JEREMIAH 18 - Edisana ñwed Abasi Ibom

Obot-eso ye Mbat Ubot Eso

¹ UYO emi okoto Jehovah osim Jeremiah, ete:

² Daha ke enyɔŋ suhɔre ke ufɔk obot-eso, ndien nyenam fi okop ikɔ mi do.

³ Ndien nsuhɔre ŋka ke ufɔk obot-eso, ndien, sese, enye ke anam utom ke wheel esie.

⁴ Ndien ŋkpɔ oro enye anamde ke mbat eso abiara ke ubɔk andibot; ndien enye ɔtɔŋɔ ntak anam ŋkpɔ efen, kpa nte andibot amade ndinam.

⁵ Ndien uyo Jehovah edisim mi, ete,

⁶ Jehovah ɔdɔhɔ, ete, O ufɔk Israel, nte ndikemeke ndinam ye mbufo kpa nte andibot eso emi anamde? Sese, nte mbat eso emi odude andibot ke ubɔk, kpa ntre ke mbufo edu mi ke ubɔk, O ufɔk Israel.

⁷ Edieke ndɔhɔde ini kiet mbaŋa idut, ye obio, nte nyedibere, nnyuŋ ŋwuri, nnyuŋ nsobo;

⁸ ndien edieke obio oro ŋkɔdɔhɔde mbaŋa, akabarede ɔkpɔŋ idiɔk ido mmɔ, nyefen idiɔk-ŋkpɔ oro ŋkaduakde ndinam mmɔ.

⁹ Ndien edieke ndɔhɔde ke ini efen mbaŋa idut, ye obio, nte nyebɔp nnyuŋ ntɔ:

¹⁰ ndien enye ama anam idiɔk ido ke enyin mi, minyuŋ ikopke uyo mi, nyedahado ndien ke mfɔn oro ŋkɔdɔhɔde, nte nyefɔn ye enye.

¹¹ Kam dɔhɔ ndien ye mbio Judah ye mme andiduŋ Jerusalem, ete, Ntem ke Jehovah ɔdɔhɔ ete, Sese, ami mmɔŋ mbot idiɔk-ŋkpɔ mbaŋa mbufo, nnyuŋ nduak uduak mbaŋa mbufo: yak kpukpru mbufo ndien kiet kiet ekabare ekpɔŋ idiɔk usuŋ mbufo, mbufo enyuŋ eneŋere usuŋ mbufo ye ido mbufo.

¹² Ndien mmɔ edɔhɔ ete, Kukpa ndidɔhɔ: koro nnyin imɔŋ ibine uduak nnyin: kpukpru nnyin iyenyuŋ inam itun esit nnyin.

¹³ Mmɔdo ntem ke Jehovah ɔdɔhɔ ete, Mbufo ebup ndien ke otu mme idut: Anie okokop oruk ŋkpɔ ntem? Eyen aŋwan Israel amanam ata ŋkpɔ ndik.

¹⁴ Nte snow Lebanon edikpɔŋ akwa itiat ke iŋwaŋ? Nte isen ndek mmɔŋ emi ewetde eyesat?

¹⁵ Koro ikɔt mi ema efre mi, efɔp ŋkpɔ enɔ ŋkpɔ nsu, mmɔ esin mmɔ eduɔŋɔ ke usuŋ mmɔ, kpa ɔkpɔ-usuŋ eset, ndien mmɔ esaŋa ke afaŋ, kpa usuŋ eke midiɔŋke.

¹⁶ Ndien mmɔ enam isɔŋ mmɔ akabare edi se ibiarade, ye nsinsi ŋkpɔ nsi: kpukpru mmɔ eke esaŋade ebe eyekpa idem, enyuŋ eyibi ibuot mmɔ.

¹⁷ Nyesuan mmɔ ke iso mme asua, nte ke ofum ikɔrabak; nyewut mmɔ edem, ŋwutke iso, ke usen nnanenyin mmɔ.

¹⁸ Ndien mmɔ edɔhɔ, ete, Mbufo edi, nnyin iduak uduak ibaŋa Jeremiah; koro mme ewuhɔ midikureke oku ke ubɔk, item midinyuŋ ikureke owo eti ibuot, idinyuŋ idige ikɔ edikure mme prophet; mbufo edi, nnyin imia enye ke edeme, ikunyuŋ ikpaŋ utɔŋ ke ikɔ esie baba kiet.

¹⁹ O Jehovah, kpaŋ utɔŋ nɔ mi, nyuŋ kop uyo mmɔ eke etɔhɔde ye ami.

²⁰ Nte edida idiɔk esio usiene eti? Koro mmɔ etibide obube enɔ ukpɔŋ mi. Ti nte ŋkadade ke iso fo, ndidɔhɔ nti ŋkpɔ mbaŋa mmɔ, man nnam iyaresit fo akabare ɔkpɔŋ mmɔ.

²¹ Da ndien nditɔwɔŋ mmɔ nɔ biɔŋ, nyuŋ men mmɔ sin ke ubɔk ofut; yak iban mmɔ ekabare edi mme anana nditɔ, ye mme ebe-akpa; yak mkpa onyuŋ owot irenowo mmɔ; yak ofut onyuŋ ekpeŋe mkparawa mmɔ ke ekɔŋ.

²² Yak ekop eseme eke otode ke ufɔk mmɔ, ke ini afo edidade otu owo edibuat mmɔ: koro mmɔ etibide obube, ete imum mi, enyuŋ ekɔkde afia enɔ ukot mi.

²³ Ndien afo, Jehovah, ɔmɔfiɔk ofuri uduak emi mmɔ eduakde ebaŋa mi, ete iwot mi; kusio isop ubaŋa idiɔk ido mmɔ, kunyuŋ usɔhi oburobut ido mmɔ ke iso fo ufep, edi yak mmɔ etuak eduɔŋɔ ke iso fo; nam ye mmɔ ke ini iyaresit fo.