JEREMIAH 16 - Edisana ñwed Abasi Ibom

Uduak Abasi ke Abaŋa Uwem Jeremiah

¹ EDIKEM uyo Jehovah osim mi, ete,

² Kudɔ ŋwan, kunyuŋ ubon nditɔ-iren ye nditɔ-iban ke ebiet emi.

³ Koro ntem ke Jehovah ɔdɔhɔ abaŋa nditɔ-iren ye nditɔ-iban eke emanade ke ebiet emi, onyuŋ abaŋa mme eka mmɔ eke emande mmɔ, onyuŋ abaŋa mme ete mmɔ eke ebonde mmɔ ke isɔŋ emi;

⁴ mmɔ eyekpaŋa udɔŋɔ mkpa; idituaha mmɔ, idinyuŋ ibukke mmɔ; mmɔ eyekabare edi ifum ke iso isɔŋ: eyetak ke ofut, ye ke biɔŋ; mme okpo mmɔ eyenyuŋ edi udia inuen enyɔŋ, ye eke mme unam ikɔt.

⁵ Koro ntem ke Jehovah ɔdɔhɔ, ete, Kuduk ke ufɔk ikpo, kunyuŋ uka ukatua, kunyuŋ utua mmɔ mbɔm: koro mbɔ mbio emi emem mi, ye ima, ye mbɔm; uyo Jehovah edi emi.

⁶ Ŋkpri ye ikpɔ eyenyuŋ ekpaŋa ke isɔŋ emi: mmɔ idibuhɔke, ndien idituaha ibaŋa mmɔ, idinyuŋ ikpihi idem, inyuŋ ikporoke ibuot ibaŋa mmɔ:

⁷ Idinyuŋ ibuŋke uyo inɔ mmɔ ibaŋa ikpo, man edɔŋ mmɔ esit ebaŋa akpa-mkpa; idinyuŋ inɔŋɔ mmɔ cup ndɔŋesit ebaŋa ete mmɔ ye eka mmɔ.

⁸ Kunyuŋ uka ufɔk udia utie ye mmɔ, udia ŋkpɔ unyuŋ uŋwɔŋ:

⁹ koro ntem ke Jehovah mme udim Abasi Israel ɔdɔhɔ, ete, Sese, ami nyenam uyo idara, ye uyo mbre, uyo ɔdɔ-ŋwan, ye uyo ŋwan ndɔ, odop ke ebiet emi, ke enyin mbufo ye ke eyo mbufo.

¹⁰ Ndien ama ekem ke ini afo editiŋde kpukpru ikɔ emi ɔnɔ mbio-obio emi, ndien mmɔ eyedɔhɔ fi, ete, Ke didie ke Jehovah ɔdɔhɔ ofuri akwa idiɔk-ŋkpɔ emi abaŋa nnyin? Nsinyuŋ idi idiɔk ido nnyin, ye oburobut ido nnyin, eke nnyin iduede ye Jehovah Abasi nnyin?

¹¹ Ndien dɔhɔ mmɔ, ete, Jehovah ɔdɔhɔ ete, Koro mme ete mbufo ekekpɔŋde mi, enyuŋ ebinede abasi efen, ekenyuŋ enamde ŋkpɔ enɔ mmɔ, enyuŋ etuakde ibuot enɔ mmɔ, ekenyuŋ ekpɔŋde mi, mikonyuŋ inimke mme ewuhɔ mi;

¹² ndien mbufo ediɔk ndinam ekan mme ete mbufo: ndien, sese, mbufo kiet kiet etiene itun idiɔk esit mbufo, inyuŋ ikopke uyo mi:

¹³ mmɔdo nyesioŋo mbufo ke isɔŋ emi mfep, nda nduɔk ke isɔŋ eke mbufo ye mme ete mbufo mikɔfiɔkke; ndien do ke mbufo edinam ŋkpɔ abasi efen ke uwemeyo ye ke okoneyo, eke mendifɔnke ye mbufo baba.

¹⁴ Jehovah ɔdɔhɔ, ete, Sese, oro esin usen edi eke mididɔhɔke aba, ite “Ma uwem Jehovah emi akadade nditɔ Israel ke isɔŋ Egypt ɔdɔk”;

¹⁵ Edi, “ma uwem Jehovah emi akadade nditɔ Israel ke edem edere, ye ke kpukpru mme idut eke enye ekebinde mmɔ, ɔdɔk”: ndien nyeda mmɔ mfiak ke isɔŋ mmɔ emi ŋkɔnɔde mme ete mmɔ.

¹⁶ Jehovah ɔdɔhɔ, ete, Sese, nyedɔŋ ekekot ediwak mme ɔkɔ-iyak, ndien mmɔ eyekɔ mmɔ; ndien ke ini oro ebede, nyedɔŋ ekekot ediwak ata-utop, ndien mmɔ eyebine mmɔ ke enyɔŋ kpukpru ikpɔ obot, ye ke enyɔŋ kpukpru ŋkpri obot, ye ke nsiaha ikpɔ itiat, efep.

¹⁷ Koro enyin mi esuk ese kpukpru usuŋ mmɔ: mmɔ idikemeke ndidibe iso mi, idiɔk ido mmɔ idinyuŋ ikemeke ndidibe enyin mi.

¹⁸ Ndien nyebem iso nsio usiene mme idiɔk ido mmɔ ye mme ukwaŋ-ŋkpɔ mmɔ utim ikaba; koro mmɔ esabarede isɔŋ mi; enyuŋ eda okpo ŋkpɔ ndek mmɔ, ye mbubiam ŋkpɔ mmɔ esin ke udeme mi eyɔhɔ.

¹⁹ O Jehovah odudu mi, ye ɔkpɔsɔŋ ufɔk mi, ye ebiet ubɔhɔ mi ke ini ukut, mme idut eyeto ke mme utit isɔŋ etiene fi, enyuŋ edɔhɔ, ete, Ŋkɔm mme ete nnyin ekedia akpa nsu, ye ikpikpu ŋkpɔ, baba kiet eke odorode udori inyuŋ iduhe ke otu mmɔ.

²⁰ Nte owo edinam abasi ɔnɔ idem esie, ndien mmɔ idige abasi?

²¹ Mmɔdo sese, nyenam mmɔ efiɔk ke ini kiet emi, nyenam mmɔ efiɔk ubɔk mi ye odudu mi; ndien mmɔ eyefiɔk ete ke enyiŋ mi edi Jehovah.