JEREMIAH 46 - Edisana ñwed Abasi Ibom

Ubiom-Ikpe Abasi Esim Egypt

¹ UYO Jehovah emi okosim Jeremiah prophet abaŋa mme idut.

² Eke Egypt, abaŋa mbon-ekɔŋ Pharaoh Neco edidem Egypt, emi okodude ke mben akpa Euphrates ke Carchemish, emi Nebuchadrezzar edidem Babylon asuande, ke ɔyɔhɔ isua Jehoiakim eyen Josiah edidem Judah, inaŋ.

³ Mbufo etim akamba otu ekɔŋ ye ekpri, enyuŋ eyi ke ekɔŋ.

⁴ Ebɔp horse ŋkpɔ ke idem; mbufo mbon horse edɔk, enyuŋ eyara ndun ukwak, edaha eda; etuk eduat, esine edisine-ŋkpɔ-ekɔŋ.

⁵ Nnam didie ŋkut mmɔ edikhe? Mmɔ ekabare efiak edem; mbon uko mmɔ enyuŋ esuana, enyuŋ efeŋe itɔk, inyuŋ ikabakede ise. Ndik akan okuk; Jehovah ɔdɔhɔ.

⁶ Mbon nsɔp itɔk idifeheke, owo uko idifeheke, owo uko idinyuŋ ibɔhɔke; mmɔ eyetuak ukot eduɔŋɔ ke edem edere, ke mben akpa Euphrates.

⁷ Anie owo ɔdɔk emi ebiet inyaŋ? Mmɔŋ esie oyok nte mme akpa.

⁸ Egypt ke ɔdɔk nte inyaŋ, mmɔŋ onyuŋ oyok nte mme akpa; enye onyuŋ ɔdɔhɔ ete, Nyedɔk mfuk isɔŋ; nyesobo obio ye mme andiduŋ enye.

⁹ Mbufo mme horse edɔk; yak mme chariot edama; yak mbon uko enyuŋ ewɔŋɔ; Ethiopia ye Put emi ekamade otu ekɔŋ; ye mme Ludim emi ekamade enyuŋ enukde utiga.

¹⁰ Koro mfin emi enyenede Ɔbɔŋ Jehovah mme udim, usen usiene eke enye osiode usiene ye mme asua esie: ndien ofut eyedia ɔyuhɔ, onyuŋ ɔŋwɔŋ iyip mmɔ ɔyuhɔ: koro Ɔbɔŋ Jehovah mme udim oninim uwa ke edem edere, ke mben akpa euphrates.

¹¹ O adiaha Egypt eyenɔwɔŋ, dɔk ke Gilead ka da balsam: afo eyenam ibɔk awak ke ikpikpu; idige nte ekɔkde fi.

¹² Mme idut emekop esuene fo, mfiori fo omonyuŋ ɔyɔhɔ ke isɔŋ: koro owo uko atuakde owo uko ke idem, mbiba eduɔ ɔtɔ kiet.

¹³ Uyo emi ke Jehovah ɔdɔhɔ ye Jeremiah prophet, ke ini Nebuchadrezzar edidem Babylon edide ndisuan isɔŋ Egypt.

¹⁴ Mbufo etiŋ ke Egypt, enyuŋ ekwɔrɔ ke Migdol, enyuŋ ekwɔrɔ ke Noph, enyuŋ edɔhɔ ke Tahphanhes, ete, Nim idem, nam ŋkpɔ beŋe ke idem fo; koro ofut adiade akan fi okuk. Ata mkpɔsɔŋ owo fo enam didie eduɔhɔ?

¹⁵ Mmɔ idaha da, koro Jehovah onukde mmɔ ɔduɔk.

¹⁶ Mmɔ eke eduɔŋɔde ewak, owo onyuŋ ɔduɔ mbɔhiduŋ esie ke idem: ndien mmɔ edɔhɔ ete, Daha ke enyɔŋ, ndien nnyin iyefiak ke ɔtɔ oruk nnyin, ye ke isɔŋ emana nnyin, mbak ofut afai.

¹⁷ Mmɔ ekekwɔrɔ do, ete, Pharaoh edidem Egypt omosobo; amayak ini ebe.

¹⁸ Edidem emi enyiŋ esie edide Jehovah mme udim ɔdɔhɔ, ete, Ma uwem mi, nte Tabor ke otu ikpɔ obot, ye nte Carmel ke mben inyaŋ, enye eyedi.

¹⁹ O adiaha emi oduŋde ke Egypt, nam ŋkpɔ ntaŋ-mfep nnɔ idem fo: koro Noph eyekabare edi ŋkpɔ nsobo, eyenyuŋ abiara, ndien owo eke oduŋde ididuhe.

²⁰ Egypt edi ata ediye abak uman enaŋ; nsobo oto ke edem edere edi.

²¹ Mbon-ekɔŋ emi enye ekpede okuk ŋko enyuŋ ebiet enaŋ isek ke otu esie, edi mmɔ ŋko ekabare efeŋe ikpat kiet: ikemeke ndida, koro usen nditaha mmɔ omosim mmɔ, kpa ini ufen mmɔ.

²² Uyo esie eyewɔrɔ nte eke urukikɔt; koro mmɔ esaŋade ke udim ekɔŋ, enyuŋ eda ekuri eduk enye ke esit, kpa nte mme ekpeŋe eto.

²³ Jehovah ɔdɔhɔ ete, Mmɔ eyekpeŋe akai esie, koro mikemeke ndiduŋɔre enye; koro mmɔ ewakde ekan ŋkukuŋkpɔyɔriyɔ, ndien minyeneke ibat.

²⁴ Mmɔ esuene adiaha Egypt; eda enye esin ke ubɔk mbon edere.

²⁵ Jehovah mme udim Abasi Israel ɔdɔhɔ, ete, Sese, ami mmɔŋ nda ufen ntiene Amon emi otode ke No, ye Pharaoh ye Egypt ye mme abasi mmɔ, ye ndidem mmɔ; kpa Pharaoh ye mmɔ eke ebuɔtde idem mmɔ ye enye.

²⁶ Nyenyuŋ nda mmɔ nsin ke ubɔk mmɔ eke eyomde uwem mmɔ, ye ke ubɔk Nebuchadrezzar edidem Babylon, ye ke ubɔk ikɔt esie; ndien ke ini oro ebede owo eyeduŋ ke esit kpa nte ke eset: emi edi uyo Jehovah.

²⁷ O Jacob, owo mi, afo kufehe, ndien, O Israel kunyuŋ ukpa idem: koro, sese, ami nyenyaŋa fi nsio ke anyan ebiet, nyenyaŋa ubon fo nsio ke isɔŋ ntaŋ-mfep mmɔ; ndien Jacob eyefiak edem, onyuŋ etie suŋ, onyuŋ oduŋ ke ifure, ndien baba owo kiet eke anamde enye ndik ididuhe.

²⁸ Jehovah ɔdɔhɔ ete, Afo owo mi Jacob, kufehe: koro ami ndude ye afo: koro nyesobo kpukpru mme idut emi ŋkebinde fi nsin do: edi ndisoboke fi mma, edi nyetunɔ fi ke ufat; ndien ndiyakke fi ɔbɔhɔ ikpikpu.