JEREMIAH 12 - Edisana ñwed Abasi Ibom

Mme Mbume Emi Jeremiah Obupde Abasi ye Mme Ibɔrɔ Emi Abasi Ɔkɔnɔde Enye

¹ O JEHOVAH, afo enenen: koro nyekpe ikpe ye afo: yak ndɔhɔ ye afo mbaŋa ikpe: mme idiɔk owo enam didie ekut unen ke usuŋ mmɔ? Kpukpru mbon nsu enam didie etie ke ifure?

² Afo ɔkɔtɔ mmɔ ke isɔŋ, mmɔ enyuŋ emum ŋkam ke isɔŋ: eka iso, enyuŋ eŋwum mfri: afo emekpere ke inua mmɔ, edi oyom usuŋ ye ŋkpɔ esit idem mmɔ.

³ Ndien afo ɔmɔfiɔk mi, O Jehovah: afo ke okut mi, onyuŋ odomo nte esit mi etiede ye afo: sioŋo mmɔ nte ufene nɔ, ete ekewot, nyuŋ dianare mmɔ nim ke usen afai.

⁴ Adaŋa didie ke isɔŋ editua, mbiet kpukpru iŋwaŋ edinyuŋ asat, abaŋa mme idiɔk ido mmɔ eke eduŋde ke esit? Mme unam ye inuen emesobo: koro mmɔ ekedɔhɔde ete, Baba owo kiet idikwe utit nnyin.

⁵ Koro afo ekefehede mbuba ye mme asaŋa ukot, ndien mmɔ enam fi akpa mba, afo edinam didie ndien amia ata ye horse? Ndien afo edue idem ke isɔŋ emem, edi edinam didie ke iseri Jordan?

⁶ Koro nditɔ-usɔ ye ufɔk usɔ, kpa mmɔ ebiaŋade fi; enyuŋ efiori ekot fi ɔkpɔsɔŋ; kunim uyo mmɔ ke akpanikɔ: koro mmɔ edɔhɔde eti ikɔ ye afo.

⁷ Mmɔkpɔŋ ufɔk mi, mmemen udeme mi nduɔk; mmada enye emi ukpɔŋ mi amade nsin mme asua esie ke ubɔk.

⁸ Udeme mi amakabare etie ye ami nte lion ke akai; enye osioro uyo esie abaŋa mi: oro esin mi nsua enye.

⁹ Nte udeme mi etie ye ami nte ekpaŋ-ekpaŋ inuen? Nte mme inuen ekan enye ekuk? Mbufo eka ekebon kpukpru mme unam ikɔt, eda mmɔ edi ke itie udia

¹⁰ Ediwak mme ekpemerɔŋ emebiat iŋwaŋ-vine mi, emedigi udeme mi ke ukot, emenim edinem udeme mi ke desert nditaha.

¹¹ Emenim enye ke ŋkpɔ nditaha, enye omosobo, atua ɔnɔ mi; ofuri isɔŋ amabiara, koro baba owo kiet eke ekerede ke esit miduhe.

¹² Mmɔ eke ebiatde emedɔk ke enyɔŋ kpukpru ikpɔ obot ke wilderness: koro ofut Jehovah adiade, ɔtɔŋɔde ke utit isɔŋ kiet tutu osim utit isɔŋ eken: baba obukidem idikwe emem.

¹³ Mmɔ eketɔ wheat ke isɔŋ, ndien ekpeŋe mbarekpe: ekpa mba, edi idikwe udori: mmɔ eyekut but ebaŋa mbuŋwum mbufo, oto ke ikaŋ iyaresit Jehovah.

¹⁴ Ntem ke Jehovah ɔdɔhɔ abaŋa kpukpru mme idiɔk mbɔhiduŋ mi, emi etukde udeme emi ŋkɔnɔde ikɔt mi Israel enyene; ete, Sese, nyedibere mmɔ ke isɔŋ mmɔ mfep, nnyuŋ ndibere ufɔk Judah ke ufɔt mmɔ.

¹⁵ Ndien ama ekem ke adaŋemi ndiberede mmɔ mma, nyetɔŋɔ ntak ntua mmɔ mbɔm, nnyuŋ nda mmɔ mfiak kiet kiet ke udeme mmɔ, ye kiet kiet ke obio mmɔ.

¹⁶ Ndien ama ekem edieke mmɔ editimde ekpep ido ikɔt mi, enyuŋ etomo enyiŋ mi, ete, Ma uwem Jehovah; kpa nte mmɔ ekekpepde ikɔt mi nditomo Baal; ndien eyewuk mmɔ enim ke otu ikɔt mi.

¹⁷ Edi edieke mmɔ minyimeke ndikop, nyedibere idut oro, ndien, ndibere nnyuŋ usuan: uyo Jehovah edi emi.