JAMES 4 - Edisana ñwed Abasi Ibom

Ufan ye Ererimbot Ɔwɔrɔ Usua ye Abasi

¹ EKƆŊ ye eŋwan eto mmɔŋ edu ke otu mbufo? Nte mmɔ itoho ke ŋkpɔ emi, kpa ke mme mbre mbufo, emi eŋwanade ekɔŋ ke ndido mbufo?

² Mbufo ediɔk itɔŋ, ndien inyeneke; mbufo ewot owo, enyuŋ esin esit ke ŋkpɔ owo, ndien ikemeke ndida nnyene: mbufo eŋwana eŋwan, enyuŋ etop ekɔŋ: mbufo inyeneke, koro mbufo mibeŋeke.

³ Mbufo ebeŋe, edi inɔŋɔ mbufo, koro mbufo ebeŋede ke idiɔk usuŋ, man eda edep ŋkpɔ-mbre.

⁴ Mbufo iban ŋka-owo, nte mbufo ifiɔkke ite, eridi ufan ye ererimbot edi eridi usua ye Abasi? mmɔdo owo ekededi eke oyomde ndidi ufan ye ererimbot anam idem usua ye Abasi.

⁵ Mme ese ete Ŋwed Abasi ababiaŋa ke ini enye ɔdɔhɔde ete, Spirit emi Enye esinde nnyin ke idem ofibe ufup oyom nnyin?

⁶ Edi Enye ɔnɔ mfɔn awak akan. Mmɔdo ewetde ete, Abasi ɔbiɔŋɔ mbon iseri, edi ɔnɔ mbon nsuhɔre-idem mfɔn.

⁷ Esuk idem ndien enɔ Abasi; eŋwana ye satan, ndien enye eyefehe ɔkpɔŋ mbufo;

⁸ esaŋa ekpere Abasi, ndien enye eyesaŋa ekpere mbufo. Eyet ubɔk mbufo esana, mbufo mme anam-idiɔk: enyuŋ enam esit mbufo esana, mbon esit iba.

⁹ Edu ke nnan-enyin, enyuŋ efuhɔ, enyuŋ etua eyet; eyak imam mbufo akabare edi eseme, idara mbufo onyuŋ akabare edi mfuhɔ.

¹⁰ Esuhɔre idem ke iso Ɔbɔŋ, ndien Enye eyemen mbufo onim ke enyɔŋ.

¹¹ Nditɔ-ete, ekubaŋa kiet eken idiɔk ibaŋa. Owo emi abaŋade eyen-ete esie, onyuŋ ekpede eyen-ete esie abaŋa ibet, onyuŋ ekpe ibet: edi edieke afo ekpede ibet, afo udige aba anam-ibet, edi eyedi ekpe-ibet.

¹² Ɔnɔ-ibet ye ebiere-ikpe kiet kpɔt odu, kpa Enye emi ekemede ndinyaŋa nnyuŋ nsobo: ama edi afo, afo edi anie eke ekpede mbuɔhiduŋ fo?

¹³ Da mbufo, emi edɔhɔde ete, Mfin mme mkpɔŋ iyeka ke obio emi ikadaŋ do isua kiet, inyam urua, idia udori: kpa ke ini mbufo mifiɔkke se iditibede mkpɔŋ.

¹⁴ Uwem mbufo edi nso? Mbufo edi ntuhube, emi ɔwɔrɔde ke ekpri ini, ndien ebe efep.

¹⁵ Mbufo ekpekam edɔhɔ ete, Ke Ɔbɔŋ onyimede, iyedu uwem, inam ŋkpɔ emi mme ŋkpɔ oro.

¹⁶ Edi ke emi ke mbufo ebure ke nnam-inua: kpukpru mbure eke etiede ntre ediɔk.

¹⁷ Mmɔdo owo emi ɔfiɔkde ndinam eti ŋkpɔ, ndien minamke, eritre ndinam oro edi idiɔk-ŋkpɔ ɔnɔ enye.