JEREMIAH 15 - Edisana ñwed Abasi Ibom

Abasi Idifiakke Edem ke Ndinɔ Judah Ufen

¹ NDIEN Jehovah ɔdɔhɔ mi, ete, Moses ye Samuel ekpedu ke iso mi, ukpɔŋ mi ikpamaŋa mbio emi: sio mmɔ ke iso mi duɔk, yak mmɔ enyuŋ ewɔŋɔ.

² Ndien ama ekem, ke mmɔ edidɔhɔde fi, ete, Nnyin idiwɔŋɔ ika mmɔŋ? Dɔhɔ mmɔ ndien, ete, Ntem ke Jehovah ɔdɔhɔ, ete, Mmɔ emi enimde mmɔ enɔ mkpa, ewɔŋɔ eka mkpa, ye mmɔ emi enimde mmɔ enɔ ofut, ewɔŋɔ eka ofut, ye mmɔ eke akaŋ eka akaŋ, ye mmɔ eke ntaŋ-mfep, yak etaŋ mmɔ efep.

³ Jehovah ɔdɔhɔ, ete, Nyeda oruk ŋkpɔ inaŋ nnɔ mmɔ ufen: ofut eke owotde, ye ebua eke edudide, ye mme inuen enyɔŋ, ye mme unam ikɔt eke etade enyuŋ ebiatde.

⁴ Ndien nyeda mmɔ nnɔ kpukpru mme idut ke ererimbot ke se etuhɔde, ke ikɔ Manasseh eyen Hezekiah edidem Judah, mbaŋa se enye akanamde ke Jerusalem.

⁵ Koro anie owo editua fi mbɔm, O Jerusalem? Anie edinyuŋ eseme fi? Anie edinyuŋ awaha ndibup mme ŋkpɔ ɔfɔn fi?

⁶ Jehovah ɔdɔhɔ, ete, Afo ɔmɔkpɔŋ mi, amafiak edem: ndien nyenyan ubɔk mi ntuk fi, nnyuŋ nsobo fi; mkpɔfiɔk efek mi.

⁷ Ndien nyeda usak-ŋkpɔ nsak mmɔ ke inua-otop isɔŋ; mmɔbɔ ikɔt mi nditɔ mmɔ, nnyuŋ nsobo mmɔ, mmɔ ikabakede ikpɔŋ usuŋ mmɔ.

⁸ Mme ebe-akpa mmɔ ewak enɔ mi ekan ntan inyaŋ: nda owo eke osobode ntiene mmɔ, ntiene eka ye mkparawa, ke ufɔt uwemeyo: mmanam ubiak ye akwa ndik eduɔ enye ke idem ke isɔrɔ kiet.

⁹ Ŋwan eke amande itiaba akpa mba; ɔduɔk ukpɔŋ esie; utin esie omosop ke uwemeyo osuk odude: but ye ndutime enam enye: ndien nyeda mmɔ eke esuhɔde nnɔ ofut ke iso mme asua mmɔ. Emi edi uyo Jehovah.

¹⁰ Ɔdiɔk ye ami, O eka mi, koro afo akamande mi owo utɔk, ye owo eŋwan ɔnɔ ofuri isɔŋ! Ami nnɔŋɔ owo ŋkpɔ ke ebuɔt, owo inyuŋ inɔŋɔ mi ke ebuɔt; kpukpru owo etɔk mi.

¹¹ Jehovah ɔdɔhɔ, ete, Nditreke nditat fi nnɔ mfɔn; nditreke ndinam mme asua ekpe fi ubɔk ke ini idiɔk ye ke ini ukut.

¹² Nte owo ekeme ndibuŋ ukwak, kpa ukwak ye okpoho eke etode ke edem edere?

¹³ Nyeda inyene fo ye ŋkpɔ-uto fo, nnɔ ke ŋkpɔ mbume, nnɔŋɔ ke ekɔm-urua, edi mbaŋa kpukpru mme idiɔk ido fo, ye ke esit ofuri adaŋa fo.

¹⁴ Ndien nyenam mme asua fo ebe eduk ke idut kiet eke afo mufiɔkke: koro ikaŋ obuberede ke iyaresit mi, eyesak mbufo ke idem.

¹⁵ O Jehovah, afo ɔmɔfiɔk: ti mi nyuŋ di dise mi, nyuŋ sio usiene ye mmɔ eke ekɔbɔde mi nɔ mi; kuda mi ufep ke anyan ime fo: fiɔk nte mbiomde esuene mbaŋa fi.

¹⁶ Emekut ikɔ fo, ndien ndia mmɔ; ndien ikɔ fo, ekabare edi ŋkpɔ idara ye inemesit mi: koro ŋkerede enyiŋ fo, O Jehovah Abasi mme udim.

¹⁷ Ŋketiehe ke odu mbon nsahi, nnyuŋ nnamke mbubru; ubɔk fo esin mi ntie ikpɔŋ: koro afo adade iyaresit ɔyɔhɔ mi ke idem.

¹⁸ Nsinam ubiak mi ebigide ke nsinsi? Nsinam unan ɔdiɔkde mi ntem, minyimeke ndikpa? Nte afo ɔmɔŋ etie ye ami nte osu-nsu, ye nte mmɔŋ eke asatde.

¹⁹ Mmɔdo ntem ke Jehovah ɔdɔhɔ, ete, Edieke afo afiakde edi, nyeda fi mfiak ndien, afo eyeda ke iso mi: ndien edieke afo osiode ŋkpɔ-uto ke ŋkpɔ ndek efep, afo eyekabare nte inua mi. Mmɔ eyefiak etiene fi; edi afo udufiakke utiene mmɔ.

²⁰ Ndien nyenim fi ke ɔkpɔsɔŋ ibibene okpoho nnɔ mbio-obio emi; ndien mmɔ eyeŋwana ekɔŋ ye afo, edi idikemeke ubɔk ye afo: koro ami ndude ye afo, nnyuŋ nnyaŋa fi, nnyuŋ nsio fi.

²¹ Uyo Jehovah edi emi. Ndien nyesio fi ke ubɔk mme idiɔk owo mfep, nnyuŋ mfak fi nsio ke ubɔk mbon ndik.