JEREMIAH 39 - Edisana ñwed Abasi Ibom

Mbon Ekɔŋ Ekan Jerusalem Ekuk; Obio Ɔbuŋɔ

¹ KE ɔyɔhɔ isua Zedekiah edidem Judah usukkiet, ke ɔyɔhɔ ɔfiɔŋ duop, Nebuchadrezzar edidem Babylon ye ofuri mbon-ekɔŋ esie esim Jerusalem edikan enye ekuk.

² Ke ɔyɔhɔ isua Zedekiah duope-kiet, ke ɔyɔhɔ ɔfiɔŋ inaŋ, ke ɔyɔhɔ usen ɔfiɔŋ usukkiet, obio ɔbuŋɔ.

³ Ndien kpukpru ikpɔ owo edidem Babylon edi editie ke esine ufɔt inua-otop; Nergal - sharezer, Samgar-nebo, Sarsechim etubom mme eunuch, Nergal-sharezer etubom mbon ifiɔk, ye kpukpru ikpɔ owo edidem Babylon eken.

⁴ Edikem adaŋemi Zedekiah edidem Judah, ye kpukpru mbon-ekɔŋ ekutde mmɔ, mmɔ efeŋe, enyuŋ ewɔŋɔ ke obio ke okoneyo, eka usuŋ iŋwaŋ esa edidem, ke inua otop ke ufɔt ibibene iba: ndien enye ɔwɔrɔ aka usuŋ Arabah.

⁵ Ndien mbonekɔŋ mme Chaldean ebine mmɔ ke edem, enyuŋ esim Zedekiah ke una-isɔŋ Jericho; ndien adaŋemi mmɔ emumde enye, mmɔ eda enye edɔk ekesɔk Nebuchadrezzar edidem Babylon ke Riblah ke isɔŋ Hamath; ndien enye ekpe ikpe ye enye.

⁶ Ndien edidem Babylon owot nditɔ-iren Zedekiah ke Riblah ke iso esie: edidem Babylon onyuŋ owot kpukpru ikpɔ owo Judah nko-ŋko.

⁷ Enye onyuŋ etibi Zedekiah enyin, ndien ɔkɔbi ke ŋkpɔkɔbi okpoho, man ada enye aka Babylon.

⁸ Mme Chaldean enyuŋ efɔp ufɔk edidem, ye ufɔk mbio-obio ke ikaŋ; enyuŋ ewuri ibibene Jerusalem.

⁹ Ndien Nebuzaradan etubom mme andikpeme edidem ataŋ mbio-obio efen eke esuhɔde ke obio, ye mmɔ eke ekediande idem ye enye, ye owo efen eke esuhɔde, ɔnyɔŋ ke Babylon.

¹⁰ Ndien Nebuzaradan etubom mme andikpeme edidem ayak ndusuk mbon ubuene eke minyeneke baba ŋkpɔ kiet ɔkpɔŋ ke isɔŋ Judah, onyuŋ ɔnɔ mmɔ iŋwaŋ vine ye iŋwaŋ ke ini oro.

¹¹ Ndien Nebuchadrezzar edidem Babylon okowuk abaŋa Jeremiah ke ubɔk Nebuzaradan etubom mbon ukpeme edidem, ete,

¹² Da enye nyuŋ tiŋ enye enyin ke idem, kunyuŋ unam enye baba idiɔk ŋkpɔ kiet; edi kpa nte enye edidɔhɔde fi, nam kpa ntre ye enye.

¹³ Ndien Nebuzaradan etubom mbon-ukpeme edidem, ye Nubushazban, etubom mme eunuch, ye Nergal-sharezer etu-bom mbon ifiɔk, ye kpukpru ŋkwa owo edidem Babylon;

¹⁴ edɔŋ ekesio Jeremiah ke okure ufɔk ukwak, ndien eda enye enɔ Gedaliah eyen Ahikam, eyen Shaphan, ete osio enye aka ufɔk esiemɔ. Ndien enye ɔduŋ ke otu mbio-obio.

¹⁵ Ekem uyo Jehovah osim Jeremiah ke ini eke ekɔbide enye ebaha ke okure ufɔk ukwak, ete,

¹⁶ Ka kɔdɔhɔ Ebed-melech eyen Ethiopia, ete, Ntem ke Jehovah mme udim Abasi Israel ɔdɔhɔ, ete, Sese, ami mmɔŋ nda uyo mi ntiene obio emi ke idiɔk, idige ke eti; enye eyesu ke iso fo ke usen oro.

¹⁷ Ndien nyenyaŋa fi ke usen oro, Jehovah ɔdɔhɔ; mmɔ idinyuŋ idaha fi isin ke ubɔk mme mmɔ emi afo edikhede ke iso mmɔ.

¹⁸ Koro menditreke ndiyak fi ɔbɔhɔ, afo udunyuŋ uduɔhɔ ke ofut: edi ukpɔŋ fo eyedi okuo ke ŋkpɔ mbume: koro afo ɔkɔbuɔtde idem fo ye ami. Uyo Jehovah edi emi.