JEREMIAH 7 - Edisana ñwed Abasi Ibom

Jeremiah Ɔnɔ Etop ke Temple Ete: Eneŋede Usuŋ ye Edinam Mbufo

¹ UYO emi okoto Jehovah edisim Jeremiah, ete, Kada ke inua-otop ufɔk Jehovah,

² nyuŋ kwɔrɔ ikɔ emi do, nyuŋ dɔhɔ, ete, Ekop uyo Jehovah, mbufo ofuri ufɔk Judah, emi ebede inua-otop emi eduk edituak ibuot enɔ Jehovah.

³ Ntem ke Jehovah mme udim, Abasi Israel, ɔdɔhɔ, ete, Mbufo ekabare usuŋ mbufo ye ido mbufo enam ɔfɔn, ndien ami nyeyak mbufo eduŋ ke ebiet emi.

⁴ Mbufo ekubuɔt idem ke ikɔ nsu, ete, temple Jehovah, temple Jehovah, temple Jehovah edi mme mmɔ emi.

⁵ Edi mbufo ema etim ekabare usuŋ mbufo ye ido mbufo enam ɔfɔn: ema etim enam se inende ke ufɔt owo ye mbɔhiduŋ esie;

⁶ edieke mbufo mitukke esen owo, ye eyen-akpa, ye ebe-akpa, minyuŋ iduɔkke iyip owo eke miduehe isop ke ebiet emi, minyuŋ ibineke abasi efen, eke ɔdiɔkde ye mbufo:

⁷ ndien nyeyak mbufo edu ke ebiet emi, ke nsinsi-nsinsi ke isɔŋ emi ŋkɔnɔde mme ete mbufo.

⁸ Sese, mbufo ke ebuɔt idem ke ikɔ nsu eke midoroke owo udori.

⁹ Nte mbufo eyip inɔ, ewot owo, enyuŋ esin efibe, enyuŋ etomo Abasi ke nsu, enyuŋ efɔp ŋkpɔ enɔ Baal, enyuŋ etiene abasi efen eke mbufo mikefiɔkke,

¹⁰ ndien edi edida ke iso mi ke ufɔk emi ekerede enyiŋ mi, enyuŋ edɔhɔ, ete, Nnyin imɔbɔhɔ man inam ofuri mbubiam emi?

¹¹ Nte mbufo ese ete ke ufɔk emi ekerede enyiŋ mi amakabare edi obube mbon-afai? Ami ŋko, sese, mma ŋkut enye. Ke edi Jehovah ɔdɔhɔ.

¹² Mbufo ekam eka ke ebiet mi oro okodude ke Shiloh, emi ŋkayakde enyiŋ mi oduŋ do akpa, enyuŋ ekut se ŋkanamde ye enye, mbaŋa idiɔk ido ikɔt mi Israel.

¹³ Ndien ke emi ke Jehovah ɔdɔhɔ, ete, Koro mbufo enamde kpukpru ŋkpɔ emi, ndien ami ŋkɔdɔhɔ ye mbufo, mbabak ndɔhɔ, ndien mbufo ikopke; ŋkonyuŋ ŋkot mbufo, ndien mbufo iyereke;

¹⁴ mmɔdo nyenam ye ufɔk emi ekerede enyiŋ mi, emi mbufo ebuɔtde idem ke esit, nyenyuŋ nnam ye ebiet emi ŋkɔnɔde mbufo ye mme ete mbufo, kpa nte ŋkanamde ye Shiloh.

¹⁵ Nyenyuŋ mmen mbufo ke iso mi nduɔk, kpasuk nte ŋkɔduɔkde kpukpru nditɔ-ete mbufo, kpa ofuri ubon Ephraim.

¹⁶ Afo kunam ndien mkpe-ubɔk unɔ mbio emi, kunyuŋ umenere eseme ye akam ubaŋa mmɔ, kunyuŋ ukpe mi ubɔk: koro ami mendikopke uyo fo.

¹⁷ Nte afo ukwe se mmɔ enamde ke mme obio Judah ye ke mme efak Jerusalem?

¹⁸ Nditɔwɔŋ etaŋ ifia, mme ete enyuŋ ebara ikaŋ, iban enyuŋ ebuen ndom-uyo, man enam mfefere uyo enɔ ɔbɔŋ aŋwan enyɔŋ, enyuŋ enwaŋa ediŋwɔŋ uwa enɔ abasi efen, enyuŋ eyat mi esit. Jehovah ɔdɔhɔ, ete, Nte edi ami ke mmɔ eyat?

¹⁹ Nte idige idem-mmɔ? ndien oto do mmɔ eda but ke iso.

²⁰ Mmɔdo ntem ke Ɔbɔŋ Jehovah ɔdɔhɔ, ete, Sese, ke eŋwaŋa iyaresit mi ye ifuresit mi ke ebiet emi, odoro owo, ye ufene, ye eto ikɔt, ye mbuŋwum iŋwaŋ; ndien enye eyesak, idinyuŋ inimeke.

²¹ Ntem ke Jehovah mme udim Abasi Israel ɔdɔhɔ ete, Mbufo ekɔrɔ edifɔp uwa mbufo ke mme uwa emem mbufo, enyuŋ eta unam.

²² Koro mme -ŋkɔdɔhɔke mme ete mbufo, nnyuŋ ŋwukke mmɔ mbaŋa edifɔp uwa ye uwa emem, ke usen oro ŋkosiode mmɔ ke isɔŋ Egypt mfep:

²³ ibɔhɔke ikɔ emi ke ŋkowuk mmɔ, nte, Mbufo ekop uyo mi, ndien nyedi Abasi mbufo, mbufo eyenyuŋ edi ikɔt mi: ndien mbufo eyesaŋa ke ofuri usuŋ oro ŋkowukde mbufo, man ɔfɔn ye mbufo.

²⁴ Ndien mmɔ ikopke, inyuŋ ikpaŋke utɔŋ mmɔ, edi esaŋa ke uduak ye ke itun idiɔk esit mmɔ, enyuŋ efiak edem, ikaha iso.

²⁵ Ɔtɔŋɔde ke usen oro mme ete mbufo eketode ke Egypt edi, tutu osim mfin emi, mma nnyuŋ ndɔŋ kpukpru ikɔt mi mme prophet utom ke ɔtɔ mbufo, kpukpru usen mbabak ndɔŋ:

²⁶ ndien mmɔ ikopke uyo mi, inyuŋ ikpaŋke utɔŋ mmɔ, edi esɔŋ obot-itɔŋ mmɔ: ediɔk ekan mme ete mmɔ.

²⁷ Dɔhɔ mmɔ ndien kpukpru ikɔ emi; edi mmɔ idikokpe uyo fo: nyuŋ fiori kot mmɔ: edi mmɔ idiyereke fi.

²⁸ Nyuŋ dɔhɔ mmɔ, ete, Emi edi idut eke mikopke uyo Jehovah Abasi mmɔ, minyuŋ ibɔhɔ item: akpanikɔ omokure, enyuŋ esibe enye ke inua mmɔ efep.

²⁹ O Jerusalem, fat idet fo nyuŋ duɔk; nyuŋ menere eseme ke ŋkokoŋo ebiet: koro Jehovah amasua onyuŋ ɔduɔk emana emi enye ayatde esit ye mmɔ.

³⁰ Koro nditɔ Judah enamde idiɔk ke enyin mi, Jehovah ɔdɔhɔ: mmɔ emen ŋkpɔ mbubiam mmɔ esin ke ufɔk emi ekerede enyiŋ mi, enyuŋ esabare enye.

³¹ Mmɔ ema enyuŋ ebɔp ŋkokoŋo ebiet o-Topheth emi odude ke itihere eyen Hinnom, enyuŋ efɔp nditɔ-iren mmɔ ye nditɔ-iban mmɔ ke ikaŋ; emi mme -ŋkowukke mmɔ, mikonyuŋ idukke mi ke esit.

³² Jehovah ɔdɔhɔ ete, Sese, oro esin mme usen edi, eke enye midikereke aba Topheth, ye itihere eyen Hinnom, edi Itihere Obom: ndien mmɔ eyebuk owo ke Topheth tutu ebiet iduhe aba.

³³ Ndien ama ekem, mme okpo mbio emi eyekabare edi udia mme inuen enyɔŋ ye eke unam-isɔŋ; baba owo kiet eke ebinde mmɔ efep idinyuŋ iduhe.

³⁴ Ndien ami nyenam uyom mbre, ye uyom idara, uyo ɔdɔ-ŋwan, ye uyo ŋwan ndɔ, odop ke mme obio Judah ye ke mme efak Jerusalem: koro isɔŋ eyebiara.