JEREMIAH 28 - Edisana ñwed Abasi Ibom

Prophet Hananiah Okut Nsu Nsu Ŋkukut, Enye Ɔbiɔŋɔ Jeremiah Onyuŋ Akpa

¹ EDIKEM ke isua oro, ke eritɔŋɔ ubɔŋ Zedekiah edidem Judah, ke ɔyɔhɔ isua inaŋ, ke ɔyɔhɔ ɔfiɔŋ ition, Hananiah eyen Azzur prophet, emi otode ke Gibeon, ɔdɔhɔ mi ke ufɔk Jehovah, ke iso mme oku ye ofuri mbio-obio, ete,

² Ntem ke Jehovah mme udim, Abasi Israel, ɔdɔhɔ, ete, Mmobuŋ ɔkpɔnɔ edidem Babylon:

³ osuk kaŋa isua iba, ami nyeda kpukpru mkpoduoho ufɔk Jehovah oro Nebuchadnezzar edidem Babylon akataŋde ke ebiet emi, onyuŋ ada mmɔ ɔnyɔŋ ke Babylon, mfiak nnim ke ebiet emi.

⁴ Jehovah onyuŋ ɔdɔhɔ, ete, Ami nyeda Jeconiah eyen Jehoiakim edidem Judah, ye ofuri Judah emi eketaŋde efep enyɔŋ ke Babylon, mfiak ndi ke ebiet emi: Koro nyebuŋ ɔkpɔnɔ edidem Babylon.

⁵ Ndien Jeremiah prophet ɔdɔhɔ Hananiah prophet ke iso mme oku, ye ke iso kpukpru owo emi edude ke ufɔk Jehovah;

⁶ ndien Jeremiah prophet ɔdɔhɔ ete, Amen: Jehovah akpakam anam ntre: Jehovah akpakam anam ikɔ prophecy emi afo etiŋde, ɔsɔŋɔ ada, onyuŋ emen mkpoduoho ufɔk Jehovah, ye kpukpru mbon ntaŋ-mfep ke Babylon onyuŋ edi ke ebiet emi.

⁷ Edi, mbɔk, kop ikɔ emi ndɔhɔde fi ke utɔŋ, ye ke utɔŋ kpukpru owo;

⁸ mme prophet oro ekebemde mi ye afo iso ke eyo oko, ekenyuŋ etiŋde prophecy enɔ ediwak mme idut ye ikpɔ obio, etiŋ ebaŋa ekɔŋ, ye idiɔk-ŋkpɔ, ye udɔŋɔ.

⁹ Ama edi prophet eke etiŋde prophecy emem, ke ini uyo prophet oro osude, eyefiɔk prophet eke Jehovah ɔkɔdɔŋde enye utom ke akpanikɔ.

¹⁰ Ndien Hananiah prophet ɔkɔŋɔre Jeremiah prophet ɔkpɔnɔ oro ke itɔŋ, efep, onyuŋ obuŋ enye.

¹¹ Hananiah onyuŋ ɔdɔhɔ ke iso kpukpru owo, ete, Ntem ke Jehovah ɔdɔhɔ ete, Ntem ke ndibuŋ kpukpru mme idut ɔkpɔnɔ Nebuchadnezzar edidem Babylon ke itɔŋ mfep, ke isua iba ete ikɔyɔhɔ. Ndien Jeremiah prophet ɔnyɔŋ esiemɔ.

¹² Ndien uyo Jehovah osim Jeremiah, ke Hananiah prophet ama okobuŋ Jeremiah prophet ɔkpɔnɔ ke itɔŋ efep ama, ete; Ka kɔdɔhɔ Hananiah, ete,

¹³ Ntem ke Jehovah ɔdɔhɔ, ete, Afo okobuŋ ɔkpɔnɔ eto; ndien eyenam ɔkpɔnɔ ukwak ke ibuot mmɔ.

¹⁴ Koro ntem ke Jehovah mme udim, Abasi Israel, ɔdɔhɔ, ete, Mmɔkɔŋɔ kpukpru mme idut emi ɔkpɔnɔ ukwak ke itɔŋ, man mmɔ ekabare edi ikɔt Nebuchadnezzar edidem Babylon; ndien mmɔ eyenam ŋkpɔ esie: mmonyuŋ nnɔ enye mme unam ikɔt.

¹⁵ Jeremiah prophet onyuŋ ɔdɔhɔ Hananiah prophet, ete, Hananiah, kop ndien: Jehovah ikɔdɔŋke fi; edi afo anam mbio-obio emi ebuɔt idem ke nsu.

¹⁶ Mmɔdo ntem ke Jehovah ɔdɔhɔ, ete, Sese, nyemen fi ke iso isɔŋ nduɔk: afo eyekpa mbun, koro afo ɔdɔhɔde ikɔ emiom ye Jehovah.

¹⁷ Ndien Hananiah prophet akpa ke isua oro ke ɔyɔhɔ ɔfiɔŋ itiaba.