JEREMIAH 31 - Edisana ñwed Abasi Ibom

Israel Eŋyɔŋɔ Edi ke Isɔŋ Ntaŋ Mfep

¹ JEHOVAH ɔdɔhɔ, ete, Ke ini oro nyedi Abasi kpukpru ufɔk Israel, ndien mmɔ eyedi ikɔt mi.

² Ntem ke Jehovah ɔdɔhɔ, ete, Mmɔ oro ekebɔhɔde ofut ekut mfɔn ke wilderness; ami ŋkasaŋa nte nnɔ Israel nduɔk-odudu.

³ Ke eyo oko Jehovah okowut mi idem, ete, Mmama fi nsinsi ima: mmɔdo mfɔnde ido ye afo mbigi.

⁴ Nyetɔŋɔ ntak ndiɔŋ fi, ndien eyediɔŋ fi, O adiaha Israel: afo eyetɔŋɔ ntak ada ekɔmɔ fo abana idem, onyuŋ ɔwɔrɔ oduk ke unek mmɔ eke ebrede mbre.

⁵ Afo eyetɔŋɔ ntak ɔtɔ iŋwaŋ-vine ke ikpɔ obot Samaria: mme anditɔ eyetɔ, enyuŋ edia mfri:

⁶ koro usen eyedi eke mbon-ukpeme ke ikpɔ obot Ephraim edikotde, ete, Mbufo edaha ke enyɔŋ, nnyin idɔk ke Zion, ika ɔtɔ Jehovah Abasi nnyin.

⁷ Koro ntem ke Jehovah ɔdɔhɔ, ete, Mbufo ekwɔ ke idaresit enɔ Jacob, enyuŋ efiori ɔkpɔsɔŋ ke otu akpan mme idut: mbufo ekwɔrɔ, etoro, enyuŋ edɔhɔ, ete, O Jehovah, nyaŋa ikɔt fo, nditɔ Isreal emi esuhɔde.

⁸ Sese, ami nyeda mmɔ ke edem edere ndi, nnyuŋ ntaŋ mmɔ ke ŋkaŋ ererimbot mbon, nnan, ye mbuŋɔ, ye oyomo idibi, ye aŋwan uman ɔtɔ kiet: akwa udim eyefiak edi ken.

⁹ Mmɔ eyetua eyet edi: nyenyuŋ nda mmɔ usuŋ ke mkpe-ubɔk: nyeda mmɔ ŋka idim mmɔŋ, nsaŋa ke edinen usuŋ, mmɔ ididuɔŋɔke ke esit: koro ami ndide ete Israel, Ephraim onyuŋ edi akpan mi.

¹⁰ Mbufo mme idut ekop uyo Jehovah, ndien ekwɔrɔ enye ke mme-isuo eke eyomde usuŋ, enyuŋ edɔhɔ, ete, Enye emi akasuande Israel eyetaŋ mmɔ obon, onyuŋ ɔbɔk mmɔ nte ɔbɔk-erɔŋ ɔbɔkde ufene esie.

¹¹ Koro Jehovah amafak Jacob, onyuŋ edep enye osio ke ubɔk emi ɔsɔŋde akan enye.

¹² Ndien mmɔ eyedi edikwɔ ke obot Zion, enyuŋ ebuŋɔ edi ke mfɔn Jehovah: ebaŋa ibokpot ye obufa wine, ye aran, ye nditɔ ŋkpri ufene, ye nditɔ enaŋ: ndien ukpɔŋ mmɔ eyebiet iŋwaŋ eke ɔŋwɔŋde mmɔŋ; ndien mmɔ idiyemekede aba.

¹³ Ndien eyen-aŋwan eyebre ke unek, ye mkparawa ye mbiowo ke ɔtɔ kiet: ndien nyeda inem ŋkpuhɔre eyet mmɔ, nnyuŋ ndɔŋ mmɔ esit, nnyuŋ nnam mmɔ edat esit ke ini ubaha mmɔ okurede.

¹⁴ Nyenyuŋ nnɔ mme oku ikpɔŋ unam eyuhɔ, ikɔt mi eyenyuŋ edia mfɔn mi eyuhɔ: ke edi Jehovah ɔdɔhɔ.

¹⁵ Ntem ke Jehovah ɔdɔhɔ, ete, Ekekop uyom ke Ramah, eseme, ye edidoro ntua-eyet; Rachel ke atua eyet abaŋa nditɔ esie, inyimeke ndikop ndɔŋesit mbaŋa nditɔ esie: koro mmɔ miduhe.

¹⁶ Ntem ke Jehovah ɔdɔhɔ, ete, Dop uyo fo, kutua eyet, tre enyin fo mmɔŋ eyet: koro utom fo enyenede utip, Jehovah ɔdɔhɔ: ndien mmɔ eyeto ke isɔŋ mme asua efiak edi.

¹⁷ Utit fo onyuŋ enyene idori-enyin: Jehovah ɔdɔhɔ. Ndien nditɔ fo eyefiak edi ke adaŋa mmɔ.

¹⁸ Ŋkokop nte Ephraim atuade idem esie, ete, Afo ɔkɔtunɔ mi, ndien ŋkop; ntunɔ, nte abak enaŋ eke mimeheke: kabare mi, ndien nyekabare; koro afo Jehovah edide Abasi mi,

¹⁹ Ŋkɔm, ke adaŋemi ŋkabarede, ntua mkpɔfiɔk: ndien ke adaŋemi esiande mi, nyibi ifuhi mi: but ye ndutime enam mi: koro mbiomde esuene uyen mi.

²⁰ Nte Ephraim edi edima eyen mi? Nte enye edi eyenɔwɔŋ eke enemde owo esit? Koro adaŋa ini nte ndɔhɔde mbaŋa enye, ntreke nditi enye kaŋa: oro esin nsia oyomo mi abaŋa enye; nditreke nditua enye mbɔm: Jehovah ɔdɔhɔ.

²¹ Wuk adaha nɔ idem fo, sin ɔtɔnɔ nɔ idem fo: nim esit fo ke ɔkpɔ-usuŋ, usuŋ oro afo akasaŋade: fiak edem, O adiaha Israel, fiak edem ke mme obio fo emi.

²² Adaŋa didie ke afo ediyɔrɔ, O eyen-aŋwan mfiakedem? Koro Jehovah obotde obufa ŋkpɔ ke ererimbot, ŋwan eyekan eren.

²³ Ntem ke Jehovah mme udim Abasi Israel ɔdɔhɔ, ete, Mmɔ eyesuk edɔhɔ ikɔ emi ke isɔŋ Judah, ye ke mme obio esie, ke ini ndidade mmɔ ke itie-mbuot-ekɔŋ mfiak ndi, ete, Jehovah osuk ɔdiɔŋ fi, O iduŋ eti ido, O edisana obot.

²⁴ Ndien Judah eyeduŋ ke esit, ye kpukpru mme obio esie ɔtɔ kiet, mbon iŋwaŋ ye mmɔ eke esaŋade ye ufene.

²⁵ Koro mmɔnɔ ukpɔŋ mba-ba mmɔŋ ɔŋwɔŋ, mmonyuŋ nyuhɔ kpukpru ukpɔŋ eke efuhɔde.

²⁶ Ndo-ndo oro ami ndemere, ŋkut; idap mi onyuŋ enem mi esit.

²⁷ Jehovah ɔdɔhɔ, ete Sese, mme usen ke edi eke ndidade mkpasip owo ye mkpasip ufene nsuan ke ufɔk Israel ye ke ufɔk Judah.

²⁸ Jehovah onyuŋ ɔdɔhɔ, ete, Ama ekem, kpa nte ŋkpemede mbaŋa mmɔ, man ndibere, nnyuŋ ŋwuri nnyuŋ nsobo, nnyuŋ mbiat, nnyuŋ ntuk: kpasuk ntre ke ndikpeme mbaŋa mmɔ, man mbɔp nnyuŋ ntɔ.

²⁹ Ke ini oro ididɔhɔke aba, ite, Mme ete ekedia ŋkim-ŋkim grape, ndien esin edet nditɔ edoro isuɔ.

³⁰ Edi kpukpru owo kiet kiet eyekpa ke idiɔk ido mmɔ: edet kpukpru owo eke ediade ŋkim-ŋkim grape eyedoro isuɔ.

³¹ Jehovah ɔdɔhɔ, ete, Sese, mme usen ke edi eke ndinamde obufa ediomi ye ufɔk Israel, ye ufɔk Judah;

³² idibietke ediomi oro ŋkodiomide ye mme ete mmɔ, ke usen oro ŋkomumde mmɔ ubɔk, nnyuŋ nsioŋo mmɔ ke isɔŋ Egypt; kpa ediomi mi oro mmɔ ekebiatde, ndien ami ŋkenyene mmɔ: Jehovah ɔdɔhɔ:

³³ koro emi edide ediomi eke ndidiomide ye ufɔk Israel, ke mme usen oro ema ebe, Jehovah ɔdɔhɔ: nyesin mmɔ mbet mi ke esit, nnyuŋ ŋwet mmɔ ke ɔwɔŋ esit; nyenyuŋ ndi Abasi mmɔ, ndien mmɔ eyedi ikɔt mi.

³⁴ Ndien kiet idikpepke aba mbɔhiduŋ esie, ye kiet eyen-ete esie, ite, Mbufo efiɔk Jehovah: koro kpukpru mmɔ, ŋkpri ye ikpɔ, eyefiɔk mi, Jehovah ɔdɔhɔ: koro nyefen mme idiɔk ido mmɔ, ndinyuŋ ntihi aba mme oburobut ido mmɔ.

³⁵ Ntem ke Jehovah emi onimde utin ke uŋwana ke uwemeyo, ye ewukde ɔfiɔŋ ye ntantafiɔŋ ke uŋwana ke okoneyo, emi osukde odut inyaŋ, ke ini enye adahade, Jehovah mme udim edi enyiŋ esie, ɔdɔhɔ ete,

³⁶ Mme ewuhɔ emi ema edaŋa mi ke iso, ndien ubon Israel eyetre ndidi idut ke iso mi ke nsinsi, ke edi uyo Jehovah.

³⁷ Ntem ke Jehovah ɔdɔhɔ, ete, Ema ekeme ndidomo heaven ke enyɔŋ, nnyuŋ nduŋɔre itie-uwuk isɔŋ ke idak, ndien ami nyeduɔk ofuri ubon Israel, mbaŋa kpukpru se mmɔ enamde; Jehovah ɔdɔhɔ.

³⁸ Jehovah ɔdɔhɔ ete, Sese, mme usen ke edi eke mmɔ edibɔpde obio enɔ Jehovah, ɔtɔŋɔde ke edikoŋ ufɔk Hananel tutu osim ke inua-otop inuk.

³⁹ Uruk idomo eyenyuŋ ɔtɔŋɔ ntak ɔwɔrɔ ke edem oko ebe obot Gareb, ndien akabare aka Goah.

⁴⁰ Ndien ofuri ebedeŋ mme okpo ye eke ntɔŋ, ye ofuri ntaŋwaŋ ebiet tutu osim ebedeŋ Kidron, ye inuk inua-otop mme horse, ke edem usiakha-utin, eyedi edisana ebiet Jehovah; ididibekede enye, enye idinyuŋ ibiarake aba ke nsinsi.