ISAIAH 65 - Edisana ñwed Abasi Ibom

Abasi Eyenɔ Kpukpru mbon Nsɔŋibuot Ufen

¹ MMƆ eke mikebupke emebine mi; mmɔ eke mikoyomke mi emekut mi: mmɔdɔhɔ idut eke mikereke enyiŋ mi, nte, Se mi, se mi.

² Ke ofuri usen ke nnyanare ubɔk mi nnɔ mbon nsɔŋ-ibuot, emi esaŋade ke usuŋ eke mifɔnke, ebine ekikere idem mmɔ;

³ mbio emi eyatde mi esit aŋwa-aŋwa kpukpru ini; eke ewade uwa ke iŋwaŋ-esa, enyuŋ efɔpde incense ke mme brick:

⁴ emi etiede ke mme udi, enyuŋ edaŋde ke ndibe ebiet ke okoneyo, eta unam edi, ndien ŋkpri mbai edidehe unam edu ke eso mmɔ; emi edɔhɔde, ete,

⁵ Da do, kusaŋa ukpere mi, koro nsanade ŋkan fi. Mmɔ emi edi nsuŋikaŋ ke ibuo mi, ikaŋ eke asakde ke ofuri usen.

⁶ Jehovah ɔdɔhɔ ete, Sese, emewet enye ke iso mi: ndidopke uyo, ibɔhɔke ini nsosio usiene, nsosio mme idiɔk ido mbufo, ye eke mme idiɔk ido mme ete mbufo, ini kiet, nsin mmɔ ke ikpanesit;

⁷ koro mmɔ ekefɔpde ŋkpɔ ke enyɔŋ ikpɔ obot, enyuŋ esuenede mi ke enyɔŋ ŋkpri obot: mmɔdo ndidomode akpa utom mmɔ nsin mmɔ ke ikpanesit.

⁸ Ntem ke Jehovah ɔdɔhɔ, ete, Kpa nte ekutde obufa wine ke etuek vine, owo onyuŋ ɔdɔhɔ ete, Kusobo enye: koro eti ŋkpɔ odude enye ke esit: kpa ntre ke ndinam mbaŋa ikɔt mi, man ŋkusobo kpukpru.

⁹ Ndien nyeda mkpasip ke Jacob, ye owo eke adade ikpɔ obot mi enyene ke Judah, ŋwɔrɔ: ndien ndimek owo mi eyeda enye enyene, ikɔt mi eyenyuŋ eduŋ do.

¹⁰ Ndien Sharon eyekabare edi ebiet eke ŋkpri ufene eduŋde, ebedeŋ Achor eyenyuŋ akabare edi ebiet eke enaŋ edinade, ɔnɔ ikɔt mi emi ebinede mi.

¹¹ Edi ama edi mbufo emi ekpɔŋde Jehovah, enyuŋ efrede edisana obot mi, emi ebride okpokoro enɔ Gad, enyuŋ edade mbuaha esin enɔ Meni etɔhɔ;

¹² mmen mbufo nnim nnɔ ofut, kpukpru mbufo eyenyuŋ enuhɔ enɔ afai: koro ami ŋkotde, edi mbufo iyereke; ndɔhɔ, edi mbufo ikopke; mbufo enyuŋ enam se idiɔkde mi ke enyin, enyuŋ emek se mme-mmaŋa.

¹³ Mmɔdo, ntem ke Ɔbɔŋ Jehovah ɔdɔhɔ, ete, Sese, ikɔt mi eyedia ŋkpɔ, edi biɔŋ eyedɔŋ mbufo: sese, ikɔt mi eyeŋwɔŋ, edi itɔŋ eyesat mbufo: sese, ikɔt mi eyedat esit, edi but eyenam mbufo: sese,

¹⁴ ikɔt mi eyekwɔ ke idaresit, edi mbufo eyeseme ke ubiak esit, enyuŋ etuaŋa ke ndutuhɔ spirit.

¹⁵ Ndien mbufo eyekpɔŋ enyiŋ mbufo enim ke ŋkpɔ isuŋi enɔ edimek ikɔt mi: ndien Ɔbɔŋ Jehovah eyewot fi, onyuŋ osio ikɔt esiemɔ enyiŋ efen:

¹⁶ eke owo eke edidiɔŋde idem esie ke isɔŋ edidade Abasi akpanikɔ ɔdiɔŋ; ye owo eke ediŋwɔŋɔde ke isɔŋ edidade Abasi akpanikɔ ɔŋwɔŋɔ; koro emefre akpa ndutuhɔ: koro mmɔ enyuŋ edibede mi ke enyin.

¹⁷ Koro, sese, mmɔŋ mbot mbufa enyɔŋ ye obufa isɔŋ, ndien owo iditihi aba akpa oro, idinyuŋ idukke owo ke esit.

¹⁸ Edi mbufo edat esit, enyuŋ ebre nsinsi ke se ami mbotde: koro, sese, ami mbot Jerusalem ke ŋkpɔ inemesit, mbot mbio esie ke ŋkpɔ idaresit.

¹⁹ Ndien Jerusalem eyenem mi esit, ikɔt mi eyenyuŋ edat mi: ndien idikopke aba uyo eyet ye uyo eseme ke esit.

²⁰ Ndien eyen-nsek ke usen, ye mbiowo eke miyɔhɔke ini esie, idiwɔrɔke aba do: koro akparawa eyekpa ke osimde isua ikie; ndien isuŋi eyeda anam-idiɔk ke osimde isua ikie.

²¹ Ndien mmɔ eyebɔp ufɔk enyuŋ eduŋ ke esit: eyenyuŋ etɔ iŋwaŋ-vine, enyuŋ edia mfri mmɔ.

²² Mmɔ idibɔpke, ndien owo eŋwen oduŋ; iditɔhɔ, ndien owo efen adia: koro usen ikɔt mi ebietde usen eto, ndien nedimek ikɔt mi eyedia se ubɔk mmɔ enamde.

²³ Mmɔ idinamke utom ke ikpikpu, idinyuŋ imanke nditɔ inɔ ŋkpɔ ndik: koro mmɔ ye ubon mmɔ ŋko edide nditɔ mmɔ eke Jehovah ɔdiɔŋde.

²⁴ Ndien ama ekem, ke mmɔ mika-ikotke kaŋa, ami nyeyere: ke mmɔ esuk edɔhɔde ikɔ, ami nyekop.

²⁵ Wolf ye eyen-erɔŋ eyedia ŋkpɔ ɔtɔ kiet, lion eyenyuŋ ata nnyanyaŋa nte enaŋ: ndien ama edi urukikɔt, ntan eyedi udia esie, Owo idinamke idiɔk, idinyuŋ ibiatke ŋkpɔ ke ofuri edisana obot mi: uyo Jehovah edi emi.