JEREMIAH 47 - Edisana ñwed Abasi Ibom

Uyo Abasi ke Abaŋa mbon Philistine

¹ UYO Jehovah emi okosim Jeremiah prophet abaŋa mme Philistine, ke Pharaoh mika isuanke Gaza.

² Ntem ke Jehovah ɔdɔhɔ ete, Sese, mmɔŋ oto ke edere ɔdɔk, onyuŋ akabare ebiet akamba ɔtɔ, ndien eyetɔ emen isɔŋ ye se iyɔhɔde ke esit, ye obio ye mme andiduŋ enye, ndien owo eyeseme, kpukpru mme andiduŋ isɔŋ eyenyuŋ efiori.

³ Uyom ntim ikpat mkpɔsɔŋ horse esie, ye mkpo chariot esie, ye uyom wheel esie, esin mme ete ekukabare ese nditɔ oto ke mmem-ubɔk mmɔ;

⁴ kabaŋa usen eke edide ndisobo kpukpru mme Philistine, nnyuŋ nsibe kpukpru mme andiŋwam eke esukhɔde ke Tyre ye Zidon mfep: koro Jehovah mmɔŋ osobo mme Philistine, kpa nditɔ isuo Caphtor emi esuhɔde.

⁵ Ibɔ omosim Gaza; Ashkelon amabiara, ye ubak una-isɔŋ eke ɔsuhɔde ɔnɔ mmɔ. Adaŋa didie ke afo edikpi idem fo?

⁶ O ofut Jehovah, ini ewe ke afo edina suŋ? Sin idem fo ke efɔk fo, tie suŋ, nyuŋ dop.

⁷ Afo edinam didie ana suŋ, ke ini Jehovah otobode enye abaŋa Ashkelon ye mben inyaŋ? Do ke enye ɔdɔŋ enye utom.