JEREMIAH 10 - Edisana ñwed Abasi Ibom

Ukpono Mme Esen Abasi Ada Ŋwure Ɔsɔk Israel

¹ O UFƆK Israel, mbufo ekop ikɔ emi Jehovah ɔdɔhɔde mbufo:

² ntem ke Jehovah ɔdɔhɔ, ete, Mbufo ekukpep usuŋ mme idut, ekunyuŋ eyomo nsia ebaŋa mme idiɔŋɔ ikpa-enyɔŋ: koro nsia oyomode mme idut ebaŋa mmɔ.

³ Koro mme ewuhɔ mme idut edide oburobut: koro edide eto, owo ekpi enye osio ke akai, utom ubɔk owo usɔ ye ekuri.

⁴ Mmɔ ebana enye ke silver ye gold; eda okpukwak ye hammer enam enye ɔsɔŋ, ndien enye isehekede.

⁵ Mmɔ edi ofuri-ofuri nte eyop, ndien mmɔ idɔhɔke ikɔ: enyene ndibiom mmɔ, koro mmɔ misaŋake. Mbufo ekubak mmɔ; koro mmɔ mikemeke ndinam idiɔk, inyuŋ idige nte mmɔ enamde eti ŋkpɔ.

⁶ Baba ŋkpɔ kiet ibietke fi, O Jehovah; afo omokpon, enyiŋ fo omonyuŋ okpon ke odudu.

⁷ Anie midibakke fi, O Edidem mme idut? Koro odotde fi: koro baba kiet eke ebietde fi miduhe ke otu kpukpru mme ɔfiɔkŋkpɔ owo mme idut, ye ke kpukpru mme obio mmɔ.

⁸ Ndien mmɔ etie nte unam, enyuŋ edi ndisime ɔtɔ kiet: ikpikpu item! ke edi eto!

⁹ Eda silver eke edomde efere ke Tarshish edi, eda gold ke Uphaz, utom owo usɔ, ye eke ubɔk anditara, edi: edisine-ŋkpɔ mmɔ awawa ye purple: kpukpru mmɔ edi se mme ɔfiɔkŋkpɔ owo enamde.

¹⁰ Edi Jehovah edi Abasi akpanikɔ, Abasi uwem, ye nsinsi Edidem: iyaresit esie enyeŋe ererimbot, mme idut inyuŋ ikemeke ndida ifuresit esie.

¹¹ Ntem ke mbufo edidɔhɔ mmɔ, ete, Eyesobo mme abasi oro mikenamke enyɔŋ ye isɔŋ, efep ke isɔŋ ye ke idak ikpa-enyɔŋ emi.

¹² Enye akanam isɔŋ ke odudu esie, ada ifiɔk esie owuk ererimbot ke itie esie, onyuŋ eneŋere ikpa-enyɔŋ ke asian esie.

¹³ Uyo esie ke ini enye osiorode enye anam ediwak mmɔŋ odu ke ikpa-enyɔŋ, enye anam mbubit enyɔŋ oto ke utit isɔŋ ɔdɔk, anam obuma ɔnɔ edim, onyuŋ osio ofum ke ebiet unim-ŋkpɔ esie.

¹⁴ Kpukpru owo eke minyeneke ifiɔk emi ebiet unam: but anam kpukpru anditara abaŋa mbiet mmɔ: koro nditara mbiet mmɔ edide nsu, ibifik minyuŋ iduhe mmɔ ke esit.

¹⁵ Mmɔ edi ikpikpu, ŋkpɔ nsahi, eyetak ke ini ufen mmɔ. Udeme Jacob ibietke mmɔ emi ŋkpɔ:

¹⁶ koro enye edide andibot kpukpru ŋkpɔ; Israel onyuŋ edi eto udeme esie: Jehovah mme udim edi enyiŋ esie.

¹⁷ Taŋ mme ekuo fo ke isɔŋ,

¹⁸ O andiduŋ ɔkpɔsɔŋ ebiet. Koro ntem ke Jehovah ɔdɔhɔ, ete, Sese, ami nyesin mme andiduŋ isɔŋ ke ŋkpɔ-utop ntop mmɔ ke ini emi, nnyuŋ ntuhɔ mmɔ, man mmɔ ekut.

¹⁹ Ɔdɔdiɔk ye ami abaŋa unan mi! ufen abiak mi: edi ami ŋkɔdɔhɔ, nte, Emi edi ubiak ke akpan, ndien mmenyene ndiyɔ enye.

²⁰ Tent mi amabiara, kpukpru uruk mi emenyuŋ ekibe; nditɔ mi emewɔŋɔ ekpɔŋ mi, ndien mmɔ iduhe: baba owo kiet eke eneŋerede tent, onyuŋ ɔkɔŋde mme ikpehe mi, inyuŋ iduhe aba.

²¹ Koro mme ekpemerɔŋ emekabare ebiet unam, minyuŋ ibineke Jehovah: oro esin mmɔ ikwe unen, ofuri ufene mmɔ enyuŋ esuana.

²² Uyo etop! sese, ke edi. Akamba mkpo onyuŋ oto ke idut edere edi, ndinim mme obio Judah ke ŋkpɔ nditaha, ye ke iduŋ mme jackal.

²³ O Jehovah, mmɔfiɔk nte ke usuŋ owo iduhe owo ke ubɔk: owo eke asaŋade inyuŋ ikemeke ndineŋere ikpat esiemɔ.

²⁴ O Jehovah, tunɔ mi, edi nam ke ufat; mbak afo edinam mi ndi ekpri ke iyaresit fo.

²⁵ Ŋwaŋa iyaresit fo ke idem mme idut eke mifiɔkke fi, ye ke mme ufɔk eke mikotke fi enyiŋ: koro emedia Jacob, mmɔ esuk eta enye, enyuŋ etak enye, enyuŋ esobo iduŋ esie.