JEREMIAH 25 - Edisana ñwed Abasi Ibom

Jeremiah Etiŋ Abaŋa Ntaŋ-Mfep Emi Edisimde Judah ke Ofuri Isua Ata ye duop

¹ IKƆ emi okosim Jeremiah abaŋa ofuri mbio Judah ke ɔyɔhɔ isua Jehoiakim eyen Josiah, edidem Judah, inaŋ, enye edi akpa isua Nebuchadnezzar edidem Babylon:

² emi Jeremiah prophet ɔdɔhɔde ofuri mbio Judah, ye kpukpru mme andiduŋ Jerusalem, ete;

³ Toto ke ɔyɔhɔ isua Josiah eyen Amon edidem Judah duopeta, tutu osim mfin emi, ke ofuri isua edip ye ita emi, uyo Jehovah ama osim mi, mma nnyuŋ ntiŋ nnɔ mbufo, mbabak ndɔhɔ; edi mbufo ikokopke.

⁴ Jehovah ama onyuŋ ɔdɔŋ kpukpru ikɔt esie mme prophet utom ke ɔtɔ mbufo, abak ɔdɔŋ; ndien mbufo ikokopke, inyuŋ ikpaŋke utɔŋ mbufo ikop: ete,

⁵ Mbɔk mbufo kiet kiet ekabare ekpɔŋ mme idiɔk usuŋ mbufo, ye mme idiɔk ido mbufo, enyuŋ eduŋ ke isɔŋ emi Jehovah ɔkɔnɔde mbufo ye mme ete mbufo ke nsinsi:

⁶ mbufo ekunyuŋ ebine abasi efen, man enam ŋkpɔ mmɔ, enyuŋ etuak ibuot enɔ mmɔ; ekunyuŋ eyat mi esit ke se ubɔk mbufo enamde; ndien ndidiɔkke ye mbufo.

⁷ Ndien mbufo ikopke uyo mi, Jehovah ɔdɔhɔ: ndien mbufo eyat mi esit ke se ubɔk mbufo enamde, eke ɔdiɔkde ye mbufo.

⁸ Mmɔdo ntem ke Jehovah mme udim ɔdɔhɔ, ete, Koro mbufo mikopke uyo mi, Jehovah ɔdɔhɔ, ete,

⁹ Sese, mmɔŋ ndɔŋ ekeda kpukpru mme oruk edem edere, nnyuŋ ndɔŋ utom ke ɔtɔ Nebuchadnezzar edidem Babylon owo mi, nnyuŋ nda mmɔ ndi ekɔŋ ye isɔŋ emi, ye mme andiduŋ enye, ye kpukpru mme idut emi ekande enye ekuk; nyenyuŋ nsobo mmɔ, fap, nnyuŋ nnim mmɔ ke ŋwure, ye ŋkpɔ nsi, ye ke nsinsi ndon.

¹⁰ Ndien nyesio uyom idara ye uyom mbre, uyo ɔdɔ-aŋwan ye uyo aŋwan-ndɔ, ye uyom itiat ɔkɔk ibokpot, ye uŋwana utuen-ikaŋ mfep ke esit.

¹¹ Ofuri obio emi eyenyuŋ ekabare edi se esobode enyuŋ ebiatde; ndien mme idut emi eyenam ŋkpɔ edidem Babylon ke ofuri isua ata ye duop.

¹² Ndien Jehovah ɔdɔhɔ ete, Ama ekem ke ini isua ata ye duop emi ekurede, nyeda ufen ntiene edidem Babylon, ye idut oro, kpa idut mme Chaldean, mbaŋa idiɔk ido mmɔ, nyenyuŋ nsin enye ke nsinsi ndon.

¹³ Ndien nyeda kpukpru ikɔ mi emi ŋkɔdɔhɔde mbaŋa isɔŋ oro ntiene enye, kpa kpukpru se ewetde ke ŋwed emi Jeremiah prophet etiŋde prophecy abaŋa kpukpru mme idut.

¹⁴ Koro ediwak mme idut ye ikpɔ ndidem eyenim kpa mmɔ ke ifin: ndien ami nyesio usiene ye mmɔ nte ekemde ye utom mmɔ ye se ubɔk mmɔ enamde.

¹⁵ Koro ntem ke Jehovah Abasi Israel ɔdɔhɔ mi, ete, Bɔ mi cup wine ifuresit emi ke ubɔk, nyuŋ da enye nɔ kpukpru mme idut oro ami ŋkɔdɔŋde fi utom ke otu mmɔ, ete eŋwɔŋ.

¹⁶ Ndien mmɔ eyeŋwɔŋ, enyuŋ efum, enyuŋ edama idat, ebaŋa ofut eke ami ndidɔŋde utom ke otu mmɔ.

¹⁷ Ndien mbɔ Jehovah cup oro ke ubɔk, nda nnɔ kpukpru mme idut oro Jehovah ɔkɔdɔŋde mi utom ke otu mmɔ, nte eŋwɔŋ:

¹⁸ nnɔ Jerusalem, ye mme obio Judah, ye ndidem mmɔ, ye mbɔŋ mmɔ, man nnim mmɔ ke ŋkpɔ ŋwure, ye nsobo, ye nsi, ye isuŋi; kpa nte mfin emi;

¹⁹ nnɔ Pharaoh edidem Egypt, ye ikɔt esie, ye mbɔŋ esie, ye ofuri mbio-obio esie:

²⁰ ye kpukpru mbuaha owo, ye kpukpru ndidem isɔŋ Uz, ye kpukpru ndidem isɔŋ mme Philistine, ye Ashkelon, ye Gaza, ye Ekron, ye ubak Ashdod emi ɔsuhɔde;

²¹ ye Edom, ye Moab, ye nditɔ Ammon;

²² ye kpukpru ndidem Tyre, ye kpukpru ndidem Zidon, ye ndidem isuo emi edude ke edem inyaŋ oko:

²³ Dedan, ye Tema, ye Buz, ye kpukpru mmɔ eke efatde ebek;

²⁴ ye kpukpru ndidem Arabia, ye kpukpru ndidem mbuaha owo emi eduŋde ke wilderness;

²⁵ ye kpukpru ndidem Zimri, ye kpukpru ndidem Elam, ye kpukpru ndidem Media:

²⁶ ye kpukpru ndidem edem edere mkpet-mkpet ye nsan-nsan, kiet ɔkɔrɔ ye eken, ye kpukpru mme idut ererimbot eke edude ke iso isɔŋ: ndien edidem Sheshach eyetiene mmɔ ɔŋwɔŋ.

²⁷ Dɔhɔ mmɔ ndien, ete, Ntem ke Jehovah mme udim, Abasi Israel, ɔdɔhɔ, ete, Mbufo eŋwɔŋ ekpa, enyuŋ ekpɔhi, enyuŋ eduɔŋɔ, ndien ekudaha ke enyɔŋ, ebaŋa ofut eke ami ndidɔŋde utom ke otu mbufo.

²⁸ Ndien ama ekem, ke mmɔ minyimeke ndibɔ fi cup emi ke ubɔk ŋŋwɔŋ, dɔhɔ mmɔ ndien, ete, Ntem ke Jehovah mme udim ɔdɔhɔ, ete, Mbufo iditreke ndiŋwɔŋ.

²⁹ Koro, sese, ami mmɔŋ ntɔŋɔ ndida idiɔk-ŋkpɔ ntiene obio emi ekerede enyiŋ mi, ndien nte mbufo edibɔhɔ ufen kpukpru? Mbufo idibɔhɔke bɔhɔ: koro ami ŋkotde ofut, nte osim kpukpru mme andiduŋ isɔŋ: emi edi uyo Jehovah mme udim.

³⁰ Afo tiŋ ndien kpukpru ikɔ prophecy emi nɔ mmɔ, nyuŋ dɔhɔ mmɔ, ete, Jehovah eyetie ke enyɔŋ ofiori, enyenyuŋ etie ke edisana iduŋ esie osioro uyo esie; enye eyesɔŋ ofiori abaŋa ebiet iduŋ esiemɔ; eyesio mkpo, ebiet eke mme edigi-wine, abaŋa kpukpru mme andiduŋ ererimbot.

³¹ Uyom eyewɔrɔ okosim ke utit ererimbot: koro Jehovah enyenede utɔk ye mme idut, eyekpe ikpe ye ofuri obukidem; eyeda mme idiɔk owo ɔnɔ ofut. Jehovah ɔdɔhɔ.

³² Ntem ke Jehovah mme udim ɔdɔhɔ ete, Sese, idiɔk-ŋkpɔ oto ke idut kiet osim idut eken, akwa oyobio eyenyuŋ edemere ke ŋkaŋ ererimbot.

³³ Ndien mmɔ eke Jehovah ediwotde ke usen oro eyetɔŋɔ ke utit ererimbot ena esim ke utit ererimbot: idituaha mmɔ, idinyuŋ itaŋke, idinyuŋ ibukke, mmɔ eyetie nte ifum ke iso isɔŋ.

³⁴ Mbufo mme ekpemerɔŋ eseme enyuŋ efiori; mme etubom ufene, mbufo emiaŋa ke ntɔŋ: koro ekemde ke usen nte ewotde mbufo enyuŋ esuande mbufo; ndien mbufo eyeduɔŋɔ nte ŋkpɔ uto.

³⁵ Ndien mme ɔbɔk erɔŋ idikwe usuŋ nte efeŋede, mme etubom ufene idinyuŋ ikwe ubɔhɔ.

³⁶ (Ekop) uyo mfiori mme ɔbɔk erɔŋ, ye eseme mme etubom ufene: koro Jehovah amabiat mbiet eke mmɔ etade.

³⁷ Mmɔ enyuŋ esobo mme iduŋ ifure, ebaŋa ikaŋ iyaresit Jehovah.

³⁸ Enye ɔmɔkpɔŋ mfuhɔ ikɔt esie nte lion: koro isɔŋ mmɔ amakabare edi se mmɔ ebiatde, kabaŋa iyaresit owo ŋkanubɔk, ye ikaŋ iyaresit esie.