JOEL 1 - Edisana ñwed Abasi Ibom

Idiaŋ ye Ŋkukuŋkpɔyɔriyɔ ye Itut Eta Kpukpru Ŋkpɔ ke Isɔŋ

¹ UYO Jehovah emi okosimde Joel eyen Pethuel.

² Mbufo mbiowo ekop uyo mi, mbufo kpukpru mme andiduŋ isɔŋ ekpaŋ utɔŋ ŋko-ŋko. Nte oruk ŋkpɔ nte emi okodu ke eyo mbufo, ye ke eyo mme ete mbufo?

³ Mbufo ebuk enye enɔ nditɔ mbufo, yak nditɔ mbufo enyuŋ ebuk enɔ nditɔ mmɔ: yak nditɔ mmɔ enyuŋ ebuk enɔ emana eŋwen.

⁴ Ŋkukuŋkpɔyɔriyɔ ata se idiaŋ ɔsuhɔde; ŋkuku onyuŋ ata se ŋkukuŋkpɔyɔriyɔ ɔsuhɔde; itut onyuŋ ata se ŋkuku ɔsuhɔde.

⁵ Mbufo mbon mmin edemere enyuŋ etua eyet; kpukpru mbufo mme ɔŋwɔŋ-wine, enyuŋ eseme ebaŋa obufa wine: koro emesibe enye ke inua mbufo efep.

⁶ Koro idut kiet ke ɔdɔk edi ke isɔŋ mi, ke ɔsɔŋ, inyuŋ inyeneke ibat; edet esie edi edet lion; enye onyuŋ enyene ntak edet uman lion.

⁷ Enye abiat vine mi, onyuŋ obuŋ eto fig mi: osio enye ofuri ikpɔk, onyuŋ emen ɔduɔk; mmɔ enam ŋkɔk esie efia.

⁸ Tua nte eyen-aŋwan eke esinede ɔfɔŋ-ikpo atuade abaŋa ebe uyen esie.

⁹ Emesibe inuak-udia ye uwa ediŋwɔŋ-ŋkpɔ ke ufɔk Jehovah efep; mme oku, mme anam-ŋkpɔ Jehovah, eseme.

¹⁰ Iŋwaŋ omosobo, isɔŋ eseme; koro ibokpot osobode: obufa wine amasat, aran etie meŋe-meŋe.

¹¹ Mbufo mbon-iŋwaŋ eda but; mbufo mme andidiɔŋ iŋwaŋ-vine eseme ebaŋa wheat ye barley; koro ukpeŋe iŋwaŋ atakde.

¹² Vine amasat: eto fig ŋko etie meŋe-meŋe: pomegranate, ye eyop ŋko, ye apple, kpa kpukpru eto iŋwaŋ, emesat; koro idara asatde ke otu nditɔ owo.

¹³ Mbufo mme oku ebɔbɔ mbɔbɔ, enyuŋ etuaŋa: mbufo mme anam-ŋkpɔ itie-uwa eseme: mbufo mme anam-ŋkpɔ Abasi mi edi edina ke ɔfɔŋ-ikpo ke ofuri okoneyo: koro ebɔde ufɔk Abasi mbufo inuak-udia ye uwa ediŋwɔŋ-ŋkpɔ efep.

¹⁴ Mbufo enim utre-udia: ekwɔrɔ usɔrɔ; ebon mbiowo, kpukpru mme andiduŋ isɔŋ, edi ufɔk Jehovah Abasi mbufo, enyuŋ eseme enɔ Jehovah.

¹⁵ Mbɔm usen oro! koro usen Jehovah emekpere, enye eyenyuŋ edi nte nsobo eke otode Ata Ɔkpɔsɔŋ.

¹⁶ Nte isibeke udia ke enyin nnyin ifep? Nte ifepke idaresit ye mbre ke ufɔk Abasi nnyin?

¹⁷ Mkpasip amabiara ke idak ebok ntan mmɔ, mme ebiet unim-udia emesobo, mme ufɔk unim-ibokpot emewure; koro ibokpot oforode ayara.

¹⁸ Ufene enam didie emum mmum! mme otu enaŋ etimere, koro mbiet eke etade miduhe; mme otu ŋkpri ufene emenyuŋ esobo.

¹⁹ Nyeseme ŋkot fi, O Jehovah: koro ikaŋ atade mbiet wilderness, edem-ikaŋ onyuŋ ɔfɔp kpukpru eto obot iŋwaŋ.

²⁰ Ndien itɔŋ fo ɔdɔŋ mme unam ikɔt: koro mme udiɔŋ mmɔŋ esatde, ikaŋ onyuŋ ata mbiet wilderness.