JEREMIAH 19 - Edisana ñwed Abasi Ibom

Ukpepŋkpɔ Otode ke Abaŋ Obot-eso Emi Anuahade

¹ NTEM ke Jehovah ɔdɔhɔ ete, Ka kada abaŋ mbat obot-eso, ye ndusuk mbiowo obio, ye ndusuk mbiowo mme oku:

² ndien wɔrɔ ka ke itihere eyen Hinnom, ke ɔtɔ inua-otop itie ubot-eso, ndien mme ikɔ eke ndidɔhɔde fi tiŋ do;

³ nyuŋ dɔhɔ ete, Mbufo mbɔŋ Judah ye mme andiduŋ Jerusalem, ekop uyo Jehovah; ntem ke Jehovah mme udim Abasi Israel ɔdɔhɔ, ete, Sese, mmɔŋ nda idiɔk-ŋkpɔ ntiene ebiet emi, ndien enye eyeduat utɔŋ kpukpru owo eke ekopde enye.

⁴ Koro mmɔ ekpɔŋde mi, enyuŋ enimde ebiet emi ke esen ebiet, enyuŋ efɔpde ŋkpɔ ke esit enɔ abasi efen, eke mmɔ, ye mme ete mmɔ, ye ndidem Judah mikɔfiɔkke, enyuŋ eduɔk iyip owo eke miduehe isop eyɔhɔ ke ebiet emi;

⁵ mmɔ ema enyuŋ ebɔp edikoŋ ebiet enɔ Baal, man efɔp nditɔ mmɔ ke ikaŋ enɔ Baal ke edifɔp uwa, eke mmeŋkowukke mmɔ, mmeŋkonyuŋ ndɔhɔke, mikonyuŋ idukke mi ke esit: mmɔdo, sese,

⁶ Jehovah ɔdɔhɔ, ete, Ini ke edi eke ebiet emi midikereke aba Topheth, ye Itihere eyen Hinnom, edi eyekere Itihere Uwot-owo.

⁷ Ndien nyesuan uduak Judah ye eke Jerusalem ke ebiet emi, nnyuŋ nnam mmɔ eduɔŋɔ ke ofut ke iso mme asua mmɔ, ye ke ubɔk mmɔ eke eyomde uwem mmɔ: nyenyuŋ nda mme okpo mmɔ nnɔ inuen enyɔŋ ye mme unam isɔŋ eta.

⁸ Ndien nyenim obio emi ke se esobode enyuŋ eside: kpukpru mmɔ eke esaŋade ebe enye eyekpa idem, enyuŋ esi ebaŋa kpukpru ufen esie.

⁹ Ndien nyeda obukidem nditɔ-iren mmɔ, ye obukidem nditɔ-iban mmɔ nnɔ mmɔ eta, kpukpru owo eyenyuŋ eta obukidem mbɔhiduŋ mmɔ ke ukuk obio, ye ke mbaba emi mme asua mmɔ, ye mmɔ eke eyomde uwem mmɔ edisinde mmɔ.

¹⁰ Ndien nuak abaŋ oro ke iso mmɔ eke esaŋade ye afo, Nyuŋ dɔhɔ mmɔ, ete,

¹¹ Ntem ke Jehovah mme udim ɔdɔhɔ ete, Ke ntre ke ndinuak mbio emi ye obio emi, kpa nte owo anuakde abaŋ obot-eso, eke owo mikemeke aba ndidiɔŋ: ndien mmɔ eyebuk owo ke Topheth, tutu ebiet eke ebukde iduhe aba.

¹² Jehovah ɔdɔhɔ ete, Ntem ke ndinam ye ebiet emi, ye mme andiduŋ enye, nnyuŋ nnam obio emi etie nte Topheth:

¹³ ndien ufɔk Jerusalem, ye ufɔk ndidem Judah eyebiet ebiet Topheth, edi edidehe, kpa kpukpru ufɔk eke efɔpde ŋkpɔ ke enyɔŋ ɔkɔm mmɔ enɔ ofuri udim enyɔŋ, enyuŋ eŋwaŋade ediŋwɔŋ uwa enɔ abasi efen.

¹⁴ Ekem Jeremiah oto ke Topheth emi Jehovah ɔkɔdɔŋde enye utom, ete eketiŋ prophecy do, edi edida ke okure ufɔk Jehovah; onyuŋ ɔdɔhɔ kpukpru owo, ete,

¹⁵ Ntem ke Jehovah mme udim Abasi Israel ɔdɔhɔ ete, Sese, mmɔŋ nda ofuri idiɔk-ŋkpɔ oro ŋkɔdɔhɔde mbaŋa enye, ntiene obio emi, ye kpukpru obio-iŋwaŋ esie, koro mmɔ esɔŋɔde obot-itɔŋ mmɔ, ndien mikopke uyo mi.