ISAIAH 8 - Edisana ñwed Abasi Ibom

Ebak Abasi

¹ NDIEN Jehovah ɔdɔhɔ mi, ete, Da akamba ikpa-ŋwed ke idem fo, nyuŋ da nta ŋwed owo wet ke esit, ete, Eke Maher-shalal-hash-baz; (Mbume, wara! Uŋwo, sɔp ukot!)

² Ndien nyeda ntiense akpanikɔ ndian idem, man etie ese, kpa Uriah oku, ye Zechariah eyen Jeberechiah.

³ Ndien ntiene prophet aŋwan; ndien enye oyomo, aman eyen-eren. Ndien Jehovah ɔdɔhɔ mi, ete, Sio enye enyiŋ Maher-shalal-hash-baz.

⁴ Koro ke eyenɔwɔŋ emi mika-ifiɔkke nte okotde, ete, Ete mi, ye eka mi! mmɔ eyemen inyene Damascus, ye mbume Samaria, ebiom ke iso edidem Assyria.

⁵ Ekem Jehovah ɔtɔŋɔ ntak ɔdɔhɔ mi ŋko, ete,

⁶ Koro mbio-obio emi esede mmɔŋ Shiloah emi asaŋade suŋ, ke ndek, enyuŋ edatde esit ebaŋa Rezin ye eyen Remaliah: mmɔdo, sese,

⁷ Ɔbɔŋ ke ada mkpɔsɔŋ ye akamba mmɔŋ akpa, kpa edidem Assyria, ye ofuri ubɔŋ esie, ɔdɔk etiene mmɔ: ndien enye eyetɔ ɔyɔhɔ ke ofuri akpa esie, onyuŋ emen ofuri mben esie:

⁸ ndien enye eyebe oduk ke Judah: eyetɔ onyuŋ asaŋa ebe, eyesim ke itɔŋ; ndien eritara mba esie eyedi se iyɔhɔde ubom isɔŋ fo, O Immanuel.

⁹ Mbufo mme idut edama, ndien enuaha; kpukpru mme anyan idut, ekpaŋ utɔŋ mbufo, ebɔbɔ ŋkpɔ ke idem, ndien enuaha; ebɔbɔ ŋkpɔ, ndien enuaha.

¹⁰ Mbufo eduak uduak, ndien eyekpu: edɔhɔ ikɔ, ndien ididaha: koro Abasi odude ye nnyin.

¹¹ Koro ntem ke Jehovah ɔkɔdɔhɔ mi ke ɔkpɔsɔŋ ubɔk esie: onyuŋ eteme mi, ete ŋkusaŋa ke usuŋ mbio-obio emi,

¹² ete Mbufo ekudɔhɔ, ete, “Odu,” edian kpukpru ŋkpɔ emi mbio-obio emi edɔhɔde ete, “Odu,” edian enye; ekenyuŋ eyak ndik emi anamde mmɔ anam mbufo, ekunyuŋ enyek.

¹³ Mbufo enim idem Jehovah mme udim ke edisana; eyak enye onyuŋ edi se mbufo ebakde enyuŋ edikhede.

¹⁴ Ndien enye eyedi se ufɔk Israel mbiba enimde ke edisana, ye itiat utuaha, ye akwa itiat eke esinde mmɔ eduɔŋɔ, ye afia ye mfine mme andiduŋ Jerusalem.

¹⁵ Ndien ediwak owo ke otu mmɔ eyetuak ukot ke esit, enyuŋ eduɔŋɔ, enyuŋ enuaha, enyuŋ esike, enyuŋ eduɔ ke mfine.

¹⁶ Bɔp ŋwed ntiense, fik seal ke ewuhɔ ke otu mmɔ emi ntemede.

¹⁷ Ndien nyebet Jehovah emi odipde ufɔk Jacob iso esie, nyenyuŋ ndori enye enyin mi.

¹⁸ Sese ami ye nditɔ emi Jehovah ɔnɔde mi, idi mme idiɔŋɔ ye ŋkpɔ ndyɔ ke Israel, ito Jehovah mme udim emi oduŋde ke obot Zion.

¹⁹ Ndien adaŋemi mmɔ edɔhɔde mbufo, ete, Mbufo ebup ndem, ye mbia-idiɔŋ emi ekunide, enyuŋ enunde ikɔ: nte mbio ikpobupke Abasi mmɔ? (Nte ekpebup) mme akpa-mkpa enɔ mme odu-uwem?

²⁰ Ebup ewuhɔ ye ŋwed ntiense: ke mmɔ minyimeke ndidɔhɔ nte ekemde ye ikɔ emi, ke edi mmɔ eke midikwe usiere.

²¹ Ndien mmɔ eyesaŋa ke esit ebe ke nnanenyin ye biɔŋ: ndien ama ekem ke biɔŋ ɔdɔŋde mmɔ, mmɔ eyeyat esit, enyuŋ esuŋi edidem mmɔ ye Abasi mmɔ, enyuŋ emenere iso mmɔ ke enyɔŋ.

²² Ndien mmɔ eyewuk enyin ese isɔŋ; ndien sese nnanenyin ye ekim, ekim ukut, eyenyuŋ ebin enye esin ke ɔkpɔsɔŋ ekim.