JEREMIAH 27 - Edisana ñwed Abasi Ibom

Idiɔŋɔ Emi Abasi Ɔnɔde Jeremiah ke Ndikɔŋɔ Uruk ye Ɔkpɔnɔ ke Idem esie

¹ KE eritɔŋɔ ubɔŋ Jehoiakim eyen Josiah edidem Judah, ikɔ emi oto Jehovah osim Jeremiah, ete,

² Ntem ke Jehovah ɔdɔhɔ mi, ete; Nam uruk ye ɔkpɔnɔ ke idem fo, ndien kɔŋɔ mmɔ ke itɔŋ fo;

³ ndien sin mmɔ ke ubɔk mme isuŋutom emi edide ke Jerusalem ke ɔtɔ Zedekiah edidem Judah, ete esɔk edidem Edom, ye edidem Moab, ye edidem nditɔ Ammon, ye edidem Tyre, ye edidem Zidon; nyuŋ tobo mmɔ,

⁴ ete edɔhɔ mme ete mmɔ, ete, Ntem ke Jehovah mme udim Abasi Israel ɔdɔhɔ, ete, Mbufo edɔhɔ ntem ye mme ete mbufo, ete,

⁵ Ami ŋkada akwa odudu mi ye edimenere ubɔk mi nnam isɔŋ, ye owo ye unam emi edude ke iso isɔŋ, ndien mmen enye nnɔ owo nte enende mi ke enyin.

⁶ Ndien ke emi ami mmɔŋ nda kpukpru mme idut emi nsin ke ubɔk Nebuchadnezzar edidem Babylon, owo mi, mmonyuŋ nnɔ enye mme unam ikɔt ŋko, nte enam ŋkpɔ esie.

⁷ Ndien kpukpru mme idut eyedi ikɔt esie, ye eke eyen esie, ye eke eyeyen esie, tutu ini idut esie ŋko edi: ndien mkpɔsɔŋ mme idut ye ikpɔ ndidem eyenim enye ke ufin.

⁸ Ndien ama edi idut ye obio eke midinyimeke ndinam ŋkpɔ nnɔ enye, kpa Nebuchadnezzar edidem Babylon, ye eke midinyimeke ndisin itɔŋ mmɔ ke ɔkpɔnɔ edidem Babylon, ami nyeda ofut, ye biɔŋ, ye idiɔk udɔŋɔ nnɔ idut oro ufen, tutu mma mmɔ ke ubɔk esie; emi edi uyo Jehovah.

⁹ Mbufo ekukop ndien mme prophet mbufo ye mbia-idiɔŋ mbufo, ye mme adaba ndap mbufo, ye mbia-inuen mbufo, ye mme nsaŋa ekpo mbufo, emi edɔhɔde mbufo, ete, Mbufo idikabakare idi ikɔt edidem Babylon:

¹⁰ koro mmɔ etiŋde nsu-nsu o-prophecy enɔ mbufo, man esin mbufo edaŋa ekpɔŋ mme obio mbufo anyan ebiet, man ami nnyuŋ mbin mbufo mfep, mbufo enyuŋ etak.

¹¹ Jehovah ɔdɔhɔ ete, Ndien ama edi idut eke edisinde itɔŋ mmɔ ke ɔkpɔnɔ edidem Babylon, enyuŋ enamde ŋkpɔ esie, nyeyak mmɔ etie ke isɔŋ mmɔ; ndien mmɔ eyefuŋ enye enyuŋ eduŋ ke esit.

¹² Ndien ndɔhɔ Zedekiah edidem Judah, nte kpukpru ikɔ emi esaŋade, nte, Mbufo eda itɔŋ mbufo esin ke ɔkpɔnɔ edidem Babylon enyuŋ edi ikɔt esie, ye ikɔt ikɔt esie, ndien edu uwem.

¹³ Nsinam mbufo eyomde ndikpa, afo, ye mbio-obio fo, ke ofut, ye ke biɔŋ, ye ke udɔŋɔ, kpa nte Jehovah ɔdɔhɔde abaŋa idut eke midinyimeke ndinam ŋkpɔ edidem Babylon?

¹⁴ Mbufo ekukop ndien uyo mme prophet emi edɔhɔde mbufo, ete, ke mbufo ididige ikɔt edidem Babylon: koro mmɔ etiŋde nsu-nsu o-prophecy enɔ mbufo.

¹⁵ Koro midige ami ŋkɔdɔŋ mmɔ utom, Jehovah ɔdɔhɔ, ndien mmɔ etiŋ nsu-nsu o-prophecy esin ke enyiŋ mi; man mbin mbufo mfep, man mbufo enyuŋ etak ye mme prophet emi etiŋde prophecy enɔ mbufo.

¹⁶ Ndien ndɔhɔ mme oku ye kpukpru mbio-obio emi, nte, Ntem ke Jehovah ɔdɔhɔ, ete, Mbufo ekukop uyo mme prophet emi etiŋde prophecy enɔ mbufo, ete, Sese, ke emi ke ediwara eda mkpoduoho ufɔk Jehovah ke Babylon edi koro mmɔ etiŋde nsu-nsu o-prophecy enɔ mbufo.

¹⁷ Mbufo ekukop uyo mmɔ, ekabare edi ikɔt edidem Babylon, ndien edu uwem: obio emi edinam didie akabare edi ndon?

¹⁸ Ndien edieke mmɔ edide prophet, ikɔ Jehovah onyuŋ odude ye mmɔ, yak mmɔ ekpe Jehovah mme udim ubɔk, ete mkpoduoho emi esuhɔde ke ufɔk Jehovah, ye ke ufɔk edidem Judah, ye ke Jerusalem, ekuka ke Babylon.

¹⁹ Koro ntem ke Jehovah mme udim ɔdɔhɔ abaŋa mme adaha, ye mkpɔdiɔhɔ-mmɔŋ, ye mme udiɔhɔ-akpaŋkpaŋ, ye mkpoduoho efen emi esuhɔde ke obio emi,

²⁰ emi Nebuchadnezzar edidem Babylon mikemenke ifep, ke ini oro enye akataŋde Jeconiah eyen Jehoiakim edidem Judah, ke Jerusalem ɔnyɔŋ ke Babylon, ye kpukpru mbɔŋ Judah, ye Jerusalem:

²¹ koro ntem ke Jehovah mme udim Abasi Israel ɔdɔhɔ abaŋa mkpoduoho emi esuhɔde ke ufɔk Jehovah, ye ke ufɔk edidem Judah, ye ke Jerusalem, ete:

²² Ke eyeda mmɔ eka Babylon, ndien mmɔ eyedu do tutu ekem ke usen eke ndisede mmɔ; ndien nyeda mmɔ ndɔk ndi, nnyuŋ ntɔŋɔ ntak nsin mmɔ ke ebiet emi; Jehovah ɔdɔhɔ.