JEREMIAH 36 - Edisana ñwed Abasi Ibom

Baruch Okot Ikpa-Ŋwed Enye Ɔbɔde ke Inua Jeremiah Ɔnɔ Ikɔt Abasi ke Ufɔk Abasi

¹ EDIDEM ke ɔyɔhɔ isua Jehoiakim eyen Josiah edidem Judah inaŋ, uyo emi oto Jehovah osim Jeremiah, ete,

² Da ikpa ŋwed ke idem fo, nyuŋ men kpukpru ikɔ oro ŋkɔdɔhɔde fi, mbaŋa Israel ye Judah ye kpukpru mme idut, ɔtɔŋɔde ke usen oro ŋkɔdɔhɔde ye afo, ɔtɔŋɔde ke eyo Josiah, tutu osim mfin emi, wet ke esit.

³ Mme ufɔk Judah eyekop ofuri idiɔk emi ami ŋkerede ndinam mmɔ, man kpukpru mmɔ ekabare ekpɔŋ mme idiɔk usuŋ mmɔ; man ami ndahado ke idiɔk ido mmɔ ye ukwaŋ-ŋkpɔ mmɔ.

⁴ Niden Jeremiah okot Baruch eyen Neriah: ndien Baruch ɔbɔ Jeremiah kpukpru ikɔ Jehovah emi enye ɔkɔdɔhɔde enye ke inua, ewet ke ikpa ŋwed.

⁵ Ndien Jeremiah eteme Baruch, ete, Emekɔbi mi ebaha, ŋkemeke ndika ke ufɔk Jehovah.

⁶ Afo ka ndien kada ikpa emi afo ɔbɔde mi ke inua ewet, tiŋ ikɔ Jehovah ke utɔŋ kpukpru owo ke ufɔk Jehovah ke usen utre-udia: nyuŋ tiŋ mmɔ ŋko ke utɔŋ ofuri Judah emi etode ke mme obio mmɔ edi.

⁷ Mme mmɔ eyesuhɔre idem mmɔ eseme ke iso Jehovah, kpukpru mmɔ enyuŋ efiak edem ekpɔŋ idiɔk usuŋ mmɔ: koro iyaresit ye ifuresit emi Jehovah ɔkɔdɔhɔde abaŋa mbio-obio emi ekponde.

⁸ Ndien Baruch eyen Neriah anam kpukpru, kpa nte Jeremiah prophet eketemede enye, onyuŋ etiŋ ikɔ Jehovah ke ŋwed ke ufɔk Jehovah.

⁹ Edikem ke ɔyɔhɔ isua Jehoiakim eyen Josiah edidem Judah ition, ke ɔyɔhɔ ɔfiɔŋ usukkiet, kpukpru owo ke Jerusalem, ye kpukpru owo emi etode ke mme obio Judah edi ke Jerusalem, ekwɔrɔ utre-udia ke iso Jehovah.

¹⁰ Ndien Baruch emen ŋwed oro etiŋ kpukpru ikɔ Jeremiah ke ufɔk Jehovah, ke ubet Gemariah eyen Shaphan ɔfiɔk-ŋwed, ke enyɔŋ-enyɔŋ okure, ke obufa inua otop ufɔk Jehovah, esin ke utɔŋ kpukpru owo.

¹¹ Ndien Micaiah eyen Gemariah, eyen Shaphan okop kpukpru ikɔ Jehovah emi otode ke ŋwed oro;

¹² ndien enye ɔsuhɔre aka ke ufɔk edidem, oduk ke ubet ewet ŋwed: ndien, sese, kpukpru ikpɔ owo etie do, Elishama ewet ŋwed, ye Delaiah eyen Shemaiah, ye Elnathan eyen Achbor, ye Gemariah eyen Shaphan, ye Zedekiah eyen Hananiah, ye kpukpru ikpɔ owo.

¹³ Ndien Micaiah emen kpukpru ikɔ oro enye okokopde ke ini Baruch okotde ŋwed oro ke utɔŋ kpukpru owo, etiŋ ɔnɔ mmɔ.

¹⁴ Ndien kpukpru mbɔŋ oro edɔŋ Jehudi eyen Nethaniah, eyen Shelemiah eyen Cushi, ɔkɔdɔhɔ Baruch, ete, Da ŋwed oro afo okokotde ke esit ke utɔŋ kpukpru owo kama ke ubɔk fo di. Ndien Baruch eyen Neriah ada ikpa oro ke ubɔk esie, ndien aka ke ɔtɔ mmɔ.

¹⁵ Ndien mmɔ edɔhɔ enye, ete, Tetie, ndien, tiŋ enye ke utɔŋ nnyin. Ndien Baruch etiŋ enye ke utɔŋ mmɔ.

¹⁶ Edikem adaŋemi mmɔ ekopde kpukpru ikɔ oro, kiet edikhe ye kiet, mmɔ enyuŋ edɔhɔ Baruch, ete, Nnyin iditreke nditiŋ kpukpru ikɔ emi nnɔ edidem.

¹⁷ Mmɔ enyuŋ ebup Baruch, ete, Mbɔk, tim sian nnyin usuŋ nte afo ekewetde kpukpru ikɔ emi etode enye ke inua.

¹⁸ Ndien Baruch ɔdɔhɔ mmɔ, ete, Enye eketiŋ kpukpru ikɔ emi ke inua esie, ndien ami nda mmɔŋŋwed ŋwet ke ŋwed emi.

¹⁹ Ndien mbɔŋ oro edɔhɔ Baruch, ete, Ka kodibe, afo ye Jeremiah; mbufo ekunyuŋ eyak owo baba kiet ɔfiɔk ebiet eke mbufo edude.

²⁰ Ndien mmɔ eka ɔtɔ edidem ke okure, enyuŋ eyak ŋwed oro enim ke ubet Elishama ewet ŋwed ndien, mmɔ etiŋ kpukpru ikɔ emi ke utɔŋ edidem.

²¹ Ndien edidem ɔdɔŋ Jehudi, ete enye ada ŋwed oro edi: ndien enye osio ŋwed oro ke ubet Elishama ewet ŋwed edi. Ndien Jehudi okot enye ke utɔŋ edidem, ye ke utɔŋ kpukpru mbɔŋ oro edade ekpere edidem.

²² Ndien edidem etie ke ufɔk ini tuep, ke ɔyɔhɔ ɔfiɔŋ usukkiet: eso ikaŋ onyuŋ asak ke iso esie.

²³ Edikem ke ini Jehudi ama okokot mbak ita mme inaŋ, enye (Jehoiakim) ada ikwa ewet ŋwed osibe mmɔ efep, ada otop ke ikaŋ oro odude ke eso, tutu ofuri ŋwed ama ata ke ikaŋ emi odude ke eso.

²⁴ Edi ndik inamke edidem ye ofuri ikɔt esie emi ekopde kpukpru ikɔ emi, mmɔ inyuŋ iwakke edisine-ŋkpɔ mmɔ.

²⁵ Ndien ŋko Elnathan, ye Delaiah, ye Gemariah ekekpe edidem ubɔk, ete enye okufɔp ŋwed oro, edi enye ikopke uyo mmɔ.

²⁶ Ndien edidem owuk Jerahmeel eyen edidem, ye Seraiah eyen Azriel, ye Shelemiah eyen Abdeel, ete emum Baruch andiwet ŋwed ye Jeremiah prophet: edi Jehovah odip mmɔ.

²⁷ Ndien uyo Jehovah osim Jeremiah, ke adaŋemi edidem ɔkɔfɔpde ŋwed oro, ye ikɔ oro Baruch ɔkɔbɔde Jeremiah ke inua ewet, ete,

²⁸ Tɔŋɔ ntak da ŋwed efen ke idem fo, nyuŋ men kpukpru akpa ikɔ oro ekedude ke akpa ŋwed oro Jehoiakim edidem Judah ɔkɔfɔpde, wet ke esit.

²⁹ Nyuŋ dɔhɔ Jehoiakim edidem Judah, ete, Ntem ke Jehovah ɔdɔhɔ ete, Afo ɔkɔfɔp ŋwed oro, ete, Nsinam afo ekewetde ke esit ete, Edidem Babylon iditreke ndidi ndisobo obio emi, nnyuŋ nnam owo ye unam ekure ke esit?

³⁰ Mmɔdo ntem ke Jehovah ɔdɔhɔ abaŋa Jehoiakim edidem Judah, ete, Enye idinyeneke owo eke editiede ke ebekpo David: ndien eyeduɔk okpo esie enɔ eyo ke uwemeyo, enɔ tuep ke okoneyo.

³¹ Nyenyuŋ nnɔ enye ye ubon esie ye ikɔt esie ufen idiɔk ido mmɔ; nnyuŋ ntiene mme andiduŋ Jerusalem ye mbio Judah ndinam mmɔ ofuri idiɔk-ŋkpɔ emi ŋke-tiŋde nnɔ mmɔ, ndien mmɔ ikopke.

³² Ndien Jeremiah ada ŋwed efen onyuŋ emen enye ɔnɔ Baruch, eyen Neriah ewet ŋwed; ndien enye ɔbɔ Jeremiah kpukpru ikɔ ŋwed oro Jehoiakim edidem Judah ɔkɔfɔpde ke ikaŋ, ke inua, ewet ke esit, onyuŋ ewet ediwak ikɔ efen ebiet mmɔ ɔkɔrɔ ke esit.