JEREMIAH 17 - Edisana ñwed Abasi Ibom

Ukwaŋ Ido Judah ye Ufen Emi Abasi Ɔnɔde Mmɔ

¹ EMEDA ntaŋwed ukwak ye iso diamond ewet idiɔk ido Judah: ekap enye esin ke ɔwɔŋ esit mmɔ, ye ke nduk mme itie-uwa mbufo;

² ke ini nditɔ mmɔ etide mme itie-uwa mmɔ, ye mme eto-mkpe mmɔ, ekpere awawa eto, ye ke enyɔŋ ikpɔ obot.

³ O akwa obot mi ke iŋwaŋ, nyeda inyene fo ye kpukpru ŋkpɔ-uto fo nnɔ ke ŋkpɔ mbume, ŋkokoŋo ebiet fo eyedu ke idiɔk ŋkpɔ ke ofuri adaŋa fo.

⁴ Ndien afo eyefep kpa idem fo ke udeme mi emi ŋkɔnɔde fi: ndien nyenam fi anam ŋkpɔ mme asua fo ke isɔŋ eke afo mufiɔkke: koro mbufo ebarade ikaŋ ke iyaresit mi, eyesak ke nsinsi.

⁵ Ntem ke Jehovah ɔdɔhɔ, ete, Osuk ɔdɔdiɔk ɔnɔ owo eke edibuɔtde idem ye owo, onyuŋ onimde obukidem ke ubɔk esie, esit esie onyuŋ ɔwɔŋɔrede ɔkpɔŋ Jehovah.

⁶ Ndien enye eyebiet juniper ke wilderness, idinyuŋ ikwe ini eke eti ŋkpɔ edide; ndien enye eyeduŋ ke edisat ebiet ke wilderness, isɔŋ inuŋ eke owo miduŋke.

⁷ Osuk ɔfɔfɔn ɔnɔ owo eke ɔbuɔtde idem ye Jehovah, eke Jehovah onyuŋ edide iberedem esie.

⁸ Ŋkɔm enye eyebiet eto eke etɔde ke mben mmɔŋ, eke otopde oruŋ esie ke mben akpa, idinyuŋ ikwe ini eke ufiop edide, edi ikɔŋ esie eyedi awawa; idinyuŋ ifeheke ndik ke isua eke eyo adade, idinyuŋ itreke ndiŋwum mfri.

⁹ Esit abiaŋa kpukpru ŋkpɔ, onyuŋ abiara fap; anie edikeme ndifiɔk enye?

¹⁰ Ami Jehovah nduŋɔre esit, ndomo ŋkpɔ esit idem, man nnɔ kpukpru owo nte ekemde ke usuŋ mmɔ, ye nte ekemde ke mfri utom mmɔ.

¹¹ Kpa nte nduduɔk ɔkubɔde nsen, ndien mibotke; kpa ntre ke owo eke ɔkɔde inyene ke usuŋ eke minenke, edikpɔŋ mmɔ ke ufɔt mme usen esie, ndien ke utit esie enye eyekabare edi ndisime.

¹² Ebekpo ubɔŋ ke enyɔŋ toto ke ertitɔŋɔ edi ebiet edisana ufɔk nnyin.

¹³ Idori-enyin Israel edi Jehovah, but eyenam kpukpru mmɔ eke ekpɔŋde fi. Eyewet kpukpru mmɔ eke ekabarede ekpɔŋ mi esin ke ntan-isɔŋ koro mmɔ ekpɔŋde Jehovah, idim mmɔŋ uwem.

¹⁴ Nam udɔŋɔ okure mi, O Jehovah, ndien udɔŋɔ eyekure mi; nyaŋa mi, ndien nyedu ke ifure: koro afo edide itoro mi.

¹⁵ Sese, mmɔ edɔhɔ mi ete, Ikɔ Jehovah odu mmɔŋ? Yak enye edi ndien.

¹⁶ Ndien ami ŋkawarake ndiwɔŋɔre ke eritiene fi nte ekpemerɔŋ, ŋkonyuŋ nyomke usen ata ukut; afo ɔmɔfiɔk: se itode mi ke inua ana fi ke iso.

¹⁷ Kutie ye ami nte ŋkpɔ ndik: afo edi ubɔhɔ mi ke usen idiɔk.

¹⁸ Yak but anam mmɔ eke ekɔbɔde mi, edi kuyak but anam mi: yak idem akpa mmɔ, edi kuyat idem akpa mi: da idiɔk usen tiene mmɔ, nyuŋ sobo mmɔ nsobo iba.

¹⁹ Ntem ke Jehovah ɔkɔdɔhɔ mi, ete, Ka kada ke inua-otop, nditɔ-obio emi ndidem Judah edukde, ye emi mmɔ ewɔŋɔde ke esit, ye ke kpukpru mme inua-otop Jerusalem;

²⁰ nyuŋ dɔhɔ mmɔ, ete, Mbufo ndidem Judah, ye ofuri Judah, ye kpukpru mme andiduŋ Jerusalem, emi edukde inua-otop emi, ekop uyo Jehovah:

²¹ ntem ke Jehovah ɔdɔhɔ ete, Mbufo ekpeme idem mbufo, ndien ekubiom mbiomo ke usen sabbath, ekunyuŋ eda eduk ke inua-otop Jerusalem:

²² mbufo ekunyuŋ esio baba mbiomo kiet ke ufɔk mbufo ke usen sabbath, ekunyuŋ enam baba ubɔk utom kiet: enyɔŋ enim usen sabbath ke edisana, kpa nte ŋkowukde mme ete mbufo.

²³ Ndien mmɔ ikopke, inyuŋ ikpaŋke utɔŋ mmɔ, edi esɔŋɔ obot itɔŋ mmɔ, ndien mmɔ ikopke, inyuŋ ibɔhɔ item.

²⁴ Ndien ama ekem, edieke mbufo editimde ekop uyo mi, Jehovah ɔdɔhɔ, ndien midaha mbiomo iduk ke inua-otop obio emi ke usen sabbath, edi enim usen sabbath ke edisana, ndien minamke baba utom ke esit;

²⁵ ndien ndidem ye mbɔŋ eke etiede ke ebekpo David, eyedoro ke chariot ye ke horse, mmɔ ye ikpɔ owo mmɔ, mbio Judah, ye mme andiduŋ Jerusalem, ebe inua-otop obio emi eduk: ndien mbio emi eyesuk etie ke nsinsi.

²⁶ Ndien mmɔ eyeto ke mme obio Judah, ye ke edem emi akande Jerusalem okuk, ye ke isɔŋ Benjamin, ye ke una-isɔŋ edem inyaŋ, ye ke obot iŋwaŋ, ye ke edem usuk-usuk, eda edifɔp uwa ye uwa emem, ye inuak-udia, ye frankincense, edi, eyenyuŋ eda uwa ekɔm edi ke ufɔk Jehovah.

²⁷ Edi mbufo minyimeke ndikop uyo mi, nnyuŋ nnim usen sabbath ke edisana, man ekunyuŋ ebiom mbiomo eduk ke inua-otop Jerusalem ke usen sabbath; ndien ami nyebara ikaŋ ke inua-otop esie, eke editade ikpɔ ufɔk Jerusalem, ndien idinimeke.