JEREMIAH 9 - Edisana ñwed Abasi Ibom

Ubiom Ikpe Emi Otode Abasi: Mme Andiduŋ Jerusalem Etua Eyom Uŋwam

¹ IBUOT mi akpakam edi mmɔŋ! enyin mi ekpekam enyuŋ edi idim mmɔŋeyet! ndien ŋkpatua ke uwemeyo ye ke okoneyo mbaŋa nditɔ adiaha ikɔt mi emi ekewotde.

² Ŋkpakam nnyene ataya mbon-isaŋ ke desert; ndien ŋkpɔkpɔŋ ikɔt mi, nnyuŋ ndaha ke ebiet mmɔ: koro kpukpru mmɔ edide mme esin efibe, ye esop mbon abiaŋa.

³ Ndien mmɔ enuk utiga mmɔ, kpa edeme mmɔ etop nsu: idaha akpanikɔ inam uko ke isɔŋ; koro mmɔ edediɔŋ eka iso ke idiɔk ido, ndien ifiɔkke mi: ke edi Jehovah ɔdɔhɔ.

⁴ Mbufo kpukpru ekpeme idem mbak nsaŋa mbufo, ekunyuŋ ebuɔt idem ye baba eyen-eka kiet: koro kpukpru nditɔ-eka eyekari ŋkari, kpukpru nsaŋa eyesaŋa mbiari.

⁵ Ndien kpukpru owo eyebiaŋa nsaŋa mmɔ, idinyuŋ idɔhɔke akpanikɔ: edeme mmɔ emehe ndisu nsu, enam idiɔk tutu idem emem mmɔ.

⁶ Jehovah ɔdɔhɔ ete, Iduŋ fo odu ke ufɔt nsu; nsu esin mmɔ minyimeke ndifiɔk mi.

⁷ Mmɔdo ntem ke Jehovah mme udim ɔdɔhɔ, ete, Sese, ami mmɔŋ ntara mmɔ, nnyuŋ ndomo mmɔ: koro ndinam didie mbaŋa adiaha ikɔt mi?

⁸ Edeme mmɔ edi idaŋ afai; enye ɔdɔhɔ nsu: owo eyeda inua-inua eneme ye mbɔhiduŋ esie ufan-ufan, ndien enye anam ŋkari esie ke esit esie.

⁹ Jehovah ete, Nte ndinɔŋɔ mmɔ ufen mbaŋa ŋkpɔ emi? Nte ukpɔŋ mi idisioho usiene ye oruk idut emi?

¹⁰ Nyemen eyet ye ntuaŋa mbaŋa ikpɔ obot, nyemen eseme mbaŋa mbiet wilderness koro esobode mmɔ, owo minyuŋ isaŋake ke esit ibe: ndien mmɔ ikopke uyo ufene; mme inuen enyɔŋ ye mme unam isɔŋ emefeŋe; emedaŋa!

¹¹ Ndien nyenim Jerusalem ke ibombom, ye ke nna mme jackal; nyenyuŋ nnim mme obio Judah; ke ndobo, enana owo eke eduŋde.

¹² Anie owo enyene ibuot, ndien enye eyetim okut ŋkpɔ emi? Ndien anie edi owo emi inua Jehovah ɔdɔhɔde ye enye, ndien enye eyebuk enye? Isɔŋ anam didie atak, abiara nte wilderness eke baba owo keit misaŋake ibe?

¹³ Ndien Jehovah onyuŋ ɔdɔhɔ, ete, Koro mmɔ ekpɔŋde mbet mi oro ŋkenimde ke iso mmɔ, ndien mikopke uyo mi, minyuŋ isaŋake ke esit;

¹⁴ edi mmɔ etiene itun esit mmɔ, ye Baalim eke mme ete mmɔ ekekpepde mmɔ;

¹⁵ mmɔdo ntem ke Jehovah mme udim, Abasi Israel ɔdɔhɔ, ete, Sese, ami nyenɔ mbio emi ndot-ndot ikɔŋ eta, nnyuŋ nnɔ mmɔ mmɔŋ etidot eŋwɔŋ.

¹⁶ Ndien nyesuan mmɔ ke otu mme idut, eke mmɔ ye mme ete mmɔ mikɔfiɔkke, nyenyuŋ ndɔŋ ofut utom, nte ebine mmɔ, tutu nsobo mmɔ mma.

¹⁷ Ntem ke Jehovah mme udim ɔdɔhɔ, ete, Mbufo ekere enyuŋ ekot iban ntuaŋa edi, ndien mmɔ eyedi; enyuŋ edɔŋ ekekot mme ɔfiɔkŋkpɔ iban edi, ndien mmɔ eyedi.

¹⁸ Ndien yak mmɔ ewara emen ntuaŋa ebaŋa nnyin, man mmɔŋeyet oto nnyin ke enyin ɔsuhɔre, man mmɔŋ onyuŋ oto nnyin ke mkpɔk-enyin ewet.

¹⁹ Koro ekopde uyom ntuaŋa emi otode ke Zion, ete, Enam didie esobo nnyin? but anam nnyin eti-eti, koro nnyin ikpɔŋde isɔŋ, koro iduŋ nnyin emesio nnyin eduɔk.

²⁰ Mbufo iban ekop ndien uyo Jehovah, yak utɔŋ mbufo enyuŋ ebɔ uyo inua esie, mbufo enyuŋ ekpep nditɔ-iban mbufo ntuaŋa, yak kpukpru iban enyuŋ ekpep mbɔhiduŋ mmɔ eseme.

²¹ Koro mkpa ɔdɔkde ke window nnyin, oduk ke ikpɔ ufɔk nnyin, ndisibe nditɔwɔŋ ke efak mfep ye mkparawa ke aŋwa obio.

²² Dɔhɔ ete, Ntem ke Jehovah ɔdɔhɔ, ete, Mme okpo owo emeduɔŋɔ nte ifum ke iso isɔŋ, ye nte ebek ibokpot ke edem owo eke ekpeŋede, ndien baba owo kiet eke ataŋde iduhe.

²³ Ntem ke Jehovah ɔdɔhɔ, ete, Owo eti ibuot okubure mbure ke eti ibuot esie, owo uko okunyuŋ obure mbure ke uko esie, owo inyene okunyuŋ obure mbure ke inyene esie:

²⁴ edi yak owo eke oburede, obure ke ŋkpɔ emi, ke eritim mfiɔk mi, koro ami Jehovah nnamde mfɔnido, ye ikpe, ye edinen ido ke ererimbot: koro ŋkpɔ emi enemde mi esit: uyo Jehovah edi emi.

²⁵ Jehovah ɔdɔhɔ ete, Sese, mme usen ke edi eke ndinɔde kpukpru mbon mbobi ufen ŋkɔrɔ ye mbon edut:

²⁶ kpa Egypt, ye Judah, ye Edom, ye nditɔ Ammon, ye Moab, ye kpukpru mmɔ eke efatde ntaŋ-ebek, emi eduŋde ke wilderness: koro kpukpru mme idut edide edut, ofuri ufɔk Israel enyuŋ edi edut ke esit.