ISAIAH 9 - Edisana ñwed Abasi Ibom

Edinen Ukara Emi Ɔbɔŋ Emem Emi Edidide Edikarade

¹ KORO enye (isɔŋ) emi okokutde ukut midikimke. Kpa nte akpa ini ɔkɔsuhɔrede isɔŋ Zebulun ye isɔŋ Naphtali, kpa ntre ini iso eyefori usuŋ inyaŋ, ye edem Jordan oko, ye Galilee mme idut.

² Mbio oro ekesaŋade ke ekim ekut akwa uŋwana: ama edi mmɔ eke eketiede ke isɔŋ mfut mkpa, uŋwana ayama ɔnɔ mmɔ.

³ Afo amanam idut ɔtɔt, amanam idaresit esie okpon: mmɔ edat esit ke iso fo, kpa nte edatde esit ke ini ukpeŋe, kpa nte ebrede ke ini mmɔ edemede mbume.

⁴ Koro afo omobuŋ ɔkpɔnɔ mbiomo esie, ye eto afara esie, ye esaŋ andifik enye, kpa nte akanamde ke usen Midian.

⁵ Koro kpukpru ŋkpɔ ekɔŋ eke owo ekɔŋ adade oduk ke ekɔŋ, ye ɔfɔŋ-idem eke ewerede ke iyip, edi se edifɔpde udia ikaŋ.

⁶ Koro eyen amanade ɔnɔ nnyin, enɔ nnyin eyen-eren: ubɔŋ onyuŋ odoro enye ke afara; enyuŋ esio enye enyiŋ, Utibe, Ɔnɔ-item, Ɔkpɔsɔŋ Abasi, Nsinsi Ete, Ɔbɔŋ Emem.

⁷ Ubɔŋ ye emem ididopke ndikɔri ke ebekpo David, ye ke itie ubɔŋ esie, man onim enye, onyuŋ ɔsɔŋ owuk enye ke ikpe ye ke edinen ido, ke emi ye ke nsinsi. Ufup Jehovah mme udim eyenam ŋkpɔ emi.

⁸ Ɔbɔŋ ɔnɔ uyo esɔk Jacob, ndien enye ɔduɔ ke otu Israel.

⁹ Ndien ofuri obio, kpa Ephraim, ye mme andiduŋ Samaria, emefiɔk, emi edɔhɔde ke iseri ye mkpon-esit, ete,

¹⁰ Mme brick emewure, edi nnyin iyebɔp ke edisɔi itiat; emekpeŋe mme cycomore eduɔŋɔ, edi nnyin iyeda cedar ikpuhɔ.

¹¹ Ndien Jehovah ɔmɔŋ emenere mme asua Rezin ke enyɔŋ akan enye, onyuŋ edemere mme asua esie:

¹² Syria ke iso, ye mme Philistine ke edem; ndien mmɔ eyeŋwaŋade inua eta Israel. Ofuri ŋkpɔ emi isinke iyaresit esie akabare, edi enye ke anyanyan ubɔk esie kaŋa.

¹³ Edi mbio emi ikabakede ibine enye emi akamiade mmɔ, inyuŋ itieneke Jehovah mme udim.

¹⁴ Ndien Jehovah omosibe ibuot ye isim, ye mkpabak ye mkpɔŋ-isɔŋ ke Israel efep, ke usen kiet.

¹⁵ Ebiowo ye akamba owo edi ibuot; ndien edi prophet eke etemede owo nsu, edi isim.

¹⁶ Ndien mme mmɔ emi edade mbio emi usuŋ, esin mmɔ ediyo; ndien emesobo mmɔ emi mmɔ edade usuŋ.

¹⁷ Oro esin mkparawa mmɔ midinemke Ɔbɔŋ esit, esin enye mituaha nditɔ-akpa mmɔ, ye mme ebe-akpa mmɔ mbɔm: koro kpukpru mɔ edide mme oburobut ye mme anam idiɔk, kpukpru inua enyuŋ edɔhɔ ndisime. Ofuri ŋkpɔ emi isinke iyaresit esie akabare, edi enye ke anyanyan ubɔk esie kaŋa.

¹⁸ Koro idiɔk ido asakde nte ikaŋ: enye ata akpap ye ikɔt ŋkukim, onyuŋ obubere ke mfuhɔ akai, ndien mmɔ edɔk ke enyɔŋ, nte nsuŋikaŋ eke emenerede.

¹⁹ Iyaresit Jehovah esin isɔŋ okim, mbio-obio enyuŋ ebiet udia ikaŋ: kiet iyakke kiet ɔbɔhɔ.

²⁰ Ndien enye awai ŋkpɔ eke edude ke ubɔk nnasia, edi osuk etie biɔŋ; onyuŋ adia se idude ke ubɔk ufien, edi iyuhɔke: kpukpru mmɔ eta idem ubɔk mmɔ.

²¹ Manasseh ata Ephraim: Ephraim onyuŋ ata Manasseh; mmɔ mbiba enam ikɔ ye Judah. Ofuri ŋkpɔ emi isinke iyaresit esie akabare, edi enye ke anyanyan ubɔk esie kaŋa.