JEREMIAH 11 - Edisana ñwed Abasi Ibom

Nditɔ Israel ye Judah Ebiat Ediomi Mmɔ ye Abasi

¹ IKƆ emi okoto Jehovah edisim Jeremiah, ete,

² Mbufo ekop ikɔ ediomi emi, enyuŋ etiŋ enɔ nditɔ Judah ye mme andiduŋ Jerusalem;

³ nyuŋ dɔhɔ mmɔ, ete, Ntem ke Jehovah Abasi Israel ɔdɔhɔ, ete, Osuk ɔdɔdiɔk ɔnɔ owo eke midikopke ikɔ ediomi emi,

⁴ Kpa se ŋkowukde mme ete mbufo ke usen oro ŋkosiode mmɔ ke isɔŋ Egypt, ke akwa ikaŋ ukwak, nte, Mbufo ekop uyo mi, enyuŋ enam mmɔ, kpa nte asaŋade ye kpukpru se ŋkowukde mbufo: ndien mbufo eyedi ikɔt mi, ndien ami nyedi Abasi mbufo:

⁵ man nnim uŋwɔŋɔ oro ŋkɔŋwɔŋɔde nnɔ mme ete mbufo, nte ke ndinɔ mmɔ isɔŋ emi ɔfiɔrɔde mmɔŋ-eba ye aran-ɔkwɔk, kpa nte edide mfin emi. Ndien ami mbɔrɔ, nte, Amen, O Jehovah.

⁶ Ndien Jehovah ɔdɔhɔ mi, ete, Taŋa kpukpru ikɔ emi ke mme obio Judah, ye ke mme efak Jerusalem, ete, Mbufo ekop ikɔ ediomi emi, enyuŋ enam mmɔ.

⁷ Koro mma ntim ŋwuk mme ete mbufo ke usen oro ŋkadade mmɔ ke isɔŋ Egypt ndɔk, tutu osim mfin emi, mbabak ŋwuk, nte,

⁸ Mbufo ekop uyo mi. Edi mmɔ ikopke, inyuŋ ikpaŋke utɔŋ mmɔ, edi kpukpru owo kiet kiet esaŋa ke itun idiɔk esit mmɔ. Ndien nyeda kpukpru ikɔ ediomi oro ŋkowukde nte enam, ndien mmɔ minamke, nda ntiene mmɔ.

⁹ Ndien Jehovah ɔdɔhɔ mi, ete, Idiɔk ediomi mmɔ ke otu nditɔ Judah ye mme andiduŋ Jerusalem.

¹⁰ Mmɔ efiak edem ke mme idiɔk ido akpa mme ete mmɔ oro mikenyimeke ndikop ikɔ mi; ndien mmɔ ebine abasi efen enyuŋ enam ŋkpɔ mmɔ: ufɔk Israel ye ufɔk Judah emebiat ediomi mi oro ŋkanamde ye mme ete mmɔ.

¹¹ Mmɔdo ntem ke Jehovah ɔdɔhɔ, ete, Sese, ami nyeda idiɔk ŋkpɔ kiet eke mmɔ mikemeke ndiwɔrɔ ke esit, ntiene mmɔ; ndien mmɔ eyeseme enɔ mi, edi ami ndikopke uyo mmɔ.

¹² Ndien mme obio Judah ye mme andiduŋ Jerusalem eyeka ekeseme enɔ mme abasi oro mmɔ ekefɔpde ŋkpɔ enɔ mmɔ: edi mmɔ idikemeke ndinyaŋa mmɔ ke ini ukut mmɔ.

¹³ Koro mme abasi fo ekemde ke ibat mme obio fo, O Judah; mbufo emenyuŋ enim itie-uwa ekem ke ibat mme efak Jerusalem, enɔ oburobut ŋkpɔ oro, kpa itie-uwa eke efɔpde ŋkpɔ enɔ Baal.

¹⁴ Afo kunam mkpeubɔk ndien, unɔ mbio emi, kunyuŋ umenere mfiori ye eseme ubaŋa mmɔ: koro mmendikopde ke ini eke mmɔ esemede ekot mi ebaŋa idiɔk itie ukut mmɔ.

¹⁵ Edima ikɔt mi esaŋa nso ke ufɔk mi, eke mmɔ enamde oburobut ŋkpɔ emi ewakde ntem? Ndien edisana unam eyedaha ɔkpɔŋ fi: koro afo anamde idiɔk, ndien ebre mbre.

¹⁶ Jehovah okosio fi enyiŋ, ete, Awawa olive, ediye ke mfri ye ke idem. Ke uyo akwa mkpo ke enye okokim ikaŋ ke esit, ndien ŋkɔk esie emebuŋɔ.

¹⁷ Ndien Je-hovah mme udim emi ɔkɔtɔde fi ke isɔŋ, ɔdɔhɔ idiɔk abaŋa fi, abaŋa idiɔk ido ufɔk Israel, ye eke ufɔk Judah oro mmɔ ekenamde ke idem mmɔ, enyuŋ eyatde mi esit ke erifɔp ŋkpɔ nnɔ Baal.

¹⁸ Ndien Jehovah asian mi, ndien mfiɔk: ndien afo owut mi ido mmɔ.

¹⁹ Ndien ami mbiet suŋ-suŋ eyen erɔŋ eke edade ekewot. Ndien ami mfiɔkke nte ekeduakde uduak ebaŋa mi, ete, Eyak nnyin isobo eto ye mfri esie, inyuŋ isibe enye ifep ke isɔŋ mme andidu uwem: ndien mmɔ iditihi aba enyiŋ esie.

²⁰ Edi O Jehovah mme udim, emi ekpede edinen ikpe, odomo nsia ye esit, nyekut nte afo osiode usiene ye mmɔ: koro mmayarade ikɔ mi nnɔ fi.

²¹ Mmɔdo, ntem ke Jehovah ɔdɔhɔ abaŋa nditɔ Anathoth, emi eyomde uwem fo, ete, Kuda enyiŋ Jehovah utiŋ prophecy, mbak afo edikpa ke ubɔk nnyin:

²² mmɔdo ntem ke Jehovah mme udim ɔdɔhɔ, ete, Sese, ami nyenɔ mmɔ ufen; mkparawa mmɔ eyekpaŋa ke ofut: nditɔ-iren mmɔ ye nditɔ-iban mmɔ eyekpaŋa ke akaŋ:

²³ ndien baba owo kiet idisuhɔke inɔ mmɔ: koro nyeda idiɔk ntiene mbio-obio Anathoth, kpa isua ufen mmɔ.