ISAIAH 64 - Edisana ñwed Abasi Ibom

¹ AFO akpakam asiak enyɔŋ, ɔsuhɔre, man ikpɔ obot etara ewet ke iso fo,

² kpa nte ikaŋ atade ikɔt, nte ikaŋ anamde mmɔŋ ofut; man anam mme asua fo efiɔk enyiŋ fo, mme idut eyenyek idem ke iso fo.

³ Ke ini afo anamde ŋkpɔ ndik eke nnyin midorike enyin, afo ɔsuhɔre, ikpɔ obot etara ewet ke iso fo.

⁴ Ndien toto ke nsinsi owo ikopde, inyuŋ ikpaŋke utɔŋ, enyin inyuŋ ikwe Abasi, ke mibɔhɔke afo, eke anamde ŋkpɔ ɔnɔ mmɔ eke ebetde enye.

⁵ Afo osobo ye owo eke adatde esit ke erinam edinen ido, eke adade usuŋ fo eti fi. Sese, afo amayat esit: ndien nnyin inam idiɔk: nsinsi ubigi odu mmɔ oro ke esit, ndien eyenyaŋa nnyin.

⁶ Nnyin kpukpru inyuŋ ibiet ŋkpɔ ndek, kpukpru nti ido nnyin enyuŋ ebiet edidehe ɔfɔŋidem; kpukpru nnyin inyuŋ iyemere nte ikɔŋ; mme idiɔk ido nnyin enyuŋ emen nnyin efep nte ofum.

⁷ Ndien baba owo kiet iduhe eke okotde fi enyiŋ, onyuŋ edemerede idem esie ete imum fi ikama: koro afo omodip nnyin iso fo, onyuŋ anam nnyin itak ke mme idiɔk ido nnyin.

⁸ Ke emi, ndien, O Jehovah, afo edi ete nnyin; nnyin idi mbat-eso, ndien edi afo andibot nnyin; nnyin kpukpru inyuŋ idi se ubɔk fo akanamde.

⁹ Kuyat esit ukaha, O Jehovah, kunyuŋ uti idiɔk ido ke nsinsi: sese, mbɔk, se, nnyin kpukpru idi ikɔt fo.

¹⁰ Ndisana obio fo emekabare edi wilderness, Zion edi wilderness, Jerusalem edi ndon.

¹¹ Edisana ye ediye ufɔk nnyin emi mme ete nnyin eketorode fi, ama ata ikaŋ: kpukpru ndinem ebiet emenyuŋ ebiara.

¹² Nte afo edimum idem fo akama abaŋa ŋkpɔ emi, O Jehovah? Mme afo edidop, onyuŋ ɔdɔdiɔŋ otuk nnyin.