JEREMIAH 49 - Edisana ñwed Abasi Ibom

Uyo Abasi ke Abaŋa Nditɔ Ammon

¹ EKE nditɔ Ammon. Ntem ke Jehovah ɔdɔhɔ, ete, Nte israel inyeneke nditɔ-iren? Nte enye inyeneke adia-akpa? Nsinam edidem mmɔ adade Gad adia? Nsinam ikɔt esie enyuŋ eduŋde ke mme obio esie?

² Jehovah ɔdɔhɔ ete, Mmɔdo, sese, mme usen ke edi eke ndinamde ekop mkpo ekɔŋ ke Rabbah nditɔ Ammon; ndien enye eyekabare edi ibombom ŋwure, eyenyuŋ efɔp nditɔ-iban esie ke ikaŋ: ndien Israel eyeda mmɔ eke edade enye enyene; Jehovah ɔdɔhɔ.

³ O Heshbon, fiori: koro Ai amabiara: nditɔ iban Rabbah, mbufo eseme, ebɔbɔ ɔfɔŋ-ikpo ke idem; etuaŋa, enyuŋ ebuŋɔ kip esuana ke otu mme ɔkɔ: koro etaŋde edidem mmɔ efep, mme oku esie, ye mbɔŋ esie ɔtɔ kiet.

⁴ Nsinam afo oburede mbure ke mme-ebedeŋ? Ebedeŋ fo ɔfiɔrɔ, O eyen-aŋwan mfiakedem! emi ɔbuɔtde idem ke inyene esie, ete, Anie edisim mi?

⁵ Ɔbɔŋ Jehovah mme udim ɔdɔhɔ ete, Sese, ami nyeda ndik ke kpukpru mmɔ eke ekande fi ekuk, ntiene fi; ndien eyebin mbufo kpukpru eneŋere eka iso; ndien baba owo kiet iditaŋke mbon itɔk.

⁶ Ndien ke ini oro ebede, nyeda nditɔ Ammon emi mmɔ eketaŋde efep mfiak ndi. Edi Jehovah ɔdɔhɔ.

⁷ Eke Edom. Ntem ke Jehovah mme udim ɔdɔhɔ, ete, Nte eti ibuot iduhe aba ke Teman? Nte item amatak ke otu mbon asian?

⁸ Nte ifiɔk mmɔ ɔmɔduɔhɔ? Mbufo efeŋe, ekabare etuŋ ebiet man eduŋ ke esit, O mme andiduŋ Dedan; koro nyeda nsobo Esau, kpa ini ufen esie, ntiene enye.

⁹ Mbon utet vine ekpedi ke ɔtɔ fo, nte mmɔ ikpɔsuhɔke nsit-nsit? Ekpedi inɔ ke okoneyo, mmɔ ekpesobo, adaŋa nte ekemde ye mmɔ.

¹⁰ Koro ami mfɔrɔrede Esau nnim iferi, mmayarare ndibe ebiet esie; ndien enye idikemeke ndidibe; ubon esie emebiara, ye nditɔ ete esie, ye mbɔhiduŋ esie, enye inyuŋ iduhe aba.

¹¹ Kpɔŋ nditɔ akpa fo, nyenim mmɔ ke uwem; ndien yak mme ebe akpa fo ebuɔt idem mmɔ ye ami.

¹² Koro ntem ke Jehovah ɔdɔhɔ, ete, Sese, mmɔ eke mikenyeneke ndiŋwɔŋ cup oro iketreke ndiŋwɔŋ; nte afo edibɔhɔ ndien? Udubɔhɔke bɔhɔ: koro mudutreke ndiŋwɔŋ.

¹³ Koro Jehovah ɔdɔhɔde, ete, Mmotomo idem mi, nte ke Bozrah eyekabare edi ŋwure, ye esuene, ye nsobo, ye isuŋi: kpukpru mme obio esie eyenyuŋ edi nsinsi nsobo.

¹⁴ Mma ŋkop etop emi otode Jehovah, enyuŋ edɔŋ mme isuŋutom ke otu mme idut, ete, Mbufo esop idem, edi ekɔŋ ye enye, enyuŋ edaha ke enyɔŋ eyi ke ekɔŋ.

¹⁵ Koro, sese, mmonim fi ke ekpri ke otu mme idut, ke se owo esede ke ndek.

¹⁶ Ndik fo ye iseŋ esit fo emebiaŋa fi, afo emi oduŋde ke nsiaha itiat, emi adade enyɔŋ obot enyene: koro afo onimde efɔk fo ke enyɔŋ nte ntrukpom, nyesio fi ke esit nsuhɔre: uyo Jehovah edi emi.

¹⁷ Edom eyenyuŋ akabare edi se esobode: kpukpru mmɔ eke esaŋade ebe enye eyekpa idem, enyuŋ esi ebaŋa kpukpru ufen esie.

¹⁸ Jehovah ɔdɔhɔ ete, kpa nte ke ini ekewuride Sodom ye Gomorrah ye mbɔhiduŋ mmɔ, kpa ntre owo ididuŋke do, eyen owo idinyuŋ itiehe do.

¹⁹ Sese, enye eyeto ke iseri Jordan nte lion, ɔdɔk aka ke iduŋ ata ɔkpɔsɔŋ: koro nyeyip enyin nnam enye oto ke esit efehe ndien anie edi edimek owo eke ndinimde ke etubom esie? Koro anie ebiet mi? Anie edinyuŋ odori ini ɔnɔ mi? Anie owo onyuŋ edi ɔbɔk ufene eke edidade ke iso mi?

²⁰ Mbufo ekop ndien uduak Jehovah, emi enye akaduakde abaŋa Edom; ye edikere esie emi enye ekekerede otuk mme andiduŋ Teman: ata ŋkpri ufene iditreke ndiduri mmɔ ke usuŋ: mme iduŋ mmɔ eyekpa idem ebaŋa mmɔ.

²¹ Uyo iduɔ mmɔ eyesin isɔŋ enyek, ama edi eseme, ekop uyom esie ke Ididuot Inyaŋ.

²² Sese, enye eyedɔk, onyuŋ efe nte ntrukpom, onyuŋ atat mba esie ofuk Bozrah: ndien esit mbon uko Edom ke usen oro eyebiet esit aŋwan uman

²³ Eke Damascus. But anam Hamath ye Arpad: koro mmɔ ekopde idiɔk etop: mmɔ eyemere: ndutime mmɔdo ke inyaŋ ibom; enye ikemeke ndina suŋ.

²⁴ Idem emem Damascus, enye akabare ete ifehe, ndik onyuŋ omum enye; ukut ye ubiak nte eke aŋwan uman etuk enye.

²⁵ Enam didie misuhɔke obio itoro? kpa obio idaresit mi?

²⁶ Mmɔdo mkparawa esie eyeduɔŋɔ ke aŋwa esie, kpukpru mbon-ekɔŋ eyenyuŋ etak ke usen oro; uyo Jehovah mme udim edi emi.

²⁷ Ndien nyekim ikaŋ ke ibibene Damascus, ndien enye eyeta ikpɔ ufɔk Benhadad.

²⁸ Ntem ke Jehovah ɔdɔhɔ abaŋa Kedar, ye mme idut Hazor emi Nebuchadrezzar edidem Babylon akasuande, ete. Mbufo edaha ke enyɔŋ edɔk eka ke Kedar, enyuŋ ebiat nditɔ edem usiaha utin.

²⁹ Eyeda me tent mmɔ ye ufene mmɔ; eyemen ikpehe mmɔ ye mkpoduoho mmɔ, ye mme camel mmɔ eda ke idem mmɔ; ndien eyefiori ebaŋa mmɔ, ete, Ndik akan okuk.

³⁰ Jehovah ɔdɔhɔ, ete, Mbufo. O mme andiduŋ Hazor, eyefeŋe anyan itɔk eti-eti, mbufo etuŋ ebiet eke eduŋde ke esit; koro Nebuchadrezzar edidem Babylon aduakde uduak abaŋa mbufo, onyuŋ ekerede ekikere abaŋa mbufo.

³¹ Jehovah ɔdɔhɔ, ete, Mbufo edaha ke enyɔŋ edɔk ke ɔtɔ idut ndue idem, emi eduŋde ke mfre idem, mmɔ inyeneke itim ye eto usin usuŋ, mmɔ eduŋ ke idem mmɔ ikpɔŋ.

³² Ndien mme camel mmɔ eyedi ŋkpɔ mbume, ediwak ufene mmɔ eyenyuŋ edi se edade ke ŋkan-ubɔk: ndien nyesuan mmɔ eke efatde ntaŋ ebek nsin ke ofum kpukpru; nyenyuŋ nda nsobo mmɔ ke edem esie kpukpru ndi: uyo Jehovah edi emi.

³³ Ndien Hazor eyekabare edi iduŋ jackal, ye ndobo ke nsinsi: owo ididuŋke do, eyen owo idinyuŋ idaŋke ke esit.

³⁴ Uyo Jehovah emi okosim Jeremiah prophet abaŋa Elam, ke eritɔŋɔ ubɔŋ Zedekiah edidem Judah, ete,

³⁵ Ntem ke Jehovah mme udim ɔdɔhɔ, ete, Sese, ami mmɔŋ mbuŋ utiga Elam, akpan odudu mmɔ.

³⁶ Ndien nyeda ofum mbinaŋ ke edem ikpa enyɔŋ mbinaŋ ntiene Elam; ndien nyesuan mmɔ nsin ke kpukpru ofum emi; ndien idut eke mbon itɔk Elam midisimke do ididuhe.

³⁷ Ndien nyesin Elam ndik ke iso mme asua mmɔ, ye ke iso mmɔ eke eyomde ukpɔŋ mmɔ; ndien nyeda idiɔk-ŋkpɔ ntiene mmɔ, kpa ikaŋ iyaresit mi, Jehovah ɔdɔhɔ; nyenyuŋ ndɔŋ ofut, nte ebine mmɔ tutu nsobo mmɔ mma.

³⁸ Nyenyuŋ nnim ebekpo mi ke Elam, nnyuŋ nsobo edidem ye mbɔŋ ke esit mfep, Jehovah ɔdɔhɔ.

³⁹ Ndien ama ekem ke utit mme usen, nyeda nditɔ Elam emi eketaŋde efep mfiak ndi. Uyo Jehovah edi emi.