JEREMIAH 3 - Edisana ñwed Abasi Ibom

Israel Esin Ndinam Akpanikɔ ye Abasi

¹ KPA nte edɔhɔde ete, Edieke owo osiode ŋwan esiemɔ, ndien ŋwan ɔkpɔŋ enye, onyuŋ akabare edi ŋwan owo efen, nte ebe ekeme ndifiak ntiene enye ŋko? Nte ikpasabakede isɔŋ oro eti-eti? Ndien afo amanam ido akpara ye ediwak mme ufan; edifiak tiene mi; Jehovah ɔdɔhɔ.

² Menere enyin fo se ikpɔ obot, ndien siak ebiet eke mikotke fi do Afo eketie ke mben ɔkpɔ-usuŋ ɔnɔ mmɔ, kpa nte Abraham ke desert. Omonyuŋ asabare isɔŋ ke use fo ke oburobut ido fo

³ Mmɔdo ekekpande ukwɔ, ukperedem edim mikonyuŋ idige; ndien afo emenyene ɔkpɔ-iso akpara, unyimeke ndikut but.

⁴ Nte afo udutɔŋɔke ke emi ukot mi, ete, Ete mi, afo edi ufan uyen mi?

⁵ Nte enye edikɔkɔhɔre ke nsinsi? Nte enye edinim iyaresit tutu amama? Sese, afo ɔmɔdɔhɔ, omonyuŋ anam mme idiɔk ŋkpɔ adaŋa nte ekemede.

⁶ Ndien Jehovah ɔdɔhɔ mi ke eyo Josiah edidem, ete, Nte afo omokut se Israel ama-mfiakedem anamde? Enye asaŋa ke enyɔŋ kpukpru ŋkokoŋo obot, ye ke idak kpukpru awawa eto, onyuŋ anam use do.

⁷ Ndien adaŋemi enye ama akanam kpukpru ŋkpɔ emi, ndɔhɔ, nte, Fiak tiene mi; edi enye ifiakke.

⁸ Ndien Judah eyen-eka esie ama-nsu okut. Ndien okposuk edi nte efibe oro Israel ama-mfiakedem ekesinde, edi ofuri ntak emi ŋkosiode enye, nnyuŋ nnɔde enye ŋwed usio-ndɔ, ŋkut nte ke Judah eyen-eka esie aŋwan ama-nsu ifeheke ndik, edi aka akanam use, kpa enye ŋko-ŋko.

⁹ Ndien edikem enye asabare isɔŋ ke oburobut use esie, onyuŋ esin efibe ye itiat ye eto.

¹⁰ Ndien idem ofuri ŋkpɔ emi isinke Judah ama-nsu eyen eka esie aŋwan afiak etiene mi ke ofuri esit esie, edi ke abiaŋa. Emi edi uyo Jehovah.

¹¹ Ndien Jehovah ɔdɔhɔ mi, ete, Israel ama-mfiakedem ama akaŋ idem esie akan Judah ama-nsu.

¹² Ka kɔkwɔrɔ ikɔ emi se edem edere, nyuŋ dɔhɔ, ete, Jehovah ɔdɔhɔ, ete, O Israel ama-mfiak-edem, fiak edem; ndibɔpke iso mi nse mbufo: koro ami ndide ima, ŋkɔhɔkede ke nsinsi; uyo Jehovah edi emi.

¹³ Diɔŋɔ idiɔk ido fo ikpɔŋ-ikpɔŋ: koro afo emedue Jehovah Abasi fo, onyuŋ asuan usuŋ fo ɔnɔ isen owo ke idak kpukpru awawa eto, mbufo inyuŋ ikopke uyo mi, Jehovah ɔdɔhɔ.

¹⁴ Jehovah ɔdɔhɔ, ete, Mbufo nditɔ mfiakedem efiak edem; koro ami ŋkɔdɔde mbufo: ndien nyeda mbufo kiet ke obio, ye iba ke oruk, nnyuŋ nda mbufo ndi ke Zion:

¹⁵ nyenyuŋ nnɔ mbufo owo eke ebɔkde mbufo nte esit mi amade, ndien mmɔ eyeda ifiɔk ye ɔniɔŋ ebɔk mbufo.

¹⁶ Jehovah onyuŋ ɔdɔhɔ, ete, Ama ekem, koro mbufo eyewak enyuŋ esiaha ke isɔŋ ke eyo oro, mmɔ ididɔhɔke aba, ite, “Ekebe ediomi Jehovah”: enye idinyuŋ idukke aba mmɔ esit: mmɔ idinyuŋ itihi aba enye; inyuŋ iyomke; inyuŋ inamke aba.

¹⁷ Ke ini oro mmɔ eyesio Jerusalem enyiŋ, ete, Ebekpo Jehovah; kpukpru mme idut eyenyuŋ ebono ke esit, ebaŋa enyiŋ Jehovah, ke Jerusalem: ndien mmɔ idisaŋake aba itiene idiɔk isɔŋesit mmɔ.

¹⁸ Ke eyo oro ufɔk Judah eyekɔrɔ ke ufɔk Israel, esaŋa, ndien mmɔ eyeto ke isɔŋ edere esaŋa ikpat kiet edi isɔŋ emi ŋkɔnɔde mme ete mbufo enyene.

¹⁹ Edi ami ndɔhɔ nte, Ndinam didie nsin fi ke otu nditɔ mi, nnyuŋ nnɔ fi isɔŋ inemesit, kpa ata ediye udeme udim mme idut? Ndien ndɔhɔ nte, Kot mi, ete, Ete mi: kunyuŋ ufiak edem ukpɔŋ mi.

²⁰ Ŋkɔm, kpa nte ŋwan abiaŋade ebe esie ɔkpɔŋ enye, kpasuk ntre ke mbufo, O ufɔk Israel, ebiaŋa mi; Jehovah ɔdɔhɔ.

²¹ Emekop uyom ke enyɔŋ ikpɔ obot-eyet ye mkpe-ubɔk nditɔ Israel: koro mmɔ emekwaŋa usuŋ mmɔ, emefre Jehovah Abasi mmɔ.

²² Mbufo nditɔ mfiakedem efiak edi, ndien ami nyekɔk mfiakedem mbufo. “Sese, nnyin itiene fi, koro afo edide Jehovah Abasi nnyin.

²³ Ke akpanikɔ ŋkpri obot ye akwa otu ikpɔ obot edi ŋkpɔ nsu: ke akpanikɔ erinyaŋa Israel odu ke Jehovah Abasi nnyin.

²⁴ Koro ŋkpɔ but oro amadia utom mme ete nnyin toto ke ini uyen nnyin; amadia ŋkpri ufene mmɔ ye enaŋ mmɔ, ye nditɔ-iren mmɔ, ye nditɔ-iban mmɔ.

²⁵ Nnyin isuhɔre ina ke but nnyin, esuene nnyin onyuŋ ofuk nnyin: koro nnyin inamde idiɔk ye Jehovah Abasi nnyin, kpa nnyin ye mme ete nnyin, toto ke ini uyen nnyin, tutu osim mfin emi, nnyin inyuŋ ikopke uyo Jehovah Abasi nnyin.”