JEREMIAH 22 - Edisana ñwed Abasi Ibom

Jeremiah Ɔnɔ Etop Abaŋa Idiɔk Ŋkpɔ Mme Ndidem Judah

¹ NTEM ke Jehovah ɔdɔhɔ, ete, Suhɔre ka ke ufɔk edidem Judah, nyuŋ dɔhɔ ikɔ emi do, ete,

² Kop uyo Jehovah, O edidem Judah, emi etiede ke ebekpo David, afo, ye ikɔt fo, ye mbio-obio fo emi esaŋade ke inua-otop emi ebe eduk:

³ ntem ke Jehovah ɔdɔhɔ, ete, Mbufo enam ikpe ye edinen ido, enyuŋ esio owo eke ebumede efep ke ubɔk andituk: ekunyuŋ etuk, ekunyuŋ efik esen owo ye eyen-akpa ye ebe-akpa, ekunyuŋ eduɔk iyip owo eke miduehe, ke ebiet emi.

⁴ Koro mbufo ema etim enam ŋkpɔ emi, ndien ndidem eke etiede ke ibuot David ke ebekpo esie, eyedoro ke chariot ye ke horse ebe inua-otop ufɔk emi eduk, kpa enye, ye ikɔt esie, ye mbio-obio esie.

⁵ Ndien mbufo minyimeke ndikop ikɔ emi, Jehovah ɔdɔhɔ, ete, Mmotomo idem mi, nte, Ufɔk mi iditreke ndikabare ndi ndon.

⁶ Koro ntem ke Jehovah ɔdɔhɔ abaŋa ufɔk edidem Judah, ete, Mbat fi nte Gilead, kpa ibuot Lebanon: edi nyakabare fi edi wilderness, kpa obio eke owo miduŋke.

⁷ Ndien nyenim owo eke esobode fi, kpukpru mmɔ ye ŋkpɔ ekɔŋ mmɔ: ndien mmɔ eyesibe ata ndimek cedar esie, emen eduɔk ke ikaŋ.

⁸ Ndien ediwak mme idut eyesaŋa ebe obio emi, enyuŋ edɔhɔ kiet ye kiet, ete, Nsinam Jehovah akanamde ntem ye akwa obio emi?

⁹ Ndien mmɔ eyebɔrɔ, ete, Koro mmɔ ekekpɔŋde ediomi jehovah Abasi mmɔ, ekenyuŋ etuakde ibuot enɔ abasi efen, enyuŋ enam ŋkpɔ enɔ mmɔ.

¹⁰ Mbufo ekutuaŋa ebaŋa akpa-mkpa, ekunyuŋ eseme enye: etua eyet eti-eti ebaŋa owo eke edikade, koro enye midinyɔŋke aba, midinyuŋ ikwe aba obio emana esie.

¹¹ Koro ntem ke Jehovah ɔdɔhɔ abaŋa Shallum, eyen Josiah edidem Judah, emi akadade ubɔŋ ke itie Josiah ete esie, emi okotode ke ebiet emi aka, enye idinyɔŋke aba idi:

¹² koro enye eyekpa ke ebiet oro ekemende enye efep eka do: idinyuŋ ikwe aba isɔŋ emi.

¹³ Osuk ɔdɔdiɔk ɔnɔ owo eke ɔbɔpde ufɔk esie ke utuk, ye ubet esie ke nnama; eke esinde mbɔhɔ-iduŋ esie anam utom ke ikpikpu, ndien minɔŋɔ enye ŋkpɔ-eyen-utom esie;

¹⁴ eke ɔdɔhɔde, ete, Nyebɔp akwa ufɔk ye ikpɔ ubet enyɔŋ nnɔ idem mi; ndien enye asiak window ɔnɔ idem esie, onyuŋ ɔkɔŋ enye ke cedar, onyuŋ eyet ididuot ke esit.

¹⁵ Nte afo edida itie edidem, koro cedar ɔdɔŋde fi? Nte usɔ ikadiaha ŋkpɔ inyuŋ iŋwɔŋ, inyuŋ inam edinen ikpe, ndien ɔfɔn ye enye?

¹⁶ Enye ekebiere ikpe eyen unana ye eyen ubuene; ndien ɔfɔn; nte oro idige ndifiɔk mi? Jehovah ɔdɔhɔ.

¹⁷ Edi enyin fo ye esit fo isehe baba ŋkpɔ kiet ke mibɔhɔke udori fo, ye iyip owo eke miduehe isop, ete iduɔk enye, ke mibɔhɔke utuk ye nnama, ete inam mmɔ.

¹⁸ Mmɔdo ntem ke Jehovah ɔdɔhɔ abaŋa Jehoiakim eyen Josiah edidem Judah, ete, Mmɔ idituaha enye, ite, O eyen-eka mi! ye, Ah eyen-eka aŋwan! idinyuŋ ituaha enye, ite, Ah Ɔbɔŋ! ye, Ah ubɔŋ esie!

¹⁹ Eyebuk enye nte ebukde ass, eke edudide enyuŋ eduɔkde ko ekpɔŋ enyin-usuŋ Jerusalem.

²⁰ Dɔk ke Lebanon, nyuŋ fiori; nyuŋ menere uyo fo ke Bashan, nyuŋ tie ke Abarim fiori: koro kpukpru mmɔ eke emade fi esuanade.

²¹ Ŋkɔdɔhɔ fi ke ini ifure fo; afo ɔdɔhɔ, ete, “Ndikopke.” Emi edi ido fo, toto ke ini uyen fo: koro afo mukopke uyo mi.

²² Ofum eyebɔk kpukpru mmɔ eke ebɔkde fi, mmɔ eke emade fi eyenyuŋ eka ke otu mbon ntaŋ-mfep: koro but ye esuene eyenam fi ke ini oro ebaŋa kpukpru mme idiɔk ido fo.

²³ O andiduŋ Lebanon, emi enamde efɔk fo ke mme cedar, editua fi mbɔm didie ke ini ndutuhɔ ye ubiak, nte eke aŋwan uman, edisimde fi?

²⁴ Jehovah ɔdɔhɔ, ete, Ma uwem mi, Coniah eyen Jehoiakim edidem Judah ekpetie nte ŋkpɔ ufik-ŋwed ke ubɔk nnasia mi, ŋkpetreke ndifɔrɔde fi mfep ke esit;

²⁵ nyenyuŋ nda fi nsin ke ubɔk mmɔ emi eyomde uwem fo, ye ke ubɔk mmɔ emi afo edikhede iso mmɔ, kpa ke ubɔk Nebuchadrezzar edidem Babylon, ye ke ubɔk mme Chaldean.

²⁶ Ndien nyeda fi, ye uka emi akamande fi nduɔk ke isɔŋ efen eke mbufo mikamanake do; ndien do ke mbufo edikpaŋa.

²⁷ Ndien ama edi isɔŋ emi unyɔŋ ɔdɔŋde mmɔ ukpɔŋ do, mmɔ idifiakke do.

²⁸ Nte owo emi Coniah edi obukpo ibɔk eke asiahade? Nte enye edi ŋkpɔ ufɔk eke baba inem miduhe enye ke esit? Nsinam esiode enye ye nditɔ esie eduɔk? Nsinyuŋ inam edade mmɔ eduɔk ke idut eke mmɔ mifiɔkke?

²⁹ O isɔŋ! isɔŋ! isɔŋ! kop uyo Jehovah.

³⁰ Ntem ke Jehovah ɔdɔhɔ, ete, Mbufo ewet owo emi, ete, anana eyen, owo eke midikwe unen ke uwem esie: koro baba owo nditɔ esie kiet midikwe unen, itie ke ebekpo David, inyuŋ ikara aba ke Judah.