JEREMIAH 43 - Edisana ñwed Abasi Ibom

Emen Jeremiah ye Mmɔ Emi Ekesuhɔde Eka ke Egypt: Jeremiah Oduri Mmɔ Utɔŋ Abaŋa Ubiom Ikpe Abasi

¹ EDIKEM adaŋemi Jeremiah eketrede ndimen kpukpru ikɔ Jehovah Abasi mmɔ, eke Jehovah Abasi mmɔ ɔkɔdɔŋde enye utom ke ɔtɔ mmɔ abaŋa, ntiŋ nnɔ kpukpru owo, kpa kpukpru ikɔ emi,

² ndien Azariah eyen Hoshaiah, ye Johanan eyen Kareah, ye kpukpru mbon iseri, edɔhɔ Jeremiah ete, Afo osusu: idige Jehovah Abasi nnyin ɔdɔŋ fi edidɔhɔ ete, Mbufo ekuka Egypt ekeduŋ do.

³ Edi Baruch eyen Neriah edemere fi ɔnɔ nnyin, man enye ada nnyin esin mme Chaldean ke ubɔk, man mmɔ ewot nnyin, enyuŋ etaŋ nnyin enyɔŋɔ ke Babylon.

⁴ Ndien Johanan, eyen Kareah ye kpukpru mme etubom mbon-ekɔŋ, ye kpukpru owo eŋwen ikopke uyo Jehovah, ete etie ke isɔŋ Judah.

⁵ Edi Johanan eyen Kareah ye kpukpru mme etubom mbon-ekɔŋ eda ofuri Judah emi esuhɔde, emi eketode ke kpukpru mme idut eke ekebinde mmɔ eka do, enyɔŋ edi ediduŋ ke isɔŋ Judah;

⁶ kpa iren owo, ye iban, ye nditɔwɔŋ, ye nditɔ edidem iban, ye kpukpru owo oro Nebuzaradan etubom mbon ukpeme edidem ɔkɔkpɔŋde onim ye Gedaliah eyen Ahikam eyen Shaphan, ye Jeremiah prophet ŋko, ye Baruch eyen Neriah.

⁷ Ndien mmɔ eka ke isɔŋ Egypt: koro mmɔ minyimeke ndikop uyo Jehovah: ndien mmɔ eka ke Tahpanhes.

⁸ Ekem uyo Jehovah edisim Jeremiah ke Tahpanhes, ete,

⁹ Men ikpɔ itiat ke ubɔk fo, kodip mmɔ ke mbat ke itie ufɔp-brick, emi odude ke inua-otop ufɔk Pharaoh ke Tahpanhes, ke iso mbio Judah; nyuŋ dɔhɔ mmɔ, ete,

¹⁰ Ntem ke Jehovah mme udim Abasi Israel ɔdɔhɔ, ete, Sese, ami nyedɔŋ ekeda Nebuchadrezzar edidem Babylon owo mi edi, nyenyuŋ ndori ebekpo esie ke enyɔŋ mme itiat emi ndipde; ndien enye eyetat ediye ɔfɔŋ ebekpo esie ke enyɔŋ mmɔ.

¹¹ Ndien enye eyedi edisuan isɔŋ Egypt, ada eke mkpa ɔnɔ mkpa; ataŋ eke ntaŋ-mfep efep, ada eke ofut ɔnɔ ofut.

¹² Ndien nyebara ikaŋ ke ufɔk mme abasi Egypt, ndien enye eyefɔp mmɔ, onyuŋ ataŋ mmɔ efep; ndien enye eyeda isɔŋ Egypt esine ke idem, kpa nte ekpemerɔŋ esinede ɔfɔŋ-idem esie; ndien eyewɔrɔ ke esit ke ifure.

¹³ Ndien enye eyenuak mbiet ŋkpɔ Beth-she-mesh emi odude ke isɔŋ Egypt, onyuŋ ɔfɔp ufɔk mme abasi Egypt ke ikaŋ.