme idut, ete, Enye Abasi mmɔ?

¹⁸ Ndien Jehovah eyefibe ufup abaŋa isɔŋ esie, onyuŋ atua ikɔt esie mbɔm.

¹⁹ Ndien Jehovah eyebɔrɔ, onyuŋ ɔdɔhɔ ikɔt esie, ete, Sese, ami nyeda ibokpot nnɔ esɔk mbufo, ye obufa wine, ye aran, ndien mbufo eyeyuhɔ ke esit: ndinyuŋ nnimke aba mbufo ke ŋkpɔ but ke otu mme idut.

²⁰ Ndien nyesio idut edem edere mfep ŋkpɔŋ mbufo anyan usuŋ, nnyuŋ mbin enye nsin ke edisat ye ikpikpu isɔŋ, iso esie eyese inyaŋ edem usiaha-utin, edem esie eyenyuŋ ese inyaŋ edem usop-utin, ndien utebe esie eyedɔk, uŋwak esie eyenyuŋ ɔdɔk, koro enye anamde ikpɔ ŋkpɔ.

²¹ O isɔŋ, kufehe, mbufo edara enyuŋ ebre: koro Jehovah anamde ikpɔ ŋkpɔ.

²² O mme unam ikɔt, mbufo ekufehe, koro mbiet wilderness afiaride: koro eto osioŋo mfri esie, eto fig ye vine enɔ odudu mmɔ.

²³ Mbufo nditɔ Zion ebre ndien mbre, enyuŋ edara Jehovah Abasi mbufo; koro enye ɔnɔde mbufo akpa edim nte enende, onyuŋ anam akpa edim ye akpatre edep ɔnɔ mbufo, kpa nte eke akpa.

²⁴ Ndien ibokpot eyeyɔhɔ ke ɔtɔ-ubek, wine ye aran eyenyuŋ eyɔhɔ ke abaŋ eduɔhɔ.

²⁵ Ndien nyenɔ mbufo usiene mme isua oro ŋkukuŋkpɔyɔriyɔ ye ŋkuku ye itut ye idiaŋ eketade, akwa udim mi emi ŋkɔdɔŋde ekɔŋ ke ɔtɔ mbufo.

²⁶ Ndien mbufo eyedia eyuhɔ, enyuŋ etoro enyiŋ Jehovah Abasi mbufo, emi akanamde mme utibe ŋkpɔ ye mbufo: ndien ikɔt mi idikwe but ke nsinsi.

²⁷ Ndien mbufo eyefiɔk ete ke ami ndodu Israel ke ufɔt, ami nnyuŋ ndi Jehovah Abasi mbufo, eŋwen inyuŋ iduhe; ikɔt mi idinyuŋ ikwe but ke nsinsi.

²⁸ Ndien ama ekem ke ini ŋkpɔ emi ebede, nyeŋwaŋa spirit mi nnɔ ofuri obukidem; ndien nditɔiren mbufo, ye nditɔ mbufo iban eyetiŋ prophecy, mbiowo mbufo eyedaba ndap, mkparawa mbufo eyekut ŋkukut.

²⁹ Nyenyuŋ ŋŋwaŋa spirit mi ke eyo oro nnɔ ifin-iren ye ifin-iban mbufo.

³⁰ Nyenyuŋ nnɔ mme utibe ŋkpɔ ke enyɔŋ ye ke isɔŋ, iyip, ye ikaŋ, ye nsuŋikaŋ ebiet adaha.

³¹ Utin eyekabare edi ekim, ɔfiɔŋ eyenyuŋ akabare edi iyip, ke akwa usen Jehovah emi enyenede ndik mikaidige.

³² Ndien ama ekem, kpukpru owo eke esemede ekot enyiŋ Jehovah eyebɔhɔ: ndien mmɔ eke ebɔhɔde eyedu ke obot Zion ye ke Jerusalem, kpa nte Jehovah ɔkɔdɔhɔde, ye ke otu mmɔ eke esukde emi Jehovah okotde.